T.Júrgenov atyndaǵy Qazaq Ulttyq Óner akademıasynda memleket jáne qoǵam qaıratkeri, bilim men ónerdiń naǵyz janashyry Temirbek Júrgenovtiń týylǵanyna 120 jyl tolýyna arnalǵan Halyqaralyq ǵylymı-praktıkalyq konferensıa bolyp ótti.                                                                               

Jıyn taqyryby: «Qazaqstan men Orta Azıadaǵy bilim berýdi, mádenıetti jáne ónerdi ulttyq sananyń kemeldenýindegi biregeı tájirıbe retinde jańǵyrtý» dep ataldy. Ult qaıratkeri Temirbek Júrgenov qazaq óneri men bilimin damytýǵa úlken úles qosqan birtýar azamattardyń biri. Sharanyń  maqsaty – Júrgenovtiń taǵylymy mol ónegeli ǵumyryn keıingi urpaq ókilderine keńinen nasıhattaý edi.

Halyqtyń ardaqty uly, memleket qaıratkeriniń 120 jyldyq mereıtoıy aıasyndaǵy saltanatty jıynnyń  ashylýymen Akademıa rektory mindetin atqarýshy, profesor Sh.Ámirbekov quttyqtap,  jyly lebizin bildirdi.

Atalǵan konferensıaǵa: Sh.Ýálıhanov atyndaǵy Tarıh jáne etnologıa ınsıtıýty dırektorynyń orynbasary, profesor S.Borbasov, M.Ulýǵbek atyndaǵy Ózbekstan Ulttyq ýnıversıtetiniń profesory Z.Ishanhodjaeva, Reseı-Tájik slaván ýnıversıtetiniń kafedra meńgerýshisi, dosent A.Artyqov, qoǵamdyq qor, úkimettik emes uıymdar jetekshileri, JOO-nyń oqytýshy-professorlary, doktoranttary, Temirbek Qaraulynyń týysqandary, sonymen birge L.Gýmılev atyndaǵy EUÝ Teleradıo jáne qoǵammen baılanys kafedrasynyń dosenti B.Imanǵalıev qatysty.

       İs-shara barysynda arnaıy kórme uıymdastyrylyp, derekti fılm kórsetildi. T.Júrgenovtiń qaıratkerlik, qalamgerlik, azamattyq bolmysy jaıynda sóz boldy. Júrgenovtanýshy-ǵalym B.Imanǵalıev Narkom Júrgenov týraly arnaıy baıandama jasap, qaıratkerdiń respýblıka tarıhynda alar qoǵamdyq-saıası orny, qalamgerlik murasy, jas urpaqqa berer ónegesi jáne tyń usynystaryn jetkizdi. Shyǵyp sóıleýshiler de Aǵartý komısarynyń qıly ǵumyry, atqarǵan qyzmeti týraly estelikter aıtty.

T.Júrgenov atyndaǵy Qoǵamdyq qordyń tóraǵasy Sabı Ansat: «Dara tulǵanyń qaıratkerligin baǵalaýda úsh ólshem bar: – Bıiktik, Tereńdik, Keńdik. Tabıǵı talanttardy izdep tabý, taný, olarǵa jaǵdaı jasap, óner kóginde jarqyraı kórinýlerine, ashtyqtan turalaǵan, qansyraǵan memleketti úsh jylda, ıaǵnı, 1936 jyly Máskeýdegi onkúndikte qazaq ultynyń rýhy bıik, mádenıeti men ádebıetiniń eshbir elden kem emestiginiń kórinis tabýy Júrgenovtiń qaısar qaıratkerligi men orasan zor iskerligi, uıymdastyrýshylyq qabiletiniń aýqymdylyǵy, bir sózben aıtqanda bıiktigi edi. Máskeýde oqyp jatqan qazaq azamattaryna qarjylaı demeýshilik jasap turǵan jáne qazaq, ózbek, tájik azamattaryn bilimderin kóterýge Reseıdiń ortalyq qalalaryna jibergen, olar óz kezeginde irgeli bilim ordalarynan alǵan bilimderimen óz elderiniń mádenıetin, ónerin, ádebıetin kótergen. Bul – Temirbek Júrgenovtiń kóregendiginiń jáne keńdiginiń dáleli», - dep aıryqsha atap ótti baıandamasynda.

Aıta ketý kerek, L.Gýmılev atyndaǵy Eýrazıa ulttyq ýnıversıtetiniń dosenti Imangalıev Baýyrjan Belgili joǵary oqý oryndarynda stýdentter úshin Temirbek Júrgenov atyndaǵy stıpendıa taǵaıyndaý, orta mektep oqýlyqtaryna «tulǵataný» baǵdarlamasy boıynsha Temirbek Júrgenovtiń ómiri men qaıratkerligi jaıly maǵlumat engizý máselelerin usyndy.

Jıynda  ǵalymdar asa iri memleket jáne qoǵam qaıratkeriniń ómiri men elge sińirgen eńbegi jaıly rýhanı-taǵylymy mol oılardy ortaǵa saldy.