Atyraý oblysynyń ákimi Nurlan Noǵaev bilim berý salasynyń qyzmetkerlerimen keńes ótkizip, bilim berý obektileriniń jańa oqý jylyna daıyndyǵy máselesin qarady.

Jańa oqý jylyna daıyndyq týraly oblystyq bilim berý basqarmasynyń basshysy Qaıyrǵalı Kenjeǵalıev baıandady.

-Oblystyń oqý oryndaryn aǵymdaǵy jóndeý úshin búdjetten 328,2 mln. teńge bólindi. 2 mlrd teńgeden astam qarjy 18 oqý ornyn kúrdeli jóndeýge jumsaldy. Kúrdeli jóndeý júrgizilip jatqan barlyq mektepterde jumystar 1 qyrkúıekke deıin aıaqtalýy tıis. Sonymen birge búgingi kúni 30 oqý ornynyń qurylysy júrgizilýde. 8 mektep jáne 14 balabaqshany aǵymdaǵy jyldyń aıaǵyna deıin paıdalanýǵa berý josparlanýda, - dedi Qaıyrǵalı Kenjeǵalıev.

Mektepterdiń oqý jylyna júz paıyz daıyndyǵyn oblystyq Qoǵamdyq densaýlyq saqtaý departamentiniń basshysy Temirbek Musaǵalıev joqqa shyǵardy.

-Qalada apatty jaǵdaıǵa jaqyn kúıdegi mektepter de bar. Olardyń jaı-kúıi jaqsy deýge kelmeıdi, jasaıtyn jumystar jeterlik. Jóndeýdi qajet etetin basqa da bilim berý obektileri bar, - dep málimdedi Temirbek Musaǵalıev.

Óńir basshysy mektepter dırektorlary men bilim berý basqarmasy basshysynyń jaýaptaryn tyńdap, oǵan problemalyq mektepter týraly barlyq aqparatty usynýdy tapsyrdy.

-Bilim berý basqarmasy basshysynyń baıandamasynda bul málimetter nege joq? Biz problemany taýyp, ony sheshýimiz qajet, barlyǵy jaqsy degen túr tanytyp, bir birimizden jasyrýdyń keregi joq. Eger oqýshylardy qabyldaýǵa daıyn emes mektepter bolsa, jedel túrde bul máseleni sheshý qajet. Qala ákimi men oblys ákiminiń jetekshilik etetin orynbasaryna osy mektepterdi tekserýdi jáne qysqa merzimde usynys berýdi tapsyramyn, -dedi Nurlan Noǵaev. – Barlyq áleýmettik obektiler erekshe baqylaýda bolýy qajet. Barlyq deńgeıdegi ákimder, bilim berý salasynyń qyzmetkerleri mektepterdiń jańa oqý jylyna daıyndyq prosesin ózderi baqylaýǵa mindetti.

Keńeste aǵymdaǵy jyly oqýlyqtarmen jáne oqý-ádistemelik quraldarmen qamtamasyz etýde problema bolmaıtyny aıtyldy. Jergilikti búdjetten 2,5 mlrd teńgeden astam qarajat qajetti oqý materıaldaryn satyp alýǵa bólindi.

-Maǵan ata-analardan shaǵymdar túsýde, olar oqý oryndarynda túrli gadjetterdi, oıyn quraldaryn, qajetsiz oqý quraldaryn, kúmándi qyzmetterdi satýdy toqtatýdy suraıdy. Eger mektep ákimshiligi munyń qajettiligi bar dep eseptese – muny ata-analar jınalystarynda, qamqorlyq keńesterinde usynyńyzdar. Bulardy balalarǵa satýdyń qajeti joq. Mektep – saýda orny emes, oqý ordasy. Bul tájirıbeni toqtatý qajet. Jaýapty tulǵalar muny baqylaýǵa alady, - dep basa aıtty Nurlan Noǵaev.

Óńir basshysy atap ótkendeı, bilim berý salasy qoǵam aldynda úlken jaýapkershilik alady. Oqý ornyn bitirýshi qandaı bilim alsa, bolashaqta ol qoǵam úshin sondaı úles qosary anyq.

-Memleket basshysy qoǵamnyń aldyna úlken maqsattar qoıyp otyr. Olarǵa jetý úshin elimizge kásibı, bilimdi kadrlar qajet. Al bul sizderdiń jumystaryńyz, sizdiń tikeleı mindetińiz. Eger siz bolmasańyz munymen kim aınalysady? Pedagogtardy barlyq ýaqytta da úlgi etedi, sizder bolashaq urpaqty tárbıelep otyrsyzdar. Biz barlyq qajetti jaǵdaılardy jasaımyz, barlyq qajetti qarjyny bólemiz. Sizderdiń mindetterińiz – balalarǵa barlyq jaqsyny berý, - dep sózin qorytyndylady Nurlan Noǵaev.