Ómirde bári ótedi-ketedi. Qalatyny – ómirlik ónege, óshpes iz, ulaǵatty úlgi. Ónegeli is ómirdiń baıandy bir bolmysy desek te, eldiń esinde qalatyndy ekiniń biri jasaı almaıdy, namysshyl, aqjúrek, azamattyǵy bıik, arly jan ǵana jasaı alady.

Mundaı jan toptyń ishinen emes, kóptiń ishinen shyǵady. Aldyńnan jarylqap aıryqsha kórinip, kóptiń kóńiline uıalaıdy, jamaǵattyń shapaǵatyna bólenedi, júrekterdiń shýaǵyna jylynyp, eldiń aýzynda júretin bolady.

Bizdiń aıtpaǵymyz da sondaı sanattaǵy azamattyń izgilikti bir isi edi.

Ýaqyt ozǵan saıyn alystaǵannyń áser-bolmysy álsin-álsin sáýle shashary bar. Sondaı shýaqty sáýleniń áserimen parasatty istiń ómirlik máni oıǵa oralǵanda bar baıany kóz aldymyzǵa kele qalady. Tálimi de til ushyna úıirile ketedi:

«Tasmaǵambetovtiń júz kitaby!»

Bizge shyny – osy sóz bul kúnde frazeologıalyq tirkeske aınalyp ketken. Til ushynda dáıim úıirilip turady. Endi osy tirkestiń týý tórkinine keleıik.

Bul bir qazaq kitaby men qazaq qalamgerleriniń naryq nópiriniń qyspaǵynda qalyp, daǵdarǵan kezi edi. Baspalardyń basyna óz kúnińdi óziń kór týǵan. Qarjy joq, kitaptardyń shyǵýy kúrt azaıa bastaǵan. Azaıý bylaı tursyn, qalamgerlerdiń qoljazbalary sarǵaıyp jata-jata sartap bolyp, shyǵýy saǵymǵa aınala bastaǵan. Osyndaı almaǵaıyp tusta Jazýshylar odaǵynda Premer-mınıstrdiń orynbasarymen kezdesý qalamger qaýymdy dúr etkizgen. Sodan úlken minberde berilgen ulyq ýáde úmittiń sónbes shyraǵyndaı bop júrgen.

Kóp uzamady. Kútkenimizdiń qońyraýy soǵyldy. Iá, sátinen dep úmittiń úzilmes jibin ustaǵandaı bop úkimiz jelpildesin. Endi aryqaraıǵysyn kúndelikke túsken joldardan bileıik:

«2001 jyl, 3 tamyz.

Saǵat 18.00-de bizdi  baspa dırektorlary – Jarylqasyn Nusqabaev, Áshirbek Kópishev, Ǵabıt Moldamuratov jáne osy joldardyń ıesin úkimettiń vıse-premeri Imanǵalı Nurǵalıuly Tasmaǵambetov qabyldady.

Tanysýdan keıin birden qalamgerlerdiń kitaby, olardyń shyǵý jaıy, taralýy jaıy jóninde áńgime tıegi aǵytyldy. Birden baıqalatyny – sózge usta, máseleniń mán-jaıyn tereń biledi, aldy keń, aıtary aıqyn, oıyńdy kómeıińnen tanyp, kózińnen oqyp otyrǵandaı kórinedi. Óz basym ishteı qazaqtyń ıdeologıasynyń (basyna mundaı azamattyń kelýine qarap) baǵy bar eken dedim.

Bekzattyq ta, biliktilik te mádenıetten týady. Syrt kózdiń sypaıy syny onyń osy bolmysyna aýdy. Adamdy tyńdaı bilý mádenıeti, oıdyń tórkinin tap basýy, jaqsyǵa degen janashyrlyǵy ár sózinen ańǵarylyp tur.

Boıynda bir erik-jiger esedi. Shynaıy peıil, shyraıly nıet, ımanı izetimen sabaqtasqan sózi ortaq áńgimeniń shoǵyn úrleı túsedi.

Búkpesiz áńgimeniń buıdasyn ustaı bilýi de erkin, tolǵaqty máselege túsinistikpen qaraýy da, toqtam sózge túıin jasaýy da erkin. Aıtqandy qabyldaýy qaǵilez, kemel sózi kesimdi.

