2012  jyldan bastap elimizde eriktilerden quralǵan «28 ilmek» klýby jumys isteıdi. Klýbtyń maqsaty – shala týǵan sábılerdi ómirge beıimdeý úshin toqyma buıymdarmen qamtamasyz etý.

Negizinde 500-2000 gr, ıaǵnı, 2 kg deıingi balalar shala týǵan dep eseptelinedi .Resmı derekterge súıensek, elimizde jyl saıyn jaryqqa keletin sábılerdiń 4-12 paıyzy merziminen buryn dúnıege keledi eken.

Shala týǵan sábıler úshin júnnen daıyndalǵan toqyma buıymdar qoldanylady. Mundaı sábılerdiń tynys alý ortalyǵy durys jumys jasamaıdy, sondyqtan, olar uzaq uıyqtap ketedi. Sol kezde atalmysh buıymdar náresteniń denesine áser etip, qozǵalysqa beıimdep turady.Kóbinese bas kıim, shulyq jáne keýdeshe paıdalanylady eken. Sebebi, jańa týǵan sábıdiń basyndaǵy jylý tez joǵalady jáne aıaǵy men qoldarynyń ushyna kelgende qan aınalymy salqyndap, júrmeı qalady.

17 qarashada álem boıynsha Halyqaralyq shala týǵan balalar kúni atap ótiledi.

Jýrnalıs, bloger, PR mamany, Almaty qalasyndaǵy "28 ilmek" klýbynyń jetekshisi – Ǵazıza Uzaqtan suhbat alǵan edik. Endeshe, marhabat.

– Ǵazıza, atalmysh klýbqa qashannan beri múshesiz? Klýb avtory kim, nege «28 ilmek»? Bul klýbqa qalaı keldińiz?

–  Klýb avtory jýrnalıs, fotograf – Karla Nýr. Ataýyna kelsek, biz shala týǵan sábıge arnalǵan shulyq toqý úshin aldymen 28 ilmek terip alamyz. Barlyǵy 28 ilmekten bastalady. Klýb alǵashqyda óz jumysyn bastaǵan kezde tek shulyq toqyǵan edik. Sol sebepten ataýy 28 ilmek bolyp ketti.

«28 ilmek» klýby jaıly alǵash ret 2012 jyly, ıaǵnı klýb óz isin bastaǵan kezde estidim. Biraq, bul klýb jaıly asa kóp bile bermeıtin edim. Sebebi, klýb qyzmeti, maqsaty, jalpy aqparaty jaıly kóp aıtyla bermeıtin. Ol kezde klýb qyzmeti de basqasha edi. Klýb músheleri az edi, anda-sanda ǵana jınalatyn. Araǵa 1,5 jyl salyp, klýbqa qosyldym. Bala kezden naǵashy apamnyń urshyq ıirip, jún tútip, anamnyń neshe túrli kıimderdi toqıtynyn kórip óskendikten bolar, men de kishkentaı kúnimnen bastap toqımyn. Toqý – óte jaqsy ermek. Súıikti isińmen aınalysyp qana qoımaı, qoǵamǵa paıdańdy tıgizip jatsań, jaqsy emes pe?! Qazir klýb músheleriniń sany artty, aýmaǵy da keńeıdi. Qazaqstannyń 15 qalasynan ózge klýb Qyrǵyzstan, Ózbekistan, Ázerbaıjan, Ýkraına, Latvıa, Reseı sekildi memleketterinde óz qyzmetin atqaryp keledi. 100 paıyz taza jún jibinen toqylǵan buıymdar shala týǵan sábılerge jylýlyq syılaıdy, tezirek shırap, salmaq qosýyna, qan aınalymynyń durys bolýyna yqpal etedi.

–Sizder toqıtyn kıimderdiń «sıqyry» qandaı?

– Buryndary atam qazaq shala týǵan balalardy tymaqqa salyp ósirgen. Biz bolsaq, taza jún toqyma jipterin toqımyz. Effekt birdeı. Jylýlyq syılaıdy, qan aınalym jaqsartady, balanyń tynys alýy men tezirek salmaq qosýyna yqpal etedi

Biz toqyǵan buıymdar shala týylǵan sábıdiń alǵashqy kıimderi desek artyq aıtqanymyz emes. Sebebi, merziminen buryn dúnıe esigin ashqan sábılerge kıim joqtyń qasy. Jańa týǵan sábılerge arnalǵan kıimniń ózi olarǵa úlken. Mysaly, shala týǵan balanyń basy úlken adamnyń judyryǵymen, al aıaǵy barmaǵymen birdeı. Boıy ne bári 35-40 sm bolady.

– Klýb músheleri aı saıyn jınalyp tura ma álde naqty keste, jospar bar ma? Klýbta er adamdar bar ma?

