Álem qazirgi qazaq ádebıetimen tanysady. «Jahandaǵy zamanaýı qazaqstandyq mádenıeti» jobasy aıasynda qazirgi qazaq ádebıeti antologıalaryn BUU-nyń 6 tiline aýdarý jumysy jalǵasýda, dep habarlaıdy Qamshy.kz aqparat agenttigi.

Atalmysh joba aıasynda qazirgi qazaq ádebıetin BUU-nyń 6 tiline aýdarýǵa baılanysty «Ulttyq aýdarma búrosy» ótkizgen kezekti jıyn Almaty qalasynda ótti. Jıynda Ulybrıtanıa, Ispanıa, Reseı, Fransıa jáne Qytaıdan kelgen aýdarmashylar men áriptes uıymdardyń ókilderi jumys barysy jaıly baıandamalar jasap, avtorlarmen pikir bólisti.

Osy jumysqa qatysyp jatqan Ulybrıtanıa, Ispanıa, Fransıa, Reseı jáne Qytaı aýdarmashylary men ádebıetshileri, aýdarma jáne baspa uıymdarynyń ókilderi shyǵarmalary qazirgi qazaq ádebıeti antologıasyna engen avtorlarmen kezdesý úshin Qazaqstanǵa arnaıy saparmen kelgen.

Jıyndy ashqan «Ulttyq aýdarma búrosy» qoǵamdyq qorynyń dırektory Raýan Kenjehanuly óz sózinde bul – jyldar boıy kútken joba ekendigin aıtyp, onyń mańyzdylyǵyna toqtalyp ótti.

«Bul joba QR prezıdenti Nursultan Nazarbaevtyń bastamasymen júzege asyp jatqan «Rýhanı jańǵyrý» baǵdarlamasy baǵyttarynyń biri. Joba táýelsizdik jyldaryndaǵy qazaq ádebıeti men mádenıeti, mýzykasy men beıneleý ónerin, horeografıa, kıno jáne teatr salasyndaǵy jetistikterdi álemge tanytýdy maqsat etedi. Sonyń ishinde, atalǵan joba aıasynda qazirgi qazaq prozasy men poezıa jınaqtaryn 6 tilge aýdarý qolǵa alyndy.

Bul joba barshamyzǵa úlken jaýapkershilik júkteıdi. Qolǵa alynǵan jumystan barynsha sapaly nátıje kórsetip, búkil dúnıe júzi oqyrmandardyń kóńilinen shyǵý úshin álem boıynsha eń bedeldi uıymdar men aýdarmashylardy jumysqa tartqymyz keldi. Búginde bul jumystyń bel ortasyna taıap qaldyq», - dep aıtyp ótti Raýan Kenjehanuly.

Aıta keteıik, aǵylshyn tiline aýdarylǵan shyǵarmalar tek Ulybrıtanıa úshin ǵana emes, aǵylshyn tilinde sóıleıtin AQSH, Avstralıa, Jańa Zelandıa jáne Kanada sekildi elderdiń de oqyrmandaryna usynylatyn bolady.

Eń úlken tárjimashylar tobynyń Kembrıdjden kelgeninen habardar etti. Ispan tilinen tárjimalaıtyn profesor Hoakın Enrıke Torkemada Sanches, fransýz tiline aýdarýmen tanylǵan aqyn Krıstına Zeıtýnán-Beloýs, reseılik jazýshy Maksım Zamshev, poetıkalyq aýdarma salasynyń mamany Aleksandra Sheveleva, jeti til biletin elektrohımıalyq ǵylymdardyń doktory Fılıp Rıgo, Qazaqstan men Reseıge ortaq ádebıetshi, aqyn Vladımır Boıarınov, Qytaı elindegi tanymal qazaq qalamgeri Ákpar Májıt, Qazaqstannyń Ulybrıtanıadaǵy elshiliginde kembırdjdik aýdarmashylarmen tikeleı jumys isteıtin Ásıa Baǵdaýletqyzy aýdarmadaǵy keıbir qatelikter men jumys barysynda týyndaǵan qıyndyqtarǵa toqtalyp ótti.

Qazirgi qazaq ádebıetin 6 tilge aýdarý jumysyna ár elden qandaı uıymdar men aýdarmashylar atsalysatyny jaıynda aıtyp óteıik.

Qazaq ádebıeti jınaqtaryn aǵylshyn tiline aýdarý, basyp shyǵarý jáne taratý jumysy Kembrıdj ýnıversıteti baspasynyń qatysýymen iske asýda. Atalmysh ýnıversıtet baspasy jobaǵa tájirıbeli aýdarmashylar men bedeldi ádebıetshi mamandardy tartqan. Brıtandyq áriptester «mádenı ındýksıa» tájirıbesin qoldanýdy usyndy. Osy sapar barysynda antologıa jobasyna qatysýshy sheteldik mamandar qazaqstandyq avtorlarmen aýdarmaǵa baılanysty týyndaǵan suraqtaryn talqylap qana qoımaı, Qazaqstan mádenıeti, tarıhy jáne qazirgi tynys-tirshiligimen tereń tanysatyn bolady.

Qazirgi qazaq ádebıeti antologıasyn ıspan tilinde sóıletýge Ispanıa mádenıet mınıstrligi qoldaý kórsetip, áıgili «Servantes ınstıtýty» keńesshi retinde qatysady. Jobaǵa Eýrazıa jáne Ortalyq Azıa elderi ádebıetin aýdarýǵa mamandanǵan tájirıbesi mol aýdarmashylar tartylǵan.

Antologıanyń fransýz tilindegi nusqasyn daıyndaýǵa Parıj qalasynyń merıasy jáne Fransıa ulttyq kitap ortalyǵy qatyssa, orys tilinde mátin aýdarmasy men ádebı redaksıasy jumysyn úılestirýge Reseı jazýshylar odaǵynyń máskeýlik uıymy, al jınaqty basyp shyǵarý men taratýǵa M.Lomonosov atyndaǵy Máskeý memlekettik ýnıversıtetiniń baspasy atsalysady.

Qazaq ádebıetiniń jınaqtaryn qytaı tiline aýdarý, basyp shyǵarý jáne taratýmen Qytaı Halyq Respýblıkasynyń «Ulttar baspasy» aınalysady.

Jınaqtardy arab álemine Egıpet Arab Respýblıkasynyń Mádenıet jáne bilim ortalyǵy tanystyratyn bolady.

Mine, osyndaı seriktes-uıymdar aýdarma, basyp shyǵarý, taratý-nasıhattaý jumystaryna 50-den asa maman tartyp, qazirgi tańda aǵylshyn, fransýz, orys jáne ıspan tilderindegi jolma-jol aýdarma jumysy aıaqtaldy. Al qytaı jáne arab tilderindegi jolma-jol aýdarma jumysy áli júrip jatyr.