Azamat ýádesin umytpaǵan eken. Myna qabyldaý sonyń izeti-syndy.

Ýáde – ulyq sóz. Pendeniń pátýasy, ıman parasaty.

Búginde ýáde beretinder kóp, al ýádesinde turmaıtyndar odan da kóp. Ondaılardyń talaıy ortamyzda júr. Shetterinen qaıratker, shetterinen sheshen. Keýdelep júredi, kósemsip sóıleıdi. Ýádeni ýáj kórmeıdi, tórde turyp aıtqanyn tómenge túsken mezette-aq umytady.

Osyndaıda «Sózi men isiniń, ýádesi men oryndaýynyń arasynda shalǵaılyǵy joq, shalaǵaılyǵy da joq azamat ekiniń biri emes, árıne. Ol adal júrektiń belgisi, turaqty qasıeti. Ondaı azamat aıtqanyn oryndamaı  qutylar boıtasa izdemeıdi, ýádesin paryz-qaryzsyz oryndap tynady. Eshkimnen alǵys ta kútpeıdi, eshkim oǵan qaryz da emes. Qaıta alǵys aıta bastasań qysylyp ketedi. İlıas Omarov – osyndaı adal azamat edi» degen birtýar Ǵabeńniń (Músirepov) aqıqattaı ádil sózi eske túsedi.

Ony Ábe (Nurpeıisov) odan ári tereńdete tarqatyp: «Týmysynan qanynda bar ulttyq qasıetti janymen uǵyp, júregimen qabyldaýdyń jóni bólek… İlıas Omarov ta Ónerdi – Ómirge, Ómirdi – Ónerge balaǵan. Bizdiń halyq úshin qaryn toıdyrý maqsat bolsa bolar, biraq murat emes, naǵyz murat – Ónerdiń órkenin ósirip, kósegesin kógertý dep bildi…. Árqashan memlekettik turǵyda jan-jaǵynan mol qamtyp, qapysyz muqıat oılap júretin qaıratker de kúresker azamat, halyq úshin ónerdiń ornyn bárinen de bıik qoıatyn. Bul árbir kókiregi oıaý, kózi ashyq jannyń áldeqandaı túısigi emes, bul ult óneriniń halyq ómirindegi máni men mańyzyn tereń tolǵammen tebirene oılaýdan ǵana týatyn kemel oıly kemeńger azamattyń tirlikte tutynǵan maqsaty edi. Osy maqsattan ol taıǵan joq,» – dep onyń qaıratkerligin tarazylaı tolǵap aıtady.

İlekeniń tolǵamy da búgingi kúnniń sózindeı estiledi. Onyń «Ómirdiń ásemdigi sonda, ol únemi jańaryp, jańǵyrýdy tileıdi, belsendi qımyldy qalaıdy. Bar jańalyqtyń túp atasy-halyq. Jańalyqtyń oty udaıy halyqtyń júreginde tutanady. Sol jańany mezgilinde túsinip, der kezinde oǵan qol arta bilý – basshynyń uly qasıeti, mine osy. Halyq jańalyǵynan nár alǵan basshynyń murtyn balta kespeıdi», – deýi buǵan aıǵaq.

El kózine túskisi kep, jeldeı esip janyǵyp júrgenderge jetege túıe júrer sóz bul.

İlekeńdeı izgi jandarǵa qazirgi zaıyrly zaman da zárý. Ómir zańy – tulpardan tuıaq qalady, jaqsydan joly qalady. Bizdi qabyldap otyrǵan azamat sonyń bir synyǵyndaı bop kórinedi. Qabaǵyńnan tanyp, kóńilińnen shyǵatyn sózi men ýádeli ýájge ıilip turǵan izetti qalpy tek ózine ǵana tán bolmys ekenin baıan etkendeı.

Bardy baǵamdaı otyryp, sózimen baýraı túsedi. Qat-qabat qıynshylyq bolsa da ádebıettiń órisin órkendetý múddesi jolynda maqsattan taımaǵany baıqalady. Shegedeı sózi, sheshimdi uıǵarymy soǵan kýá. Kitap, qalamger, rýhanıat jaıly aqtaryla sóılep, bar oıyn jaıyp saldy.

