Tanymal amerıkalyq pedagog, jazýshy, orator-motıvator – Deıl Karnegıdiń adam psıhologıasyn tanyp-bilýge arnalǵan kitaptarynyń mazmuny óz ózektiligin joımaı keledi. Psıhologıalyq kýrstardyń negizin qalaǵan, pikir qaıshylyǵyn durys paıdalanýdyń qaǵıdasy men qyzmetti súıýdiń syrlary jaıly "Tanymal adamdar jaıly jasyryn derekter", "Dos tabýdyń joldary men adamdarǵa áser etý óneri", "Otbasylyq baqyttyń qupıasy" atty eńbekteri búginde mıllıondaǵan tırajben álemniń ártúrli tilderine aýdaryldy. Alaıda baqytty bolý men til tabysýdyń teorıasyn jasaǵan psıhologtyń ólimi týraly jalǵan pikirler óte kóp kezdesedi. Qamshy.kz aqparat agenttigi oqyrman nazaryna Deıl Karnegıdiń ómiri jaıly derekterdi usynady.

Deıl Karnegı et, sabyn, maı satyp ustaz bolǵysy keldi

Deıl Karnegı 1888 jyly 24 qarashada Mıssýrı shtatynda kedeı sharýanyń otbasynda dúnıege kelgen. Ol – Djeıms Vılám Karnagı men Amanda Elızabet Harbısonnyń otbasyndaǵy ekinshi ul. Karnagı otbasy 1904 jyly Mıssýrıden Ýorrensbergke kóship barady. 16 jastaǵy Deıl kúndelikti tańǵy saǵat 04:00-de sıyr saýyp, odan keıingi ýaqytynda Ýorrensberg pedagogıkalyq kolejinen tegin bilim alyp júrgen. 1908 jyly latyn tilinen synaq tapsyrmaǵany úshin kolejden ketedi. Deıl Karnegı sol kezde "pedagog bolmaımyn" dep sheshim qabyldaıdy.  Biraq kolejden keıin shaǵyn qalashyqtaǵy fermerlerge arnap kýrs ótkizedi. Keıinnen sol ýaqyttaǵy tanymal "Armour & Company" kompanıasy úshin et, sabyn, maı sıaqty ónimderdi satýmen aınalysyp, 500 dollar qarjy jınap, óziniń "ustaz bolamyn" degen armanyn oryndaǵysy keledi.

Deıl Karnagı ataqty bolý úshin tegin ózgertken

1922 jyly Deıl óziniń negizgi tegi Karnagıdi Karnegıge aýystyrady. Bul qadamǵa ol ózin jarnamalaý úshin barǵan. Sebebi, sol ýaqytta búkil jurtshylyqqa Endrú Karnegı degen ataqty mıllıonerdiń esimi tanymal bolatyn. Deıl Karnegı óz kitaptarynda da osy mıllıonerdiń ómiri men esimin mysal retinde jıi jazady.

Deıl Karnegı kınoǵa túsken

1947 jyly rejıser Edvard Klaınnyń komedıalyq «Jiggs and Maggie in Society» atty fılminde Deıl Karnegı ózin- ózi somdaıdy.

Karnegıdiń tanymal bolýyna zaıyby tikeleı áser etken

Deıl Karnegı eki ret úılengen. Onyń ekinshi jary – tabysty kásipker bolǵan. Sonyń arqasynda Karnegı kópshilikke tanylady. Áıeli Karnegıge moraldyq turǵydan da, materıaldyq jaǵynan da úlken demeý kórsetken.

Karnegıdiń qaıtys bolýy týraly qaı aqparat shyndyqqa janasady?

Ǵalamtorda Karnegıdiń ólimi týraly ártúrli jalǵan aqparattar júr. Keıbir derekterge súıensek, ol óz-ózine qol jumsaǵan.  Alaıda, mundaı aqparattyń taraýyna Irvıng Tresslerdiń parodıalyq shyǵarmasy sebep bolǵan. Irvıng Tressler Karnegıdiń kitaby týraly jazǵan, shyn máninde, óz-ózine qol jumsaǵan Karnegı emes Tressler bolatyn.

Al Deıl Karnegı ómiriniń sońǵy ýaqytynda "hodjkın" aýrýyna shaldyqqan. Bul aýrýdyń belgileri boıynsha naýqastyń ishki jáne syrtqa qurylysynda ózgeris paıda bolyp, vırýstyq bórtpeler men jótelge ulasady. Sondyqtan, mundaı aýrýǵa shaldyqqan naýqastardy basqa adamdardan oqshaý ustaǵan. Kópshilikke tanylǵan tulǵa úshin ózgelerden tyǵylyp ómir súrý óte qıyn boldy. Syrqatynyń saldarynan kóp qınalǵan Karnegı ózin-ózi atyp jiberedi. Sol ýaqytta bólek turǵan áıeli onyń ólimin kópshilikke jarıa qylmas úshin, jerleý rásimin de tek jaqyndarynyń arasynda ótkizedi.. Polısıanyń esebinde de naqty derekter kórsetilmegen, ólimniń qupıasy tolyq jazylmaǵan. Karnegıdiń áıeli ne úshin mundaı qadamǵa bardy?  Kúıeýiniń ataǵyna nuqsan kelgenin qalamaǵandyqtan ba nemese otbasylyq bıznestiń buzylýynan qoryqty ma, belgisiz...