«Tehnodom» turmystyq jáne elektrondy tehnıka satatyn dúkender jelisiniń ınternet-resýrsynda «úlkenderge arnalǵan taýarlardyń» birqatary aǵymdaǵy jyldyń mamyr aıynan bastap ashyq túrde satylyp kelgen eken. Atalmysh máselege qatysty tutynýshylardan QR Aqparat jáne komýnıkasıalar mınıstrligine aryz-shaǵymdar túsip, nátıjesinde Technodom.kz ınternet resýrsy eki kúnge, 7-8 tamyz kúnderi buǵattalyp, «Tehnodom» kompanıasynyń saıtyna kirýge shekteý qoıylǵan bolatyn. Kompanıanyń negizin qalaýshy Edýard Kım, óz kezeginde, halyqtan mundaı taýarlardy ashyq-jarıa túrde satylǵany úshin keshirim suraýdyń ornyna, Mınıstrliktiń bul is-áreketine ashýlanyp, durys emes dep atady. Onyń eń basty qynjylyp otyrǵan sebebi - Technodom.kz resýrsy buǵattalýynyń saldarynan kompanıa bir kúnde 30 mıllıon shyǵynǵa ushyrapty.

Qamshy.kz aqparat agenttiginiń tilshisi «Tehnodom» kompanıasynyń ókilderi bul jaıtqa qatysty qandaı jaýap aıtady degen saýalmen olarǵa qońyraý shalǵan bolatyn. Ózin kompanıanyń pıar-menedjerimin dep tanystyrǵan Aınur Aralbaeva olardyń tarapynan eshqandaı da zań buzýshylyq bolmaǵanyn aıtyp, ózderin tyıym salynbaǵan taýardy satqanyn aıtyp aqtaldy.

Onyń aıtýynsha, «ıntımdi taýarlar» atalmysh kompanıanyń ınternet-resýrsynda aǵymdaǵy jyldyń mamyr aıynan satyla bastaǵan. Sol ýaqyttan beri «ıntımdi taýarlardan» túsken paıda 235 000 teńge shamasynda eken.

Eńbektegen baladan eńkeıgen qartqa deıin ınternetti paıdalanatyn zamanda uıatsyz taýarlardy ashyq túrde satylymǵa shyǵarǵan elimizdegi alǵashqy qatarda turǵan elektrondy dúkender jelisiniń ókilderi ol taýardy satyp alý úshin tapsyrys berýshi óziniń jas shamasyn saıtta jazyp kórsetýi tıis eken. Anonımdi túrde júzege asyrylatyn bul saýdany júrgizý barysynda monıtordyń ar jaǵynda otyrǵan adam shyn máninde kámeletke tolǵan ba, joq pa – ol anyqtalmaıdy. Taýardy satylymǵa qoıǵandar ol máselege jaýap berýge mindetti emespiz, árbir ata-ana óziniń balasyn baqylaýy tıis» deıdi. Ras-aý! Degenmen, barlyq jaýapkershilikti ata-ananyń moınyna artyp qoıyp, azǵyndyq áreketke jeteleıtin mundaı «ıntımdi taýarlardy» ashyq túrde satylymǵa shyǵaryp, keıinnen «biz eshqandaı da zań talaptaryn buzǵan joqpyz, mundaı taýarlardy satatyn dúken jalǵyz biz emes» deýi qanshalyqty aqylǵa qonymdy is-áreket?!

QR Aqparat jáne komýnıkasıalar mınıstrliginiń baspasóz-qyzmetindegilerdiń aıtýynsha QR Aqparat jáne komýnıkasıalar mınıstrligine technodom.kz ınternet-dúkeniniń veb-saıtynda «eresekterge arnalǵan taýarlar» dep atalatyn birqatar taýarlardyń sýretteri  jáne sıpattamalarmen ashyq túrde jarıalanǵany týraly jáne osyǵan qatysty zań aıasynda shara qoldanýdy suraǵan shaǵymdarǵa baılanysty ınternet-resýrstyń mazmunyna quqyqtyq monıtorıń júrgizildi.

«Saraptama nátıjesinde atalǵan saıtta jynystyq-erotıkalyq sıpattaǵy materıaldardyń jarıalanyp, buqaralyq aqparat quraldary týraly jáne balalardyń densaýlyǵyna jáne damýyna zıan keltiretin aqparattan qorǵaý týraly zańnamalardyń talaptarynyń buzylǵandyǵy rastaldy. Sonymen qatar, 2015 jylǵy 27 naýryzdaǵy № 264 Qazaqstan Respýblıkasy Ulttyq ekonomıka mınıstriniń qaýlysymen bekitilgen İshki saýda erejesiniń 155-tarmaǵyna sáıkes erotıkalyq mazmundaǵy taýarlar arnaıy jerlerde (mamandandyrylǵan dúkender) satylýǵa tıis. Osy oraıda, aǵymdaǵy jyldyń 2 tamyzynda Mınıstrlik technodom.kz ınternet-resýrsyna Qazaqstan Respýblıkasynyń zańnamasyn buzatyn materıaldardy alyp tastaýǵa nemese olardyń qazaqstandyq paıdalanýshylarǵa qoljetimdiligin shekteýge sharalar qabyldaýyn talap etip hat jibergen bolatyn. Technodom.kz ınternet-resýrsy tıisti sharalardy qabyldap, zań talaptaryn oryndamaǵandyqtan, Mınıstrlik aǵymdaǵy jyldyń 7 tamyzynda «Baılanys týraly» Zańnyń 41-1-babynda belgilengen tártipke saı technodom.kz ınternet-resýrsyna kirýdi shekteý týraly baılanys operatorlaryna jáne «Memlekettik tehnıkalyq qyzmet» RMK-ǵa nusqama jiberdi», - delingen habarlamada. 

Belgili bolǵandaı, mınıstrlik tarapynan jasalǵan eskertýlerden keıin kompanıanyń jaýapty mamandary atalmysh taýardy satatyn kontentti alyp tastaǵan.  

«Tehnodom» pıar-menedjeri óz sózinde bolashaqta qaı baǵytta bolmasyn taýarlar jelisin odan saıyn keńeıtetinderin aıtyp ótti.

«Biz eshqandaı da tyıym salynǵan taýardy satylymǵa qoıyp otyrǵan joqpyz. Onyń ústine, bizdiń saıtqa kirgen boıda «ıntımdi qýyrshaqtar» aldaryńyzdan shyǵa kelmeıdi, ol arnaıy bólimde ornalastyrylǵan. Sondyqtan da qandaı da bir zań talaptaryn buzyp otyr degenge kelispeımiz. Bolashaqta turmystyq, elektrondyq nemese basqa da qajettilikterge arnalǵan taýarlar jelisin biz keńeıtpesek, árıne, azaıtpaımyz. Bizdiń tutynýshylarymyz barlyq jaǵynan qamtamasyz etilip, ózderine kerekti kez kelgen taýarǵa qol jetkizgenderin qalaımyz», - deıdi Aınur Aralbaeva.

Al mınıstrlik ókilderi kompanıanyń bul pikirine qatysty qandaı da bir zań talaptary buzylǵan jaǵdaıda olarǵa qajetti shara qoldanylatynyn atap ótti.