Aıtqan kesimdi oılary da kesek-kesek:

Ideıasyz ómir bolmaıdy. Maqsatqa jetý úshin de ıdeıa kerek;

Ulttyq ıdeıa degenimiz –táýelsizdik, til, tatýlyq;

Halqymyz kitapty qadirlep ósti. Al ol qadir-qurmettiń basynda qalamgerler tur. Ony biz tereń túsinýimiz kerek;

Úsh oblysqa bútindeı qazaq tiline kóshýge pármen berilip jatyr. Endigisi jalpylama sóz emes naqty iske kóshý;

Qazaq dep qajyrly eńbektiń úlgisin kórsetken uly qaıratker Ózbekáli Jánibekovtiń esimin oqý oryndarynyń birine berý jaıy qolǵa alynýda;

El ekonomıkasy ahýalynyń qudaıǵa shúkirligi… Qarajat tapshylyǵy, ýaqyt syny, onyń jónin aıtý – sizderdiń, jolyn tabý – bizderdiń mindetimiz;

Ádebıeti joǵarynyń – mádenıeti joǵary. Ádebıet aqyl-sananyń azyǵy. Ony oqyrman sol úshin oqıdy;

Jazýshylar odaǵyndaǵy kezdesýge kóp bolsa 50 jazýshynyń kitabyn shyǵarý kerek shyǵar dep barǵam. Al shyn máninde 100-den astam avtor bop shyǵa kelgeni;

Biraq ýádeni bergennen keıin oryndaý murat ekendigi… Ýáde azamat basyna syn ekeni; Adamǵa, elge qyzmettiń bári adaldyqty qajet etetini;

Kitapty shyǵarý – mádenıetimiz úshin, ónerimiz úshin ózekti másele. Órisin keńeıtý de, órkendetý de óz qolymyzda;

Ómir ózgerip jatyr. Biz de ózgerip jatyrmyz. Sol ózgeristiń de baǵyty bolýy kerek;

Basqa adam bolyp ózgermeýimiz kerek, naǵyz qazaq bop ózgerýimiz kerek;

Bir maqsat, «Otyrar» kitaphanasynyń qoryn molaıtýdyń qolǵa alynatyny;

Kitapty qazyna dep qaraý qoǵamdyq sanaǵa baılanysty;

Kóre bilý, tyńdaı bilý paryz. Bizdiń qyzmetimiz halyqtyń yrzalyǵymen baǵalanady;

Qazaq teledıdary, qazaq radıosy kúsheıtilip jatyr. Olardyń úni tilimizdiń tynbaıtyn, talmaıtyn jarshysy bolýy kerek;

«Kúltegin» jyryn mektep oqý baǵdarlamasyna engizý qolǵa alynyp jatqany;

Oqý men tárbıeniń negizgi qaınary oqýlyqtar. M.Gorkııdiń de: «Meniń osy boıymda bir jaqsy qasıet bolsa, sol úshin kórkem ádebıet aldynda qaryzdarmyn» degeniniń shyndyǵyn eske salǵany;

Eń qýanyshtysy, Astana qazaqtarynyń 64 paıyzǵa jetkeni…; Taǵysyn taǵylar…

Suraqtar da boldy, jaýap ta molynan egjeı-tegjeıli tarqatyldy. Biligi mol, kózi qaraqty, kókiregi oıaý, kózqarasy kemel azamattyń, qoǵam jaýapkershiligin arqalaǵan qaıratkerdiń aldynan moıyp shyqpaı toıyp shyqqandaı boldyq…» Kúndelik osylaı aıaqtalypty.

Odan keıingisi de kóńilde saırap tur. Aldymen aıtylary, osy kezdesýden keıin úmit-úkili qýanyshqa, ýáde-qyzý iske aınaldy.

Kóp uzamaı qarajattyń da kózi tabylyp, ýáde berilgen júz kitaptyń tusaýy kesilip baspalarda jatyp qalǵan kitaptardyń joly ashyldy. Jedeǵabyl jaryqqa shyǵa bastady. Júz qalamgerdiń qýanyshy ýádege berik azamattyń atymen, Tasmaǵambetovtiń júz kitaby» ataýyna aınaldy. Dúr silkindirdi, dúıim elge taraldy. Bul – qazaq kitabyn baǵalaı bilip baryn salǵan azamattyń izgilikti iri isin baǵalaý, bul shabyt ıeleriniń shynaıy yqylasy edi.

