Erekshe daýysymen álemdi tánti etken talantty ánshi Dımash Qudaıbergenniń ata-anasy Qanat pen Svetlana Aıtbaevtar balasynyń gonorary men qarjysynyń qaıda jumsalatyndyǵy jaıynda aıtyp berdi, dep jazady Qamshy.kz aqparat agenttigi Sputniknews.kz saıtynyń deregine súıenip.

Olardyń aıtýynsha, Dımashtyń shyǵarmashylyǵy qarjyny kóp tapsam degen maqsatta emes.

Qanat pen Svetlana Aıtabaevtardyń sózinshe, ánshiniń tapqan qarajaty kóbinde ózimen birge jumys isteıtin komandaǵa tóleýge ketedi eken. Mysaly, Dımash sahnaǵa shyqqanda ony 25 adamnan turatyn orkestr súıemeldeıdi.

«Sondaı-aq, Dımashpen birge sahnaǵa bıshiler de shyǵady. Olardyń aqysyn balamyz óz gonorarynan tóleıdi», - dep aıtty Qanat Aıtbaev.

Onyń aıtýynsha, qazirgi tańda Dımashqa Kanada, Koreıa, Japonıa, Fransıa, Germanıa jáne TMD elderinen usynystar túsip jatyr.

«Dımash aldaǵy ýaqytta Máskeýde jeke konsertin beredi de, birden Germanıaǵa ushyp ketedi. Bir ýaqytta birden gastróldi týr uıymdastyra almaımyz. Bári óz kezegimen bolady», - dep aıtty ánshiniń ákesi.

Belgili bolǵandaı, aǵymdaǵy jyldyń 22 naýryzynda bolatyn Kremldegi konsertine bıletter birden satylyp ketken. Sondyqtan, 23 naýryz kúni de konsert berý josparlandy.

«Uıymdastyrýshylar Dımashqa osyndaı usynys tastady. Eki saǵatqa sozylatyn konsertte jandy daýysta án shyrqaý úlken jetistik bolady. Bul usynysqa Dımash qýana kelisti. Sondyqtan, Alla buıyrtsa, ol Máskeýde eki konsert ótkizedi», - dedi Qanat Aıtbaev.

Ol óz sózinde Dımashtyń aqshany tek óz paıdasy úshin tappaıtynyn aıtyp ótti. Ol úshin shyǵarmashylyq birinshi orynda. «Sondyqtan da, biz aqshaǵa qatty qunyqpaımyz» dep, Dımashtyń jarnamaǵa kóp qarajat jumsamaıtynyn aıtty.

«Dımashtyń ánderi 114 elde tanylǵan, ár elde óziniń fan-klýbtary bar. Kópshiligi Dımash muny tek aqsha úshin isteıdi dep oılady. Biraq, bul – qate pikir. Munyń bári tyńdarmanǵa degen mahabbattan jasalyp jatqan dúnıe», - dep aıtty Qanat Aıtbaev.

Usynǵan: Nazerke Labıhan