Astanada «Qazposhta» AQ-nyń iri jobasy – fýlfılment-ortalyǵy iske qosyldy. Aǵymdaǵy jyldyń 8 aılyq kórsetkishi boıynsha Qazaqstandaǵy elektrondy saýda kólemi 159 mlrd. teńgeni qurap otyr. Al atalǵan ortalyq elimizdegi elektrondy saýdanyń odan ári damýyna septigin tıgizbek. Onyń basty qyzmetine taýarlardy qabyldap, suryptap, saqtap jáne odan ári ıelerine jetkizý syndy qyzmet túrleri jatady. Ortalyq tolyqtaı zamanaýı tehnologıalarmen jabdyqtalyp, turǵyndarǵa sapaly qyzmet usynýǵa negizdelgen.

İs-sharaǵa QR Premer-mınıstriniń orynbasary Asqar Jumaǵalıev, «Qazposhta» AQ Basqarma tóraǵasy Sáken Sársenov, sondaı-aq fýlfılment ortalyǵynyń alǵashqy tutynýshylarynyń biri «KBT Group» kompanıasynyń ókilderi qatysty.

Shara barysynda Asqar Jumaǵalıev «Qazpochta» AQ-nyń kásipkerler úshin ashqan alǵashqy fýlfılment ortalyǵynyń ishki tynys-tirshiligimen tanysty. Ol ortalyq tarapynan aldaǵy ýaqytta el ekonomıkasyn aıtarlyqtaı kóteretin nátıjeli kórsetkishter kútetinin aıtty.

«Sizder bilesizder, shaǵyn jáne orta kásipkerlikti Elbasynyń ózi qoldap otyr. Sonyń negizinde búginde salyq kodeksine ózgerister engizildi. Atalǵan ózgeristerge sáıkes kásipkerlerdiń salyq tóleýi jeńildedi. Onyń elektrondyq saýdaǵa da qatysy bar, sondyqtan úkimet sizderden nátıjeli jumys kútedi. Eń bastysy, el ekonomıkasyn damytýda jańa jumys oryndarynyń ashylýy, bul qýantarlyq jaǵdaı», – dep málimdedi Asqar Qýanyshuly.

Ortalyq kásipkerlerdiń taýardy ıesine jetkizýin jeńildetip qana qoımaı, odan basqa qoımalarmen, baılanys ortalyqtarymen, logıstıka jáne qyzmetkerler quramymen qamtamasyz etý shyǵynyn aıtarlyqtaı azaıtýǵa kómektesedi.

«Internet-saýda mádenıetiniń damýymen qatar, qazaqstandyqtardyń ony jetkizip berýge degen talaby da artty. Qazir biz jetkizý merzimderin qysqartý boıynsha jumystar júrgizip jatyrmyz, halyqaralyq kýrerlik jáne logıstıkalyq kompanıalarmen jáne poshta operatorlarymen yntymaqtastyq ornattyq. Qazirgi kúni jalpy aýdany 3 myń sharshy metrlik qoımada 20 ınternet-dúkenniń 600 myń taýary saqtalǵan. Jyl basynan beri 700 myńnan astam jóneltimder óńdelip, tutynýshylarǵa jetkizildi» – dedi «Qazposhta» AQ basqarma tóraǵasy Sáken Sársenov. 

Jańa ortalyqtyń tutynýshysy «KBT Group» kompanıasynyń dırektory óz kezeginde Asqar Jumaǵalıevke ortalyqtaǵy qyzmetin baıandady.

«Aǵymdaǵy jyldyń qańtar aıynan bastap biz osy ortalyqta qarqyndy jumys jasaýdamyz. Qoıma keremet, júk tasymaldaý zamanaýı tehnologıalardy oryndy paıdalaný arqasynda óte jyldam júrgiziledi. Barlyq júıe avtomattandyrylǵan. Buǵan deıin biz Qazposhtanyń basqa bólimderine baryp, jumys barysy uzaqqa sozylatyn. Al qazir fýlfılment ortalyǵynyń arqasynda másele sheshildi. Elektrondy tapsyrys alamyz, taýardy Qazposhtaǵa tapsyramyz, ári qaraı olar qajetti meken-jaıǵa jiberip, bizge tabys ákeledi» – deıdi Oljas Nuraldınov «KBT Group» dırektory.

«KBT Group» kompanıasy óz jumysyn 5 jyl buryn bastaǵan. Ol kezde jylyna jiberilip otyratyn jóneltilimderdiń sany 15 000 bolǵan. Al qazir mundaı zamanaýı ortalyqtardyń arqasynda bul kórsetkish mıllıonǵa jetken. Kompanıa qazirde Qyrǵyzstan, Armenıa elderine taýar jóneltedi, aldaǵy ýaqytta Reseı jáne Ózbekstan elderine jóneltimder jiberý kózdelip otyr.

«Qazaqstandaǵy elektrondyq saýda naryǵy óte tez damyp keledi. Ázirge elimizde jylyna 30-40% ósetin jalǵyz naryq bolyp otyr. Óıtkeni kóptegen artyqshylyqtar bar: logıstıka jaǵynan alyp qarasaq ta, tólem quraldaryn alsaq ta, tutastaı alǵanda, halyq elektrondy saýdany qoldap, senim artýda» – dep aıtyp ótti Asqarbek Alshanbaev «Qazposhta» AQ elektrondy saýda boıynsha atqarýshy dırektory.

Aıtyp ótý kerek, osyndaı ortalyqtar qurý 2018-2020 jyldarǵa arnalǵan Qazaqstan Respýblıkasynda elektrondyq komersıany damytýdyń jol kartasynda bekitilgen.