Óz josparlaryńyzdy qupıa ustaýdyń mańyzy qansha? Bir aı ishinde qalaı roman jazyp shyǵýǵa bolady? Eger ózińdi kún saıyn fotoǵa túsirseń, ómirińde ne ózgeredi?

Bul suraqtarǵa kásipker Derek Sıvers pen Google kompanıasynyń ınjeneri Mett Kats jaýap bergen.

• "Árbir adamda óziniń ómirinde mańyzdy ról oınaıtyn basty maqsattary bar. Bir sekýndqa oılanyńyzdar. Ári qaraı oqýdy jalǵastyrmas buryn sizge ózińizdiń ómirlik maqsatyńyzdy seziný qajet. Elestetińiz! Siz ózińizdiń ómirlik maqsatyńyzdy aıqyndadyńyz jáne ony dál qazir júzege asyrýǵa daıynsyz. Taǵy da elestetińiz! Siz sol aıqyn maqsatyńyzdy búgin bireýge aıtýǵa asyǵasyz. Oılańyz! Ózgelerdiń, bálkim, dostaryńyz ben jaqyndaryńyzdyń qýanyshy, sizdi quttyqtaýy jaǵymdy ǵoı?! Siz osy arqyly óz maqsatyńyzdy ómirińizdiń mańyzdy bólshegi ekenin sezinesiz jáne endi bir qadam jasasańyz barlyǵyna qol jetkizgeli turmyn dep oılaısyz", - deıdi CD Baby atty iri mýzykalyq saıttyń negizin qalaýshy Derek Sıvers.

Ol nege joǵarydaǵy taqyrypqa oraı mundaı sóz aıtty? Múmkindigimizshe taldap kóreıik.

Derek Sıvers joǵaryda aıtqan sózinde maqsatyńyzdy jalpaq jurtqa jaıyp salǵanda adamnyń qandaı áser alatynyn jetkizdi. Biraq osy áser sizge josparyńyzdy iske asyrý barysynda birshama kedergiler keltirmek. Ol qandaı kedergi?

Sizge barlyǵyn qupıa ustaǵan qolaıly bolar edi. Endi aldaǵy ýaqytta sol jaǵymdy áser sizdiń árbir kishkene jetistikterińizge qýana almaıtyn jaǵdaıǵa jetkizedi. Óıtkeni, siz óz josparyńyzdy ózgege aıtý arqyly ózińizdi jetistik shyńyna shyǵyp qoıǵan adam retinde elestetip alasyz.

Eger sizdiń ómirlik maqsatyńyz aıqyn bolsa, onda qazirden bastap qyzmet etkenińiz, naqty qadamdar jasaǵanyńyz jón. Sol baǵytta belgili bir joldy basyp ótip, belgili bir deńgeıdegi jetistikke qol jetkizý qajet. Sol kezde ózińizdiń oıyńyzǵa alǵan jáne sol baǵyt boıynsha isińizde júzege asý úderisi júrip jatqanda ózgege sol týraly syr sherter bolsańyz, bul dúnıeniń mańyzy basqa. Ol kezdegi ózgelerdiń qýanyshy, quttyqtaýy sizdiń psıhologıańyzǵa qatty áser ete qoımaıdy. Nelikten olaı?

Óıtkeni, siz qyzmettiń aýrasyna kirip, ózińizdiń júzege asyp jatqan maqsatyńyzdyń jemisin jeý úshin qyrýar tirlik atqarý qajet ekenin túsinesiz jáne bul úlken jaýapkershilik ekenin ańǵarasyz. Sodan keıin ózgeniń emosıasyna siz salqynqandylyq tanyta alasyz. Mine – qupıanyń kilti.

Mett Kats – Google kompanıasynyń izdeý qyzmetine jaýap beretin ınjenerlerdiń bir. Ol óziniń baıandamalarynda adam óz ómirin qalaı ózgertýge bolatyny týraly aıtady jáne ózi qoldanyp, nátıje shyǵarǵan tájirıbesi týraly aıtady.

Sizdiń boıyńyzǵa sińirgińiz keletin jáne arylǵyńyz keletin qasıetterińiz bar ma? Bul qasıetterdi ıgerý eshqandaı arman emes, tek qana turaqty ári jalqaýlyqqa boı bermeı eńbek etý kerek. Mett Kats 30 kún ishinde kez-kelgen qasıetti ıgere alatyn tájirıbesi týraly sóz etedi. Bul qandaı tájirıbe ekenin bilgińiz kele me?