Júz kitap avtorlary qazaqtyń belgili qalamgerlerinen bastap talantty jas býynyn da qamtydy. Olar: O.Asqar, J.Ábdirash, Ǵ.Jandybaev, T.Nurmaǵambetov, B.Momyshuly, Z.Serikqalıev, Ǵ.Qulahmetov, S.Imanasov, A.Egeýbaı, M.Baıǵutov, D.Qanatbaev, A.Júnisov, N.Bádiǵul, Á.Nábıev, T.Mombekuly, S.Muhtaruly, A.Tolǵanbaev, R.Toqtarov, Ǵ.Qaıyrbekov, T.Orazbaıqyzy, Ú.Ýaıdın, M.Qanazov, Ǵ.Jaılybaev, B.Jaqypov, Q.Begmanov, J.Ahmadı, D.Ramazan, E.Dombaev, M.Eslamǵalıuly, Q.Túmenbaev, R.Nıazbek, Á.Tabyldıev, A.Sopybek, Sh.Kúmisbaıuly, B.Serikbaıuly, Q.Ábil, E.Jappasuly, S.Ábilqasymuly, A.Ibraev,T. Narmanov, N.Berdaly, E.Alashtýǵan, K.Qamzın, S.Qamshyger, B.Qalıolla, G.Ibasheva, A.Isadil, R.Esdáýlet. R.Sabıtova, Ǵ.Salyqbaeva, Han De En, J.Áskerbekqyzy, B.Babajanuly, B.Bedelhanuly, D.Berikqajyuly, A.Kemelbaeva, M.Ershýtegi, A.Myrzabekov, T.Tolqynqyzy, J.Sársek, B.Úsenov, A.Shaıahmet, A.Altaı, Á.Aımaq, V.Antonov, T.Álimbekuly, Á.Balqybek, Á.Bópejanova, E.Jaqypbekov, Sh.Jubatova, Q.Jumahanuly, T.Ryskeldıev, Q.Ilıasov, J.Ábdikárimov, T.Jandáýlet, Q.Jylqyshıev, M.Zulpyqarov, H.Ilahunova, Á.Salyqbaev, R.Seıilhanova, A.Ómirbek, Á.Dastanuly, Q.Kúzembaev, Q.Qanapıauly, Á.Narymbetov, A.Sergeev, S.Óteǵalıeva, K.Júnis, T.Sarybaıuly, G.Shoıbekova, T.I.Sýltanov, V.P.Iýdın, E.Týrsýnov, «Ádil sultan» epıkalyq jyry», A.K.Kýshkýmbaev.

Bulardy Qazaqstan Respýblıkasy táýelsizdiginiń 10 jyldyǵyna arnalǵan «Otyrar kitaphanasy» serıasy boıynsha «Jazýshy», «Ana tili», «Óner», «Bilim», «Elorda», «Ólke», «Sózdik-slovar», «Folıant», «Daık-Press» baspalary shyǵarǵan edi.

Qazaqta: «Asharshylyqta jegen quıqanyń dámi ketpeıdi» degen bar emes pe. Naryqtyń qıyn kezeńinde yqylas qoıyp, qol sozyp jasalǵan qamqorlyqtyń jaqsylyǵy endi umytylar ma. Bataly is, batyl qadam jasaǵan Imanǵalı Tasmaǵambetov qandaı qurmet, qandaı alǵysqa da laıyq emes pe edi.

Kóptiń baǵasy-kóptiń yqylasy. Zıaly qaýym artyq demeı kem demeı ádilin aıtty. Imanǵalı Nurǵalıulyn qazaq ıdeologıasyn basqarǵan birtýar bozymdar, bar baılyǵym jerim-bar eńbegim elim dep ótken İlıas Omarov, Ózbekáli Jánibekovterdiń qataryna qosty. Prezıdentimizdiń kemeńger saıasatyn shań juqtyrmaı júzege asyryp kele jatqan azamat dep tanydy. Prezıdenttiń jaýapty mindetterin minsiz atqarýdaǵy aıryqsha iskerligin baǵalady.

Biz de kóńil tolǵan sezimmen tolǵaı otyryp, tánti bolamyz. Prezıdentimiz Nursultan Ábishulynyń: «Atyraý oblysynyń ákimi retinde, Úkimet basshysy retinde jáne Prezıdent apparatynyń jetekshisi retinde ózin bilikti uıymdastyrýshy, óte aýqymdy ári jaýapty mindetterdi sheshýge qabiletti ekenin kórsetti. Ol óz aınalasyna jurtshylyqty toptastyra alatyn tájirıbeli, senimdi, ar-uıaty taza adam», – degen sózin eske alamyz.

