Búgin QR Mádenıet jáne aqparat mınıstrliginiń keńeıtilgen alqa otyrysy ótti. Jıynda Qazaqstan Jazýshylar Odaǵynyń tóraǵasy Mereke Qulkenov sóılep, elimizdegi shyǵarmashylyq qaýymǵa memleket tarapynan qandaı qoldaýlar kórsetilip jatqanyn aıtty.«Qazaqstannyń mádenıet salasyn basqarǵan tulǵalardyń bári – Temirbek Júrgenovten bastap birazy kóp eńbek sińirdi. Sol mádenıetimizge qazir Aıda Ǵalymqyzy da kóp jumys atqaryp jatyr. Ony ne úshin aıtyp otyrmyn?! Byltyr 13 jeltoqsanda Jazýshylar Odaǵynyń 90 jyldyq mereıtoıyn ótkizdik. Kópshilik bul jıynnyń joǵary deńgeıde ótkenin aıtyp jatyr. Bul jıynǵa TMD elderiniń bárinen jazýshylar qatysyp, rıza bolyp qaıtty. Eger Mádenıet mınıstrligi, Almaty qalasy ákimdigi qoldaý bildirmese, Odaqtyń 90 jyldyǵy ótpes edi. Men ylǵı aıtamyn: bizdiń shyǵarmashylyq uıymdar Memleket basshysynyń, Úkimettiń, sonyń ishinde Mádenıet mınıstrliginiń qoldaýyn únemi sezinip kele jatyr. Sondyqtan, shyǵarmashylyq uıymdar Úkimetke, sonyń ishinde óziniń mınıstrligine (Mádenıet jáne aqparat mınıstrligi – red.) kúmánmen qaramaýy kerek. Byltyr birqatar óner adamyna memlekettik syılyq tabystaldy. Sonda alǵandar qýanyp, almaǵandar aıǵaı shyǵardy. Artyq sózder aıtyldy. Syılyq degen – jarys. Eń myqty dúnıeler ǵana marapat alady. Ádebıet salasy boıynsha eki qalamgerimiz memlekettik syılyq ıegeri boldy: biri – Svetqalı Nurjanov, biri – Qulbek Ergóbek. Ekeýi de laıyqty adam. Endeshe, nege bul marapatty almaǵan adamdar olarǵa kúmánmen qaraıdy? Nege qýanbaımyz, nege marapat ıelerin quttyqtamaımyz?! Tańǵalatyn taǵy bir nárse, kınematografıa, teatr salasyndaǵy keıbir adamdar myqty-myqty tulǵalardyń qolyn qoıdyryp, memleketke qyzmet etip júrgen adamdardyń ústinen Prezıdentke hat jazady. Mine, osyny toqtatý kerek. Tipti, hatty oqymaı qol qoıatyndar bar. Bireýdi osylaı nahaqtan qaralaýǵa bola ma? Sondyqtan, Prezıdentke, úkimetke, mınıstr atyna jazylǵan hatqa qol qoıarda oǵan baıyppen qaraý kerek. Bizde mádenıet salasynyń jumysy jolǵa qoıyldy. Oblystyq mádenıet basqarmalarynyń jumysyna qazaq jazýshylarynyń kez kelgeni rıza! Árbir oblysta jazýshylar bar. Solar jergilikti ákimdiktiń, Mádenıet mınıstrliginiń qamqorlyǵyn kórip otyr. Tipti, buryn-sońdy bolmaǵan qoldaýyn sezinip otyr. Árbirine stıpendıa taǵaıyndalyp, árqaısynyń kitabyn shyǵaryp berýge tyrysyp jatyr. Sondaı qamqorlyqty kórmeý, kórgisi kelmeý durys emes dep oılaımyn. Mádenıetimiz qaı jaǵynan bolsyn jaqsy damyp kele jatyr. Ózim sanap shyqtym, byltyr respýblıkamyzda 5-6 márte teatrlar festıvali ótti. Shyǵys Qazaqstanda, Almaty oblysynda, Mańǵystaýda, Atyraýda festıválder ótip, oǵan qatysqan teatr ujymdary júldeli bolyp, qýanyp qaıtty. Óıtkeni, Prezıdentimiz mádenıetke erekshe kóńil bólip otyr. Qazir bizdi basqaryp otyrǵan Mádenıet jáne aqparat mınıstri Aıda Ǵalymqyzy kez kelgen jazýshy men onyń shyǵarmasyn biledi. Kez kelgen teatr adamymen, opera ánshisimen sóılese alady. Ondaı adamdy qadirleýimiz kerek. Osylaı jumys istep jatqan adamǵa shamamyz kelgenshe kómektesýge tyrysýymyz kerek», - dedi Mereke Qulkenov. Jazýshylar Odaǵynyń tóraǵasy elimizde kitap shyǵarý jumysy da jolǵa qoıylǵanyn, sondaı aq oǵan memleket tarapynan nendeı qoldaýlar kórsetilip jatqanyn aıtty.«Elimizde óte sapaly, mazmundy kitaptar shyǵyp jatyr. Tipti, arasynda «haltýra» kitaptar da bar. Bul rette Jazýshylar odaǵy da belsendi jumys istep, tek sapaly kitaptardyń shyǵýyna atsalysýy kerek dep oılaımyn. Oblystaǵy mádenıet basqarmalary birigip jumys isteýge kómektesýi kerek. Osy rette Aqtóbe oblysynyń mádenıet basqarmasy basqalarǵa úlgi kórsetip otyr. Jyl saıyn 10 jazýshy mıllıon teńgeden qalamaqy alyp otyr. Ony qazir Jambyl men Almaty oblystary da qoldap ketti. Nege deısiz ǵoı? Óıtkeni, bizdiń mádenıetimiz ósip kele jatyr. Osy salany basqaryp otyrǵandar mádenıet pen ádebıettiń ne ekenine basqasha qaraıtyn boldy. Múmkindiginshe jergilikti talanttarǵa qoldaý kórsetýge tyrysyp jatyr. Bul Qazaq degen halyqtyń mádenıeti óskenin bildiredi. Qazir oblystarda búdjet ósti. Onyń ishinde mádenıet salasynda jumys isteıtin azamattarǵa qoldaý da artty. Kitaphanashylardyń da jaǵdaıy durystaldy dep oılaımyn. Táýlik boıy jumys isteıtin kitaphanalarda kitaptan bas almaı otyrǵan jastardyń da qatary kóbeıdi», - dedi Jazýshylar Odaǵynyń tóraǵasy.