«Shesheń eldiń túkirik-qaqyryǵyn jýady. Nesine máz bolasyń?!» Almaty oblysynda asylyp qaıtys bolǵan 15 jastaǵy oqýshyny úlkender osylaı dep qorlaǵan. 9-synyptyń oqýshysyn tártipke salmaq bolǵan ustaz jas órendi kóptiń kózinshe uryp-soǵyp, tizerletip keshirim suratsa, jábirlenýshi balanyń jaqyny mekteptiń edenin jýatyn anasyna til tıgizip, Aslandy tikeleı qorlaǵan. Ol namystanyp, úıge kele sala asylyp qaldy dep otyr balasynyń ólimine muǵalimdi kinálaǵan qaıǵyly otbasy. Al mektep dırektory bolsa «tergeý toqtamaıynsha, eshteńe túsindire almaımyz» dep at-tondaryn ala qashýda. Talǵar aýdanynda oryn alǵan qaıǵyly jaǵdaıdan soń jańadan ashylyp jatqan aqparattardy Almaty.tv tilshisi tyńdap kelgen dep jazady Qamshy.kz aqparat agenttigi.

Aslannyń 8 naýryzda anasyna tartý retinde bermek bolyp jasatqan sýretterin jerleý kúni synyp jetekshisi jetkizgen. Uldyń kenjesi, úıdiń tórtinshi balasy mektep qabyrǵasynda ózinen tómengi synyptyń eki oqýshysyn dosymen birge bopsalaǵan kórinedi. Al kishkentaı tentekterge ustaz tártip ornatpaq bolǵan.

«Saqınamen urǵan, sodan myna jeri qanaǵan. Sodan keıin ony kórgen qaryndasy da jylaǵan. Meniń qaınym da jylaǵan. Qaınym «Aqbota, jylama» dep aıtyp, ózi de kóz jasyn súrtken. Qasynda turǵan ata-ana «Seniń mamań qaqyryq-túkirik jýyp júr» dep aıtqan», – deıdi marqum A. Ǵazızovtyń jeńgesi Aıkerim Seken.

«Aınalyp kelip meniń balamdy ura bergen ǵoı. Sport zalǵa aparyp taǵy da uryp, sol jerde ursyp, myna balanyń aldyna baryp tizerlep keshirim sura degen. Men ketken soń balama «Shesheń eldiń qaqyryǵyn jýady, sen nesine máz bolasyń?!» degen», – dep kóz jasyn súrtti marqum A. Ǵazızovtyń anasy Baqyt Seısenbınova.

Úıine ashý-yzaǵa býlyǵyp kelgen Aslan aýlasyndaǵy mal qoraǵa tizerleı otyryp, asylyp qalǵan. Ákesi býynǵan jipti qıyp, shópke jatqyzǵanda denesi sýymaǵan ulynyń ana dúnıege áldeqashan júrip ketkenin bir-aq bilipti. Ótpeli kezeńde qorlanyp, ózin ólimge qıǵan órkenniń ómiri alda, armany – 9-synyptan soń mýzyka jaǵyn tereńdetip oqý edi deıdi qaıǵyly ata-ana.

Asylyp qaıtys bolǵan marqum Aslan synyptyń belsendisi bolǵan. Únemi aldyńǵy partada otyrǵan oqýshy án aıtyp, mekteptiń mádenı sharalarynan qalmaıtyn kórinedi. Al qaıǵyly oqıǵa bolatyn kúni otyz jyldan asa bıologıa páninen sabaq bergen muǵalim óziniń 7-synybyndaǵy oqýshylaryn qorǵamaq nıette Aslanǵa kóptiń kózinshe urysqan kórinedi.

450-deı oqýshysy, 55 ustazy bar mekteptiń dırektory «Eseńgirep, esimizdi áli jınaı almaı júrmiz, tergeý toqtamaı túıtkildi túsindire almaımyz» dep otyr. Al zeınet jasyna jaqyndap qalǵan kezinde qaıǵyly jaǵdaıǵa qalaı tap bolǵanyn bilmeı qalǵan 7-synyptyń jetekshisi aýrýhanaǵa jatyp qalǵan.

«Osy jerde birinshi synyptan bastap oqyp kele jatyr edi. Ata-anasy – osy aýyldyń turǵylyqty adamdary. Minezine kelsek, bala birqalypty bolatyn, eshqandaı basbuzarlyǵy joq edi. Mekteptegi belsendi balalardyń biri bolyp, respýblıkalyq, oblystyq deńgeıde án baıqaýlaryna qatysyp júretin. Qazir tergeý amaldary júrip jatyr. Oǵan eshqandaı pikir bildire almaımyn», – dedi Almaty oblysy Talǵar aýdany Týǵanbaı aýylyndaǵy №30 orta mekteptiń dırektory Danıar Amanjolov.  

Uldarynyń ólimine bıologıa pániniń muǵalimin kinálaǵan ata-ananyń aryzy boıynsha ustazdyń ústinen qylmystyq is qozǵalǵan. QR Qylmystyq kodeksiniń 105-baby, ıaǵnı óz-ózin óltirýge  deıin jetkizý boıynsha taǵylǵan aıyp tolyq dáleldense, ǵumyryn aǵartýshylyqqa arnaǵan jan úsh jyldan jeti jylǵa deıin jaza arqalaýy múmkin.

Usynǵan: Gúlim Jaqan