Belgili jýrnalıs Serik Ábikenuly inim óziniń Facebook-tegi paraqshasyna: «Táýelsizdik merekesinde telejobalar azdyǵyna qarnym da, janym da ashyp, telebezer jaryqtyqty shaǵyp tastaı jazdap edim, jańa jylda "jarylqap" jatyr, shúkir. Televızıa salasy halyqtyki emes, telemenedjerlerdiń menshigi ekenin sezdirip, árkim óz efırine minip alyp pálenshe kúnnen beri quttyqtap jatyr, raqmet deıik!», - dep jazypty.

Basqalardy qaıdam, bul avtordyń janaıqaıyn óz basym jaqsy túsinemin. Baıyrǵy telejýrnalıst, «Qazaq televızıasynyń ardageri» retinde Qazaqstandaǵy jalǵyz ulttyq arnadan bastap, Habar, KTK, NTK, Almaty, Astana, 31 t.b. tolyp jatqan bizdegi telearnalarǵa kózim túsken saıyn qanym shapshyp basyma shyǵatyny ótirik emes.

Myna Jańa jyl kúnderi bulardan óz basym ilip alar bir telehabar kórmedim. Qaptaǵan yrbaqaılar men jyrbaqaılar, fonogrammen ótirik án shyrqaǵyshtar, ana aýzy-bastaryn qısańdatqysh Qabatovtar men «Túngi stýdıa» degen habarsymaqtardy júrgizetin saıqymazaqtardan jalǵyz meniń ǵana emes, barsha qazaqtyń júregi aınıtyndaı kúnge jetkeli qashan!

Joǵarydaǵylardyń barlyǵy da osy memleketti qurýshy ngizgi ult – qazaqtardy ǵana qorlaýǵa kiriskendeı áser etedi.  Menińshe, bulardy betimen jibergender – negizinen joǵary jaqtaǵy olardyń «qudaılary» bolsa, al, sol «qudaılardyń» qaramaǵyndaǵy «lápbaı, taqsyrlary!» ekeni aıdan anyq!

Myna Jańa jyl, bizdiń qazaqtardyń kópten saǵyna kútken kúni sıaqty aıdy aspanǵa shyǵara dúrkiretip ótkizerdeı, basqalardy qaıdam, myna telearnalarǵa ne bolǵan sonshalyqty?

Óz basym olardan bir jibi túzý, adamı, tanymdyq, taǵlymdyq telehabar kóre almadym. Sol baıaǵy daraqylana shapqylaǵan ártissymaqtardan aıaq alyp júrý qıyn edi...

Sonda bul beısharalar bizdiń qazaqqa nege sonshalyqty ósh? Olarǵa ne jazdy meniń qaıran qazaǵym?..

Jumash Kókbóri