"Bul saılaý burynǵy saılaýdan ózgerek bolatyn túri bar. Dodaǵa túrli pikir ıeleriniń at qosýy óz aldyna, osy joly kópshilik óte belsendi, qoǵamdyq pikirtalas tym qyzý. Biri saılaýǵa baıkot jarıalap, endi biri biraýyzdan daýys berýdi usynyp jatqan tusta, «baıaǵy jartas sol jartas» degendeı, «Bizsiz de saılaý óter» dep búk túsip jatyp alǵandar da bar. Degenmen, osy joly «konstıtýsıalyq quqyq», «ádil saılaý», «biz tańdaǵan kandıdat» syndy sózder jıi aıtylyp jatyr. Menińshe, bizdiń el sońǵy jyldar ishinde alǵash ret ashyq saıasat júrgizip otyr. 

Qazir eldiń ár túkpirinde, áleýmettik jelilerde kópshilik saılaý kampanıasy men el Prezıdentine kandıdattardy ashyq talqylaı bastady. Bul – halyqtyń osy saılaýǵa beıjaı qaramaıtynyn, prezıdenttik saılaý mánin túsinetinin ańǵartsa kerek. 

Úgit-nasıhat alańyna shyqqan úmitkerler ártúrli. Qasym-Jomart Toqaev basty kandıdat retinde kampanıanyń kóshin bastap tur. Qalǵandary ózara úzeńgi qaǵysyp keledi. Degenmen, Qasym-Jomart Toqaev qara úzip keletinine birazymyz qazirden bás tigip otyrmyz. Oǵan sebep te joq emes.

Birinshiden, Toqaev halyqaralyq arenada ǵana emes, ishki alańda da zor bedelge ıe. Ekinshiden, Aqorda Toqaev róliniń júıeli túrde tehnologıalyq nyǵaıýyn qamtamasyz etedi. Kandıdattardy usyný kezeńinde aqordalyq saıası tehnologtar Toqaevty elektoraldyq qoldaýdyń bar qýatyn kórsete bildi. 

Taǵy bir mańyzdysy - saılaýǵa Ámirjan Qosanov bastaǵan opozısıalyq kúsh ókilderiniń qatysýy. Á.Qosanov prezıdenttik báıgege pozıtıvti jáne básekelestik reń beredi. Bul - prezıdenttik báıge ereksheliginiń biri. Degenmen, opozısıalyq kúshterdiń ortasynda kandıdatqa degen ortaq pikir qalyptaspaǵan, sondaı-aq opozısıanyń keıbir ókilderi bılikpen emes, túrli saıası kúshterdiń kandıdattarymen kúresýdi qalaıdy.

Oppozıaǵa áli de tájirıbe jınaqtaý jáne jalpy saıası tuǵyrnamany qalyptastyrý úshin kúsh biriktirý qajet. Saıası kúshter aýyzbirshilik tanytýǵa qabiletti bolýy tıis. Osy oraıda Á.Qosanovtyń báıgege qatysýy pozıtıvti qadam. Buny eskergen jón. 

«Aýyl» partıasynyń ókili T.Rahymbekov áleýmettik jelilerdegi eń tanymal tulǵanyń biri. Qoǵamnyń naqty bir bóliginen belsendi qoldaý taýyp otyr. Sondaı-aq, halyqtyń 42 paıyzy aýyldyq jerlerde turatynyn eskersek, saılaýaldy jospary durys qurylsa, «Aýyl» partıasyna naqty qoldaý kórsetý áleýeti ulǵaıa túspek. 

Eldiń saıası tarıhynda tuńǵysh ret el kásipodaqtary Prezıdenttikke kandıdat retinde óz adamyn usyndy. Ol Májilistiń burynǵy depýtaty A.Taspıhov. Kásipodaq músheleri 2 mln. astam adam, ıaǵnı, ol da ońaı emes. Saılaýǵa Á.Qosanovtyń, ulttyq-patrıottyq kúshter ókili S.Túgeldiń, agrarlar tarapynan T.Rahymbekovtyń, kásipodaqtar ókili A.Taspıhovtyń qatysýy 2019 jylǵy saılaýdy erekshelep tur. Tirkeý kezeńinen túıgenimiz - bılik qoǵammen dıalogqa daıyn. Menińshe, bıliktiń ishinde eki top qalyptasýda: lıberaldyq reformalardy jedel ótkizýdi qalaıtyn «reformashylar» jáne qoǵamdyq statýs-kvony qaldyrýdy usynatyn «eskishilder». Áıtkenmen, olar ortaq til tabysady, qazirgi jaǵdaıdy túsinedi. Bir sózben aıtqanda, bılik óziniń tutastyǵy men aýyzbirshiligin kórsetedi.

Qysqasy, elimizde jaqsy ózgeris bar. Halyqta oń ózgeristerge degen úmit paıda boldy. Júıe ózgerip keledi".

Qanaǵat Ábilqaıyrdyń feısbýktegi paraqshasynan

"1999 jyl edi-aý. Saılaýǵa barǵanymda sol jerdegiler gazetke suhbat berýimdi surady. "Qazir tilshi keledi, siz saılaýshy retinde bir-eki suraqtarǵa jaýap berińiz" - dedi. Biraq tilshini kútip otyratyn ýaqytym bolmaı, ketip qaldym. "Jaraıdy, ózimiz birdeńe qylarmyz" - dedi olar.

Tórt-bes kún ótti. 
— Oý, Myqa, gazette júrsiń ǵoı, — dedi bireý. — Saılaý týraly aıtypsyń ǵoı.
— Qandaı gazet? — deımin tań qalyp. 
Úıinen gazetti alyp shyqty. Sóıtsem, men aıtpaǵan pikirler meniń atymnan jazýly tur. "Saılaý óte joǵary deńgeıde ótip jatyr, saılaýshylardyń basshyny tańdaýǵa degen yqylastary zor" deı me... Eń sońynda "Tańerteń erte kelip, prezıdentke birinshi bop daýys berdim" degizip qoıypty. Áıtpese saılaýǵa túste barǵanmyn ǵoı.

— Jýmaısyń ba? — deıdi anaý. Sol joly eshkimdi suhbat bermegenime sendire almadym.

Sodan soń saılaýǵa bir-aq ret bardym. Baryp, eshkimmen de amandaspastan úıge taıǵanmyn. Taǵy gazetke shyǵyp júrsem masqara ǵoı.
9-y kúni de bireýlerge ustalyp qalmasam bolǵany..."

Myqtybek Oraztaıulynyń feısbýktegi paraqshasynan

Usynǵan: Maqpal Sembaı