"Osy qyzyńdy kózime kórsetpe degenmin saǵan. Kúni boıy jumystan sharshap kelseń, úıde júıkeńdi tozdyratyn kórinis. Joǵaltshy, menen aýlaq alyp ket...", dep jumystan kelgen kúıeýi áıeline baqyra ketti.
Kózderin jáýdiretip qorqyp turǵan bes jasar qyz ákesiniń urysynan seskenip, anasynyń arqasyna jasyryndy.
— Bul da qyzyńyz emespe? Jazyǵy ne? Alla qalasa ul perzentimiz de bolyp qalar...
— Óshir únińdi!
Bes qyz týý ǵana keldi qolyńnan, tiliń bolsa eki qarys. Bir ul týyp bergin-de, sodan soń nasıhat aıt...
Áıel úndemeı qoıa saldy. Qyzyn úlken ápkeleriniń janyna jiberip, kúıeýine dastarqan ázirledi.
Túnniń jarymynda kúıeýdi shól qysyp, sý ishýge turady. Sol kezde qyzdarynyń bólmesinen jaryq sónbegenin baıqap, bólmege qaraı júrdi. Jaqyndaǵany sol bólmeniń ishinen jylaǵan daýysty estidi de, esikti ashpastan kilt toqtady.
Bólmeden kenje qyzynyń jylap sóılegen daýysy anyq estilip tur eken. Ákesi zer salyp tyńdaı bastady.
— Qudaıym, nege meni ul etip jaratpadyń? Nege meni ákemniń kúndegi janjalyna, anamnyń kóz-jasyna sebepshi qylyp qoıdyń? Qudaıym, meıli, ákem meni jaqsy kórmesin, biraq men ony jaqsy kóre beremin. Meıli meni uryssyn, tek anamdy jylatpasynshy. Jalǵyz men olardy qınap qoıyppyn.
...Meni ózińe shaqyryp alshy Qudaıym! Senen jalynyp suraımyn Qudaıym...
Ákesi estigenderinen aqyl-esinen adasardaı kúıge endi. Sońǵy bes jyldyq ómiri kóz aldynan tizilip óte bastady.
— Shynymen bul qyz men qajet etpegen qyzba? Osyndaı meıirimdi, sanaly qyz meniń urpaǵym bolǵany ma? Sonda men naǵyz kór-soqyr ekenmin ǵoı, naǵyz kór keýde bolyppyn... - dedi ishteı jylap. Jany alqymyna kelgendeı órekpip, bólmege kirip keldi. Ákesin kórgen qyz qorqyp, jyldam baryp ornyna jatpaqshy boldy. Ákesi qolynan ustap, qorqýdan jaýtańdap turǵan kózderine qaraı otyryp, júzin jýǵan jasyn súrtkilep:
— Tasjúrek ákeńdi keshir qyzym! - dedi yzaly daýyspen.
Qyzy lezde ákesiniń moınynan tars qylyp qushaqtap aldy...
Al kúlimsiregen erinderi: "Raqmet saǵan Qudaıym!", dep sybyrlady...
Kúlshan Nurbekovanyń feısbýk paraqshasynan
Usynǵan: Ásel Bolatqyzy
Pikir qaldyrý