Aınaldyrǵan eki-úsh saǵattyń ishinde Denısimizden aıyrylyp qaldyq. Tal túste pyshaqtalyp ketti degen habardy estigende «jazylyp ketedi» degen senimde boldyq. Alaıda bolmady. Aman qalmady. Jalyndaǵan jıyrma besinde qyz-qyrqyndy emes sportty oılap, sportpen tynys alǵan talanttyń qazasy qabyrǵamyzdy qaıystyryp ketti. Keshki as ishýge degen tábet bolmady, túni boıy marqumnyń ónerin qaıtadan tamashalap, kóz jasymyzǵa erik berdik. Tań atsa da kóńil-kúı jaqsarmady. Jumys isteýge degen nıet joq. "Kim óltirdi, qashan ustaıdy, qalaısha aıamady, úsh lıtr qandy qalaısha joǵaltqan, jedel járdemdi shaqyrǵan kim?" degen suraqtar oıǵa maza berer emes. Búgin halyq súıkimdi sportshysynan, talantty jasynan, Qazaq eliniń patrıotynan aıyrylǵan kún. Sheshesiniń jalǵyz ulynan kóz jazyp qalǵan kún. Búgin – Qazaqstannyń aınasy shytynaǵan qaraly kún. Dál búgin men Dımash úshin qorqyp otyrmyn.

Kezinde jýrnalıs Erjan Baıtiles «Egemen Qazaqstanda» jarıalaǵan maqalasynda: «Al osy Qurmanǵalıevti bizdiń búgingi qoǵam bile me? Atyraýdyń Qul­sarysynda týyp, tabany ti­lingenshe dala tósinde ja­lańaıaq júgirip júrip túıe baq­qan bala Amerıkańyzdy aýzyna qaratqan joq pa? Gol­lan­dıańyz tikesinen tik turyp qurmet kórsetip edi ǵoı. 2007 jyly eshbir eleýsiz ǵana o dúnıege attanyp kete bardy. İzdegen, joqtaǵan adam bolmady. Odan aryda kim bar edi degende, bizdiń esimizge Amangeldi Sembın túsedi. Mılannyń «La Skalasynda» án aıtqan ataq­ty qazaq. Biraq bar ǵoı, tiri kúninde kózge shyqqan súıeldeı bop túrtpek kórgen talant óli­sinde de asa kóp baǵalanyp jat­qan joq. Soǵan qarap otyryp, arda qazaqtyń arýaǵynan da qoryqpaıdy ekenbiz dep oı­laısyń keıde. Nebári jıyrma jasynda jıyrma jyl boıyna saryla kútken Olımpıadanyń sary altynyn aıalap alaqanymyzǵa salyp edi ǵoı Bekzat sańlaq. Úsh dúrkin Olımp shyńyn baǵyndyramyn degen armany bar bolatyn. Qaıteıik-aı?! Áselhan Qalybekova apamyz aıtpaqshy, «qushaǵy qatty halyq ekenbiz». «Bekzatty úsh aı qushaǵymyzǵa qatty qystyq ta» máńgilik mekenine attandyryp sala berdik qoı.  Osy rette jıyrmaǵa jetpeı bu dúnıeden kóship ketken qaraǵandylyq boksshy Ermek Serikov eske túsedi. Jastar men jasóspirimder arasyndaǵy álemdik jarystyń bárin utqan jalyndy jigit eresekterdiń arasyna qosylǵanynda qapıada qaza tapty. Qaraǵandynyń tú­binde áldebireýler pyshaqtap ketip, aqyry qansyrap óldi. Bolashaqta Amangeldi Sem­­bın, Erik Qurmanǵalıev, Orazaly Dosbosynov, Bekzat Sattarhanov, Ermek Serikov sıaqty talanttardyń taǵdyryn endigi urpaq keshpeýi kerek. Sondyqtan memlekettik deń­geıde talanttardy saqtaıtyn, olarǵa qamqorlyq kórsetetin komısıa qurylýy qajet. San sala boıynsha olardyń tizimi jasaqtalyp, árbir kúni esepke alynyp, ári-beriden soń qaıda baryp, qaıda qoıatyny, ne iship-jeıtinine deıin tirkelip, hattalyp otyrýy tıis» dep úlken máseleni kótergen bolatyn.

Beıbit zamanda qalanyń qaq ortasynda tapa-tal túste kóliktiń aınasyn urlaıtyn qaraqshynyń pyshaǵynan kóz jumýdy reseılik BAQ «glýpaıa smert» (bolmashy sebep úshin qıylǵan ómir) dep qazaq qoǵamyn synap-minep tastady. Azıada, EKSPO dep qasyqtap jınaǵan abyroıymyz shelektep tógildi. Qylmys órship turǵan, ury-qaraqshy kóbeıgen, jumysy joq, qarny ash qoǵamymyzdyń bet-beınesin kórsetti. Áleýmettik jeli Denıs Tendi joqtap, Qazaqstandaǵy bylyq-shylyqty, jaýlap alǵan jemqorlyq týraly jazylǵan ótkir oıly, mazmuny ashshy jazbalarǵa toly. Kásipker Marǵulan Seısembaev aıtpaqshy "qylmys - qoǵamnyń qalypsyz ekonomıkaǵa degen qalypty jaýaby". Denıstiń túkke turǵysyz aınaǵa bola ólýi qoǵamnyń kir-kir, satpaq-satpaq bet-beınesin aıqyndap, kózimizge shuqyp kórsetkendeı boldy. Sondyqtan da syrt kózge ǵana tynysh zamanda talanttarymyz úshin qorqatyn boldyq. Denısten keıin Dımashtyń qaýipsizdik máselesi tolǵandyrady. Kúmis kómeı ánshimizdiń aman-esen júrip, tyńdarmandaryn baqytqa bólep, qýanysh qana syılap júrgenin shyn qalaımyz. Qazaqstan atyn búkil álemge máshhúr etip júrgen talanttar qatygez, meıirimsiz qoǵamnyń qurbanyna aınalmaýy tıis.