28 qarashada Jastar jyly qarsańynda jáne Qazaqstan Respýblıkasy Tuńǵysh Prezıdenti kúnin merekeleý aıasynda ál-Farabı atyndaǵy Qazaq ulttyq ýnıversıtetinde «Men jastarǵa senemin!» VI respýblıkalyq stýdenttik patrıottyq jastar forýmy ótti.

Forým jumysyn ál-Farabı kitaphanasyndaǵy «Uly dala jastary» konferensıasy ashty. Oǵan forýmnyń irikteý kezeńinen ótip elimizdiń 70 aımaqtyq ýnıversıtetinen kelgen 500-den asa stýdent qatysty.

Tuńǵysh Prezıdent kúnine oraı uıymdastyrylatyn forým alty jyl ishinde elimizdiń barlyq jastary úshin mańyzdy shyǵarmashylyq alańǵa aınaldy. Ol Qazaqstan bolashaǵy jolynda jas urpaqtyń patrıottyq sezimin jáne azamattyq jaýapkershiligin arttyrýǵa, jastardy qoǵamdyq sanany jańǵyrtý úderisine tartýǵa baǵyttalǵan. Osy jyly forýmǵa qatysý úshin uıymdastyrý komıtetine Qazaqstannyń barlyq óńirinen 2 myńǵa jýyq stýdent ótinish joldaǵan.

2013 jyldan beri ótkizilip kele jatqan forýmnyń baǵdarlamasy dástúrli túrde tórt baıqaýdan turady: «Elimizdiń ınovasıalyq damýyna qosqan meniń naqty úlesim» atty stýdenttik áleýmettik mańyzy bar ınovasıalyq jobalar; «Men óz elimniń gúldenýi úshin ne isteı alamyn?» atty stýdenttik esseler; «Men jastarǵa senemin!» atty stýdenttik azamattyq-patrıottyq baǵyttaǵy poezıalyq shyǵarmalar; «Máńgilik el muratym!» patrıottyq ánder baıqaýy.

Ó. Joldasbekov atyndaǵy Stýdentter saraıynda ótken úlken gala-forýmda baıqaýlardyń jeńimpazdary men júldegerlerine saltanatty túrde dıplomdar jáne baǵaly syılyqtar tabys etilip, birinshi oryn ıegerine ál-Farabı atyndaǵy QazUÝ-da bir jyl tegin oqý granty berildi.

Qazylar alqasynyń sheshimi boıynsha birinshi oryn eń úzdik ınovasıalyq joba úshin Sh.Esenov atyndaǵy Kaspıı memlekettik tehnologıalar jáne ınjırınıng ýnıversıtetiniń stýdenti Aınur Qýanovaǵa berildi. Poezıa seksıasy boıynsha M. Saparbaev atyndaǵy Ońtústik Qazaqstan gýmanıtarlyq ınstıtýtynyń stýdenti Súndet Seıtov jeńiske jetse, stýdenttik esse baıqaýynda M. Ótemisov atyndaǵy Batys Qazaqstan memlekettik ýnıversıtetinen kelgen Saǵıeva Aıjan marapatqa ıe boldy. Al patrıottyq ánder seksıasy boıynsha bas júldeni Qoja Ahmet Iassaýı atyndaǵy Halyqaralyq qazaq-túrik ýnıversıtetiniń stýdenti Rýslan Tólegen enshiledi.

«Elbasy keler jyldy – jastar jyly dep atady. Memleket stýdentter máselelerine erekshe kóńil bóledi. Bilim alýǵa grant sany kóbeıip, jataqhanalar salynýda, jumysqa ornalastyrý, qaıta daıarlaý baǵdarlamalary qarastyrylǵan. Bizge ǵylymı zertteý jobalarymyzdy kórsetip, shyǵarmashylyǵymyzdy shyńdaýǵa múmkindik bergenderi úshin forým uıymdastyrýshylaryna rahmet aıtamyn. Biz jaqsy tájirıbe jınadyq jáne jańa dostar taptyq. Forým keremet deńgeıde ótti. Erekshe alǵysymdy bizdi qushaq jaıa qarsy alǵan QazUÝ-ǵa jetkizgim keledi. Maǵan kampýs óte unady. Osynda magıstratýraǵa túsip, oqýdy jalǵastyrǵym keledi», - deıdi Aınur Qýanova. Gala-forým qatysýshylaryna QazUÝ shyǵarmashylyq ujymynyń jáne qazaqstandyq tanymal estrada juldyzdarynyń merekelik baǵdarlamasy usynyldy.

Forým ál-Farabı atyndaǵy Qazaq ulttyq ýnıversıteti, «Jandaný álemi» qory jáne «Jas Otan» jastar qanaty, Jazýshylar Odaǵy, Qazaq radıosy birlese uıymdastyrýymen, QR Bilim jáne ǵylym mınıstrligi, Almaty qalasy ákimdiginiń qoldaýymen ótti.