– Ár qalada klýb qyzmet árqalaı júrgiziledi. Keıbir qalalarda klýb músheleri ár apta saıyn jınalsa, keıbireýleri ár aı saıyn nemese ár 2-3 saıyn kezdesedi. Mysaly, men óz tobymdaǵy qyzdarmen 1-2 aı saıyn kezdesemiz. Sebebi, árkimniń óz jumysy, qyzmeti, sharýasy bar degendeı. Biz kóbine bos ýaqytymyzda toqımyz. Toqylǵan buıymdardy jınap, perınataldy ortalyqtarǵa jetkizemiz. Jalpy, klýb músheleriniń qatarynda er adamdar bar. Olardyń sany kóp emes. Astana, Tashkent, Oral qalalarynda bar.

– Turaqty demeýshilerińiz bar ma? Álde demeýshi de, toqymashy da ózderińiz be?

– Toqyma jipterin ár erikti óz qarjysyna satyp alady. Biraq, bizge turaqty túrde qarjylyq kómek kórsetetin jáne toqyma jipterin syıǵa tartatyn jandar bar. Keıde bizdiń ıgi qyzmetimizge rızashylyǵyn bildiretin ata-analar da bar. Balalarynyń fotosýretterin jiberip, bizge toqyma jipterdi syılap jatady.

– Tanymal tulǵalardyń klýb týraly kózqarasy qandaı eken? Sizderden kıim alǵandary boldy ma?

– Bizdiń klýb jaıly kóptegen adamdar biledi. Qoǵamnyń kózqarasy túzý. İzgilikke toly isimizge jaqsy baǵa berip, rızalyǵyn bildirip jatady. Syn pikirler aıtyp, min taǵatyndar da kezdesedi. BAQ ókilderi árdaıym klýb qyzmeti jaıly qalyń kópshilikti aqparattandyryp otyrady. Al tanymal jandarǵa kelsek, olar da klýb jaıly estigen boıda jaqsy pikirlerimen bólisti. Mysaly, biz toqyǵan buıymdardy óz balalaryna Oleg Boreskıı, Tóreǵalı Tóreáli, Toqtar Serik sekildi jandar alǵan. Al demeýshilikke kelsek, bizben birge belgili sport juldyzy, Vankýver qalasynda ótken olımpıadada jeńis tuǵyrynan kóringen bıatlonshy Elena Hrýstaleva shalabaı balalarǵa buıymdardy toqydy. Toqyma jipterin syıǵa tartty.

Árdaıym bizge AQSH-ta turatyn ózimizdiń jerlesimiz belgili mýzykant,  Steinway Artist ataǵyn ıelengen jalǵyz qazaqstandyq pıanıs Qadısha Ońalbaeva kómek kórsetip turady. Ózi muhıttyń arǵy jaǵynda bolsa da toqyma jipterdi joldap, ár kez klýbtyń jańalyqtaryn oqyp, balalardyń halin surap, bizdiń qyzdarǵa ádemi tilekterin aıtyp otyrady.

Tómendegi egizder ánshi Kórkem Seısembek pen jýrnalıs Gúldana Imanbaıdyń qyzdary: Ámına men Fatıma

– Klýbqa múshe bolǵysy keletin eriktilerge naqty erejeler, talaptar bar ma?

– Bizdiń klýbqa kez kelgen jan múshe bola alady. Toqı almasa, úıretemiz. Eń bastysy, merziminen erte týǵan sábılerge kómektesemin degen nıeti bolsa bolǵany.

Júregi keń jandardyń barlyǵyn qatarymyzdan kórgimiz keledi. Jas ereksheligine de mán bermeımiz. Bizdiń qatarymyzda úlken-kishi jandar bar. Barlyǵynyń óz isi, óz qyzmeti bar. Biri stýdent, biri psıholog, biri jeke kásipker, biri zeınetker tss. Mysaly, aramyzda úlken apalarymyz bar. 81 jastaǵy Tamara men 76 jastaǵy Aqyl degen bizge jol kórsetetin, tájirıbesi mol toqymashy apaılarymyz bar. Kishkentaı sábılerge ádemi buıymdardy toqyp qana qoımaı, olar ózge de qyzyqty istermen aınalysady. Bizdiń apalarymyz bos ýaqytynda baqshada gúl ósirýmen aınalyssa, jazda taýda shyǵyp serýendeıdi. Sondyqtan da kez kelgen jandardy óz qatarymyzdan kórýge asyǵamyz.

– Eńbekterińizdi elep, osy jyldar ishinde klýb qandaı da bir marapatqa ıe boldy ma?

– 2017 jyly "28 ilmek" klýbyn "Densaýlyq saqtaý salasyna qoldaý kórsetkeni úshin "Altyn júrek" júldesimen marapattady. Bul da bizdiń jetistigimiz, rıasyz eńbegimizdiń baǵalanǵany dep bilemin.

–Áńgimeńizge kóp rahmet!