Biz syrt kóz – kóp kózbiz. Halyqtyń nazarynda bári. Ol jaqsyny kóre de biledi, jamandy sózge ile de biledi. Bul turǵydan kelgende Imanǵalı Nurǵalıuly dáıim birden aýyzǵa alynady, mádenıetti ortanyń basty keıipkerine aınalady. Onyń kóp qyry kópke málim, aldymen barǵan jerinde ózine tán iskerlik stılin kórsete biletindigi, talǵampazdyq pen talapshyl qasıetinen aınymaıtyny, naqtylyqty ustanatyny, uıymdastyrýshylyq ımıji, rýhanıat pen mádenıet degende barynsha janyn salatyny, jas daryndardyń, óner jolyn tańdaǵandardyń kóbine qamqorlyq jasaıtyny, kishige – kisi bolyp, úlkenge – kishi bolyp zıalylardyń talaıyna ónegeli órelik tanytqany, belgili azamattardyń aldyna barǵandaǵy sharýasyn sózbuıdasyz sheship bergeni aıtylyp júr, áli aıtyla da bererine jazsyn deıik.

Qolynan kelip tursa da qaıyrylmaıtyndar, jolynan shyǵyp tursa da burylmaıtyndar, jattandy jaıdaq sózderinen jalyqpaıtyndar, qulqynynyń qamynan basqa eshteńeni kórmeıtinder, bardy joq deýden jańylmaıtyndar, qara basyn kúıttegender men eshkimdi elemeıtin, eshteńeni estimeıtinder eske túsedi. Qoǵamdy keýlep bara jatqan salqyndyq sekem aldyrady. Jaqsylyqtyń aty emes, jamandyqtyń daqpyrty jıi shyǵatyny tiksintedi. Barmaq basyndaı bal arasy da jaqsy gúlderdi izdep tynym tappaıdy, adamdar nege jaqsylyqty izdep taýyp, qýanyp jatpaıdy deısiń. Halyq quddy barometr ǵoı. Bir kúni aty málim bir sheneýnik jaıly orynǵa jaıǵasqan. «Qoı, – dedi tanysym, – budan qaıyr bolmaıdy». «Nege?» deıim baıaǵy. «Osyǵan deıin bir jaqsylyq jasaǵanyn kórmedik» deıdi. Taǵy birde tanymal azamat jańa orynǵa bardy. «O, mine, munysy durys boldy» dep kádimgideı qýandy. Sóıtsem, ol buryn anadaı is jasaǵan, mynandaı batyldyq tanytqan, kóp jaqsylyqtar jasaǵan dep saırap otyr. Aıtqandaryn ózim de moıyndap úlgerdim. Ondaı jandar eldiń osyndaı baǵasyn rýhymen ishteı sezinip te júretin shyǵar bálkim.

Shyny kerek, ómirdiń sala-salasynda talaı atpal azamattar otyr emes pe? Olardyń da aldyna barýshylar, ótinishin aıtýshylar, máselesin jetkizýshiler az bolmasyna kúmán joq. Biraq biz túsinistikpen qabyldap, kóptiń yrzashylyǵyna bólenip, oıpyr-aı, pálenshe er eken, eńsesi túsip barǵandy baısal etip jiberipti, qınalysta júrgendi qaısar etip qaıtarypty dep jatsa jalpaq elge jaıylmaı ma? Elin súıgen azamattar júrgen jerinde atyn adal júrek, aıqyn isimen shyǵarmaı ma? Halqyńa jasaǵanyń qaıyrylyp kelip mereıińdi asyrmaı ma degen saýaldyń oıanýy da oryndy. Bireýge bireý uqsamaıdy, biraq bireýden bireý úlgi alatyny zańdylyq. Sol úlgi alatyn bireý de kóp bolsyn dep tileıik.

Mádenıet pen Ádebıettiń ómirdegi orny bólek, onyń syr-sıpaty keń aýqymdy. Ony túısinip túsiný úshin adamnyń óziniń mádenıeti joǵary bolýy kerek. Ony bar qyrynan tereń túsine bilýi kerek. Ol da az, adam ómirine jaryq túsiretin, oıyn oıatatyn mádenı izgilikti júregimen bilýi lázim.

