Memleket basshysyna ortalyqtyń jetekshi startap jobalary («Chocofamily» kompanıalar toby, Nommi jobasy jáne SmartSatu platformasy) tanystyryldy. Olar taǵamǵa tapsyrys berý jáne áýe bıletterin satý jónindegi ınternet-gıpermarket, taýar jetkizýshiler men tutynýshylar arasyndaǵy taýar aınalymyna arnalǵan alań, sondaı-aq búkil álem boıynsha ınternetke jyldam ári meılinshe yńǵaıly qosylýdy kózdeıtin Wi-Fi roýter ázirlemesi retinde jumys isteıdi.    

Elbasy memleket tarapynan «Sıfrlyq Qazaqstan» baǵdarlamasynyń iske asyrylýyna zor mán berilip otyrǵanyn atap ótti.

– Arnaıy mınıstr men vıse-premer taǵaıyndaldy, ár mınıstrlikte osy máselelermen aınalysatyn adamdar bar. Biz álemde bolyp jatqan úderisten qalyp qoımaýymyz kerek. Biz sıfrlandyrýdyń arqasynda, ásirese, óndirýshi kompanıalardyń eńbek ónimdiligin jyldam arttyra alamyz dep úmittenemin, – dedi Qazaqstan Prezıdenti.

«Chocofamily» ınternet holdıńiniń negizin qalaýshylardyń biri ári bas dırektory Ramıl Mýhorápov Nursultan Nazarbaevqa İT-salasy men jalpy sıfrlandyrý úderisine zor mán berip otyrǵany úshin alǵys aıtty.

– Biz İT-qoǵamdastyǵy atynan «Sıfrlyq Qazaqstan» baǵdarlamasy úshin ózińizge shynaıy rızashylyq bildiremiz. Biz sonyń arqasynda órkendep kelemiz. Aqparattyq tehnologıalardan basqa birde-bir sala mundaı jyldamdyqpen damı almaıdy. Biz Qazaqstandaǵy ınternet naryqtyń kóshbasshysy bolyp qana qoımaı, halyqaralyq deńgeıge de jetip, úlken kompanıalar qura alatynymyzǵa senimimiz zor, – dedi kompanıa basshysy.

Elbasyna memlekettik qyzmet kórsetý reglamentterimen qamtylmaǵan, qalyptan tys ómirlik ahýaldy retteý jónindegi «OpenAlmaty» qoǵamdyq qabyldaý ornynyń jumysy tanystyryldy. Oǵan 7 aıdyń ishinde 18 396 ótinish túsip, olardyń 78 paıyzy sol jerde jedel sheshimin tapty.

SmArt.Point jobasy – Almatydaǵy tehnologıalardy damytýǵa arnalǵan keńistik. Onda joǵary tehnologıalar men kreatıvti bıznes salasynda jumys isteıtin 40 kompanıa ornalasqan. Olardyń jıyntyq aqsha aınalymy 100 mıllıon dollardan asady. Qyzmet etý baǵyttary elektrondy saýda, qarjy tehnologıasy, avtomattandyrylǵan logıstıka, medıa, kompúterge arnalǵan baǵdarlamalardy ázirleý, telekomýnıkasıa, blokcheın, zańgerlik jáne býhgalterlik qyzmet kórsetý aýtsorsıngi, bilim tehnologıalary sıaqty salalardy qamtıdy.

IT-hab jalpy kólemi 9000 sharshy metrdi qamtıtyn eki qabatty ǵımaratta ornalasqan. Munda bir mezgilde jeke oryndardy nemese 7-8 qyzmetkerge arnalǵan ofısterdi jalǵa alatyn 700 adamǵa deıin jumys isteı alady.

Bul nysan aptanyń jeti kúninde 24 saǵat boıy ashyq turady. Munda kelissóz júrgizýge arnalǵan bólmeler, oıyn alańdary jáne sport zaly bar. Ártúrli mamandyq pen salalardyń ókilderin biriktiretin ortalyq kovorkıng qaǵıdaty boıynsha salynǵan.