«Nur Otan» partıasysezinen keıin biz Senattaǵy Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Abraruly Qul-Muhammedten aldaǵy saılaý týraly pikirin suraǵan edik.

­–Búgin Elbasymyz kópshiliktiń kóńilinde júrgen suraqqa naqty jaýap berdi.

Árıne, Prezıdent – bizdiń Ata zańymyz boıynsha eldegi basty tulǵa, memleket basshysy. Sondyqtan bul orynǵa kandıdatýra usyný barysynda óziniń óte kóp oılanǵandyǵyn, dálirek aıtsaq, keıingi úsh jyl boıy ózi tárbıelegen azamattardy aqyly, parasaty, tájirıbesi jóninen salystyra kelip, Qasym-Jomart Kemeluly Toqaevtyń kandıdatýrasyna toqtalǵandyǵyn zor tebirenispen jetkizdi.

Shyndyǵynda, táýelsizdik jyldary Elbasymyz talaı azamattardy qabilet-qarymyna qaraı ósirdi, tezge salyp, shyńdady. Solardyń ishinen tańdaýy Qasym-Jomart Kemeluly Toqaevqa tústi.

Bizdiń Elbasymyz qandaı sheshimdi bolmasyn asyqpaı, aptyqtaı, uzaq ýaqyt oılanyp baryp qabyldaıtyn tulǵa. Ony búgingi sıeze ózi de ashyq aıtty. Ol bılik aýystyrýdyń tranzıti týraly sheshimge budan úsh jyl buryn kelgen eken.

Men Elbasynyń janynda uzaq jyldar boıy qyzmet istedim. Nursultan Ábishuly táýelsizdik kezeńinde elimizdiń ár óńirinen shyqqan qanshama azamatty túrli jaýapty qyzmetterge taǵaıyndap, synnan ótkizdi. Árıne, olardyń keıbirine «túbi meniń qyzmetimdi osy atqarýy múmkin» degen syn kózben qaraǵany da anyq. Solardyń ishinen Qasym-Jomart Kemelulyn tańdady.

Keńes zamanyndaǵy Qazaqstannyń Syrtqy ister mınıstrligi jıyrma shaqty ǵana qyzmetker isteıtin formaldy mekeme ǵana bolatyn. Al táýelsizdik alǵanda álemniń birde-bir elinde elshiligimiz de bolmady.

Jalpy Sovet zamanynda Máskeý qazaq dıplomattaryna úlken senimsizdikpen qaraıtyn. Eger umytpasam, keńestik 70 jyl ishinde Qazaqstannan Málik Sabyruly Fazylov degen jalǵyz ǵana KSRO elshisi shyqty. Sondyqtan biz táýelsizdik alǵanda Qazaqstannyń syrtqy saıasaty múlde bolǵan joq, al kez kelgen memlekettiń tarıhy seni basqa el «táýelsiz» dep tanyǵanda ǵana bastalady. Qasym-Jomart Kemeluly osyndaı qıyn kezeńde Elbasymyzdyń qamshylar jaǵynan tabylyp, elimizdiń syrtqy saıasatyn qalyptastyrýǵa atsalysty.

Toqaev el damýynyń eń kúrdeli kezeńinde Úkimet basqardy. Men bul kezde Mádenıet, aqparat jáne qoǵamdyq kelisim mınıstri retinde Qasym-Jomart Kemeluly basqarǵan Úkimet quramynda qyzmet istep, ony buryn ózim bile bermeıtin kóptegen jańa qyrynan tanydym.

Toqaevtyń minezi syrttaı jumsaqtaý kóringenimen, ol –aıtqanynan qaıtpaıtyn tabandy tulǵa. Órshelene sóılegen talaı mınıstr men ákimdi lezde sabasyna túsiretin. Ol kezde búgingideı qarjy-qarajattyń as ta tók mol kezi emes, árbir tıyn esepte bolatyn. Soǵan qaramastan jalaqy, zeınetaqy, túrli áleýmettik tólemder ýaqytynda tólenip, búdjet turaqty túrde óse bastady. Toqaevtyń premerligi kezinde sheteldik ınvestorlardyń Qazaqstanǵa degen qyzyǵýshylyǵy men senimi arta bastady. Ol óte tabysty Premer-mınıstr boldy.