• "Birneshe jyl buryn maǵan ómir sonshalyqty keremet bolyp kórindi. Sodan keıin men amerıkalyq uly fılosof Morgan Sperloktyń tájirıbelerin qoldana otyryp, bir aıda ózime paıdaly dúnıelermen aınalysýdy jón kórdim. Ideıa óte qarapaıym. Aldymen ózińizdiń ómirińizge ne engizgińiz keletini týraly oılanyńyz. Sosyn sol áreketterdi 30 kún boıy qaıtalap júrińiz", - deıdi alyp kompanıanyń ınjeneri Mett Kats.

Onyń aıtýynsha, 30 kúndik aınalym – barlyq áreketterge boı úıretýge jetkilikti ýaqyt. Mysaly, siz beı-bereket fılmder nemese telebaǵdarlamalar qaraýǵa, shylym shegý men turaqty túrde alkogóldi zattar qoldanýǵa táýeldi bolsańyz, 30 kún boıy qıyndyqpen bul nárselerge jolamaý arqyly ózińizdi ózińiz tárbıelep shyǵasyz.

Mysaly, siz óz densaýlyǵyńyzǵa alańdaıtyn bolsańyz, 30 kún boıy tańerteń júgirý arqyly paıdaly áreketti ádetke aınaldyryp alasyz. Sondaı-aq, artyq salmaqtan arylǵyńyz kelse, kúndelikti qoldanatyn as mázirińizden kalorıalyq mólsheri úlken taǵamdardy alyp tastańyz. 30 kún ishinde óz boıyńyzdan ózgeris baıqaısyz.

Sonymen qatar, tájirıbeni sapaly oryndap, kún saıyn erik-jigerińizdi arttyryp otyrý úshin kúnine bir fotodan jasap otyryńyz. Ózińizdi syrtyńyzdan qaraý arqyly kelesi kúni de úlken ózgeriske jasap kele jatqan qadamyńyzdan jańylmaısyz.

Kett Mats óziniń 30 kúndik tájirıbesiniń nátıjeleri týraly bylaı deıdi:

• "30 kún ishinde men keńse adamynan ózge adamǵa aınala bastadym: kóshede velosıpedpen júretin jigitke, óziniń árbir isinen lázzat ala biletin adamǵa aınaldym. Ótken jyly Afrıkadaǵy eń bıik taýlardyń biri Kılımandjaro shyńyn baǵyndyrdym. 30 kúndik tájirıbeni qoldanbaǵan ýaqyttarda ózgeshelikti munsha izdemeıtin edim. Qazir birsaryndy ómir súrýge múlde qulqym joq. Kún saıyn alabóten dúnıelerdi jasaǵym kelip turady".

Eger saǵan bir dúnıeni jasaý sonshalyqty qıyn bolsa da, ony 30 kún ishinde júzege asyrýǵa ábden bolady. Mysaly, ár jyldyń kúzinde jazýshylar ózderiniń jańa shyǵarmalaryn jazýǵa otyrady. Olar 50 myń sózden joǵary turatyn romandaryn jazý úshin ózderine úlken ýaqyt jumsap jatady. Siz de ózińizdiń shyǵarmashylyǵyńyzdy shyńdap, óz jazýyńyzdy qaldyrǵyńyz keledi ǵoı, ıá?!

Árıne, jazýshylyq barlyǵyna birdeı beriletin talant emes. Degenmen, myńdaǵan danamen baspadan shyǵaryp, sórege samsatyp qoıý maqsatynda emes, ózindik ǵumyrnama retinde roman jazýǵa eshkim qarsy bola qoımas.

50 myń sózden turatyn roman jazýǵa bet burdyńyz delik. 50 myń sózdi 30 kún ishinde bitirý úshin kúnine 1667 sózden jazyp otyrý qajet eken. elektrondy qaǵazdyń standartaryna saı jazsańyz bul sózder sany 4-5 betke erkin sıady. Al oǵan ketetin ýaqyt shamamen 30-45 mınýt ári ketkende bir saǵat. Demek, roman jazý da asa bir qıyn sharýalardyń qataryna jatpaıdy.

Adam ómiri birsaryndylyqty unatpaıdy. Eger óz ómirińizdi ózgertkińiz kelse, búginnen bastap áreket etińiz. Ózińizge qatań talaptar qoıyńyz jáne ony múmkindiginshe buzbaýǵa tyrysyńyz. Sonda ǵana óz qalaǵan mejeńizge jetip, ómirden lázzat ala alasyz.

Avtor: Juldyz Muqanova