Qarıa tosyp zamannyń zar boıaýly ińirin, Toqsan toǵyz tas sanap tynshymaıdy kúbir ún. Bózek qylyp jel oınap bozdaq taýdyń tulymyn, Kók naızamen baýyzdap bulaq qyzdyń burymyn. Túsime enip jıi kún quraýlaıdy qyr túni, Úıirinen adasyp kisinegen jylqy úni. Tomaǵasyz búrkitim taǵdyr deıtin túlkini, Qansorpasyn qaınatyp qansonarda irkidi. Tik qadalyp kók baıraq,Kók Táńirli Bóri eli, Qoıýlana túsipti qoshqyl tartqan sher óńi . Tań azanyn kóterip kári Ǵasyr óleńi, Táýelsiz jyl kerýenin jórgekke orap bóledi. Ańyz-dala ,abyz el- qasıet qonyp bir tilim , Jibek erin aımalap qara jerdiń kirpigin . Iip emgen sábı Kún , mıyǵynda kúlkimin , Adyr-adyr jotanyń omyraýynyń úrpimin . Qazaq ısi shyqqan taq , qazaq uly tur basyp , Mańdaıyna halqymnyń Táńir jazǵan kil násip . Jetim qalǵan botany boz ingenge telitip , Bóz buıdasyn jetelep kele jatyr qyrdy asyp.

Qara jerdiń ózeginde órilgen, Búri buǵyp qaýyzynda kómilgen. Qandyezýleý zamanadan tanyp al, Adyr aspan – Alash syndy tegimnen. Quba belder qumyǵýdan aıyqqan, Qarańǵyǵa tamǵan tamshy ǵaıyptan, Unarynan úkili jyr ún qatty, Óz taǵynan shemen taǵdyr – taıyp han. Kúlteli úmit erkindikpen teńdesti, Qusaly ún, tusaýly muń kelmes-ti. Qundaqtaǵy qazaq deıtin bir uldy, Bozbala qyp oınatty kep Ker Besti. Qundyz bórik boıjetkenbiz qurbym-aý, Kún qatparly aq shymyldyq tur mynaý. Anam taqty aq jelekke Tiltumar, Tiline eshkim salmasyn dep qylburaý. Elsinbekqyzy Baqjan. S. Amanjolov atyndaǵy Shyǵys Qazaqstan memlekettik ýnıversıtetiniń «qazaq tili men ádebıeti» mamandyǵynyń 4 kýrs stýdenti. Qalalyq, Oblystyq múshaıralardyń jeńimpazy.