Eldiń damýyna eleýli úles qosyp júrgen názik jandylar kóp ortamyzda. Olar týraly árkez aıtylyp júr. Solardyń biri «Ádemi-Aı» kompanıasy men «Ádemi-Aı» óner murajaıynyń dırektory, tabysty kásipker, dızaıner, toptamashy, QR Mádenıet qaıratkeri – Bahargúl Tólegenqyzy.  8 naýryz halyqaralyq áıelder merekesi qarsańynda jurt aldynda júrgen ápkemizge habarlasyp áz-kem áńgimelesken edik.

–    Qurmetti Bahargúl Tólegenqyzy, eń áýeli merekeńizben quttyqtaımyz! Merekelik kóńil-kúıińiz qalaı?

–    Óte jaqsy, osy merekeniń aldynda ǵana 1 naýryz kúni «Ult jaýharlary» atty jańa kádesyılardyń tusaý keser kórmesin ótkizdik, olardyń qatarynda áıel zatyna syılar baǵaly syılyqtar  boldy.

–     Siz úshin osy merekeniń mańyzy nede?

–  Er azamattardyń názik jandylarǵa aıryqsha yqylas tanytyp, quttyqtaıtyndyǵynda, syı usynatyndyǵynda. Osy 8 naýryz qarsańynda áıelder qaýymynyń el ómirindegi orny bir aıqyndalyp qalady. Elge ólsheýsiz úles qosqan myqty qyzdardyń aty atalady, gazetter bir sanyn arnap, teledıdarda arnaıy habarlar usynyp jatady. Bizdiń eń qýanyshqy keneletin kúnimiz osy mereke ǵoı dep oılaımyn. 

–    Baıqaısyz ba, mereke qarsańynda bolmasa, názik jandylar týraly az aıtylatyn sıaqty?

–   Týra olaı aıtýǵa bolmas, aıtylyp júr, másele kimderdiń kóp aıtylyp, kimderdiń nazardan tys qalatyndyǵynda. Ádette ánshi, sasatker, kásipker áıelder týraly jıi aıtylady. Al, el ishinde túrli salada jemisti eńbek etip júrgen qyzdarymyz bar, olar týraly az aıtylady. Máselen, óndiris salasynda, ǵylymda, sportta,  ustazdyq jolda, kóp balaly analar týraly eń kóp aıtylatyn oraıly tus osy naýryz bolyp tur. Osy bir apta ýaqytta buryn atyn estimegen talaı qazaqtyń myqty qyzdary týraly bilip jatyrmyz.

–    Búgingi qazaq qyzy qandaı bolý kerek?

–   Eń áýeli ulttyq qundylyqtardy boıyna sińrý kerek, qosymsha búgingi kún talap etip otyǵan máseleler bar, joǵary bilimi, tehnıkany meńgerýi, shet tilin bilýi, t.t  iskerlik qabletterin de jetildirse artyqtyq etpeıdi.

–    Búgingi sińililerińizge kóńilińiz tola ma?

–  Tolady, tolmaıdy dep kesip aıtqanymyz orynyz. Ádepti, ıbaly, uıaty tunyp turǵan, bilimdi, er adamnyń jumysyn atqaryp júrgen  qyzdar kóp, olar turǵanda, qalaı tolmaıdy dep aıtasyń?! Al endi elikteýshiliktiń jeteginde júrgen qyzdardy da kórip júrmiz, ashyq-shashyq kıingen, shashtaryn jaıǵan qyzdarǵa qarap qarnyń ashady árıne. Ol jastardyń barlyǵy temir qazyǵyn taýyp qazaqylyqty boıyna sińirse qazaqtyń qyzdary eshkimnen kem emes.   

–    Genderlik saıasat týraly kózqarasyńyz?

–   Osy máseleni daýǵa aınaldyrýdyń qajeti shamaly, qazaq áıeliniń orny ejelden aıqyn, olardy er adamnyń jumysyn isteýge jappaı úgittep, naýqan jasaýdyń keregi shamaly. Er men áıeldiń quqy teńestirilgen zaman bul. Al, bilimi jetip, qableti bar bolsa túrli jumystarmen áıelder aınalysa bersin, oǵan eshkim tosqaýyl qoıa almaıdy.

–   Názik jandylarǵa degen merekelik tilegińizdi qandaı?

–   Bizdiń analar, arýlar, qyzdar qandaı qurmetke bolsyn laıyq. Barshasyn tól merekesimen quttyqtaımyn. Osy oraıdy paıdalanyp er azamattarǵa da aıtqym keledi, sizder názik jandy jaqyndaryńyzdyń qadirine jetip aıalaı bilińizder! Tek osy mereke qarsańynda emes, barlyq sátte qýanysh syılańyzdar! 

Suhbattasqan Záken Meıram