Ekolog mamandardyń derekterine súıensek, aýadaǵy zıandy qospalardyń ruqsat etilgen sheginen asýy boıynsha Almaty qalasy birinshi orynda tur. «Rahat» kondıterlik ónimder fabrıkasynyń Basqarma tóraǵasy Fedores Konstantın bul jaǵdaıdy ózgertýge bolady dep esepteıdi dep jazady Qamshy.kz aqparat agenttigi. 

2019 jyldyń qańtar aıynan bastap «Rahat» kompanıasy Talǵar gıdroelektrstansıasynan elektr energıasyn satyp alý týraly kelisim-shart jasasyp, qazirgi ýaqytta GES sý energıasyn tutynyp otyrǵan eń iri kompanıalardyń birine aınaldy. Bıylǵy jyldyń tórt aıy ishinde fabrıka 2 257 501 Kvt elektr energıasyn satyp alyp, kásiporyn fabrıkasynyń ishinara EQJK kóshýin qamtamasyz etti.

«Kompanıa úshin qorshaǵan ortanyń tazalyǵyn saqtaý jáne ekologıanyń jaqsarýyna úles qosý óte mańyzdy. Degenmen, kásiporyn ónerkásip obektisi bolǵandyqtan, qorshaǵan ortaǵa las zattardy shyǵarýǵa májbúr. Osy jaýapkershiligimizdi bile tura, biz óz tarapymyzdan birqatar aldyn alý sharalaryn ótkizemiz, sonyń biri - Talǵar GES-ymen seriktes boldyq. Biz energıanyń qaıta jańǵyrtylatyn kózderin tutynýǵa tehnıkalyq turǵydan kóshý úshin 30 mıllıon teńgeden astam qarajat jumsadyq jáne budan keıin de jasyl energetıkaǵa quıylatyn ınvestısıalar kólemin ulǵaıta bermekpiz», - dedi «Rahat-Lotte» AQ basqarma tóraǵasy Konstantın Fedores.

Oǵan qosa, fabrıka osymen birneshe jyl qatarynan óz aýmaǵyndaǵy qaldyqtardy bólip jınap keledi. Bul qaldyqtardy ózge uıymdar qaıta óńdeýge alyp ketedi. Al kompanıa qyzmetkerlerinen qurylǵan eriktiler uıymy jyl saıyn Almaty qalasynda kóshetter egýmen aınalysady. «Rahat» kompanıasynyń shtatyndaǵy ekologtar qyzmeti atmosferalyq aýaǵa zıandy zattardy shyǵarý normatıvterin ustanýdy qatań qadaǵalap otyrady.

EQJK júıeli kóshý jáne tabıǵattyń ekologıalyq bútindiligin saqtap qalý boıynsha ózge sharalar kompanıanyń basty aksıoneri Lotte Confectionery kompanıasynyń da saıasatynyń bir bóligi bolyp tabylady. Koreıalyq konglomerat jergilikti kompanıalarmen birlese otyryp, dúnıe júzinde atmosferaǵa SO2 shyǵarýdy azaıtý jáne óndiristik alańdarda energıa tutynýdy únemdeý boıynsha sharalar ótkizedi.