Budan keıin ol Memlekettik hatshy ári Syrtqy ister mınıstri qyzmetin qosa qabat atqardy. Jalpy alǵanda, ol –Syrtqy ister mınıstrligin on jyldan astam ýaqyt zor abyroımen atqarǵan álemdegi eń tanymal qazaq dıplomaty. Men de keıin Memlekettik hatshy bolyp, kóptegen sheteldik elshilermen kezdestim. Olardyń bári Qasym-Jomart Kemelulynyń esimin úlken iltıpatpen eske alyp, erekshe qurmet tutatyn.

Álemdik dıplomatıadaǵy zor bedeli Qasym-Jomart Kemelulyn eń iri halyqaralyq uıym – Birikken Ulttar Uıymy Bas hatshysynyń orynbasarlyǵyna alyp keldi. Keıbireýler bul laýazymdy Qazaqstanǵa rotasıa retimen op-ońaı kelgen dep oılaýy múmkin. Olaı emes. Bul orynǵa úlken talas, tartys boldy. Umytpasam, sońǵy týrda Toqaevpen Azıadaǵy eń tanymal memleketterdiń biri Taılandtyń Syrtqy ister mınıstri Satırataı degen azamat básekege tústi. Aqyly, bilimi, tájirıbesi eskerilip, Toqaevtyń mereıi bárinen ústem bolyp, bıik laýazymdy qyzmetke saılandy. Osydan bir aı buryn ol Qazaqstan Prezıdenti bolyp saılanǵanda joldanǵan Birikken Ulttar Uıymynyń Bas hatshysy Pan Gı Mýnnyń quttyqtaýynda Toqaevtyń bul qyzmetine óte joǵary baǵa berilip, túbinde onyń qyzmeti budan da ósetinine kámil sengendigin aıtypty.

Qasym-Jomart Kemeluly eki ret qatarynan respýblıka Senatyn basqardy. Toqaevty, meniń paıymdaýymsha, Elbasy 2013 jyly Senat basqarýǵa shaqyrǵanda-aq ony bolashaqtaǵy Preezıdenttik laýazymǵa basty úmitker retinde qarastyra bastaǵan.

Jalpy Senat tóraǵasy Konstıtýsıa boıynsha eldegi ekinshi laýazym ıesi. Sol sebepti ol keıingi bes jarym jyl boıy únemi Elbasynyń janynda bolyp, onyń kóptegen bastamalaryna aqyl qosty. Onyń árdaıym salmaqty, sabyrly qalpy, álemdik geosaıasat pen jahandyq ekonomıkany jetik biletin parasat-paıymy Elbasynyń Toqaev týraly tańdaýynyń durystyǵyn odan ári ornyqtyra tústi.

Búgingi sıeze Elbasymyz bılik aýystyrý týraly oıǵa osydan úsh jyl buryn kelgenin ashyq aıtty. Elbasymyz osydan tórt jyl buryn óziniń bılik basyna kelgen 25 jyldyǵyna oraı ári Astana kúnimen sáıkes kelgen úlken jıynda basty baıandamany Qasym-Jomart Kemelulyna jasatqan bolatyn. Túsine bilgen adamǵa munyń ózinde kóp ıshara bar edi.

Iá, búgin barlyq túıtkil jazylyp, jurtshylyqty tolǵandyrǵan kóp suraqtarǵa naqty jaýap berildi. Ol – kelesi Prezıdent Qasym-Jomart Kemeluly Toqaev.

Iá, alda áli saılaý bar. Bilek sybanyp shyǵatyn balamaly kandıdattar da shyǵar. Olardyń bárin qurmetteı otyryp, bizdiń dana halqymyz álem tanyǵan parasatty tulǵa, búkil otbasymen tarıhtyń nebir tar jol, taıǵaq keshýlerinen aman ótip, sońyna búkil áýlettiń úmitin arqalaǵan jalǵyz tuıaq qaldyrǵan jaýynger-jazýshynyń uly Qasym-Jomart Kemeluly Toqaevtyń kandıdatýrasyn qoldaıdy dep nyq senemin.

Dál osyndaı syn saǵatta bir jeńnen qol, bir jaǵadan bas shyǵaryp, jumyryqtaı jumylabiletin, berekeli birlikshilbarsha aǵaıyndy dál osy Azamatqa daýys berýge shaqyramyn.