«Jańasha oılamaı, mádenıetke etene jaqyn bolmaı máselelerdi túbegeıli sheshý múmkin emes… Keıbir basshylar mádenıet degendi ústirt túsinip, ony ádebıet pen ónerge ǵana qatysty sala dep uǵyp, kınoteatrlar men konsert zaldarynyń, kitaphanalardyń júıesin damytýmen ǵana shekteledi. Mádenıet degenimiz memlekettik qyzmettiń bar salasyn boılap, tamyr jaıyp jatýy shart ekenin túsinýge kóbiniń mádenıeti jetpeıdi. Mádenıet memlekettik apparattyń búkil býynynan kórinip turýǵa tıis», – dep tolǵaǵan İlekeńniń (Omarovtyń) kóripkel sózi-aı, qaıran, deısiń osyndaıda.

Kezinde Tahaýı Ahtanovtyń, Ábdijámil Nurpeıisovtiń, Zeınolla Qabdolovtyń, Safýan Shaımerdenovtiń, Ánýar Álimjanovtyń, Jaısańbek Moldaǵalıevtiń shyǵarmalaryna jyly lebiz aıtyp, talanttardy jazbaı tanyp, jiti nazaryna alyp qamqorlyq jasaǵanyn estýshi edik, Imanǵalı Nurǵalıulynyń júz kitapqa janashyrlyǵy da sol ispetti, izgiligi eren óreli ónege der edik. Bul jaqsy qasıettiń, minsiz mádenıettiń úlgisi.

Jaqsy qasıet – adamdy ortaǵa alyp shyǵady. Órkendi orta ony kóre bilip, qadirin tanı alsa – qup. Jarylqaı kórinetin jaqsy qasıet – tekten týady. Rýhanı sanadan jetiledi. Jaqsylyqtar zakazben jasalmaıdy, deıtinimiz sodan. Onyń bastaýlary tereńde jatady, berekesi betke shyǵady, kórkemi kópke tanylady. Ony kórmeý kúpirlik, aıtpaý ábestik bolady. Jaqsy qasıet – jan azyǵy, jaqsylyqtar onyń jaryǵy. Jaryqtyń sáýlesi jan bitkenniń qalaýy, órkendi ómirdiń alaýy. Ómir ortaq, biraq adamdary ala-qula. Nıet pen pıǵyl tájike. Sodan da bolar, jaqsylyqty da elegisi kelmeıtinder bar, jelsózge jeligetinder de jetedi, umyttyryp baǵatyndar da bolady, adalyn aıtqandy jaǵympaz kóretinder de tabylady. Mundaıǵa jol bersek oıyńdy zil basady, kóńilińdi kir basar edi. Sonyń bárine shydas beretini – jaqsylyqtyń shyndyq bop shyǵa keletini, jaqsylyq ıesiniń dýaly aýzyna iligetini.Talaıǵa tanymal mundaı taǵdyr ıesi týrasyn aıtsaq – Tasmaǵambetov der edik.

Bir ǵajaby, atqarylǵan alýan-alýan isterdiń, júzege asqan ıdeıalardyń, shıesi tarqatylǵan sheshimderdiń, baıandy bolǵan bastamalardyń, dershaqty demeýshilikterdiń qaısybir ókinishterdiń, tipti adamı armandardyń arjaǵynda Tasmaǵambetovtiń tulǵasy kórinedi de turady. Shyndyǵy da sol, estigeniń elden shyqsa, bilgeniń tilden shyqsa, kórgeniń kóńilden shyqsa shyndyǵyna ılanbasyńa lajyń qaısy.

Ýaqyt syny ońaı emes. Kerektini kemesine alady, kereksizdi jaǵada qaldyrady. Adamǵa tán maqtaý sózdiń máni men jóni de osy taqylettes. Maqtaý sózge marqaımaıtyn jan kemde kem. Úıip-tógip maqtalynyp, qyzyl sózben baptalyp jatatyndardy qansha jerden aıaǵyn jerge tıgizbeı jelpildetseń de ony jaqyn-juraǵaty bilgenmen jalpaq el bilmeýi yqtımal.

Maqtaý sóz de kıeli. Kim kóringenge janaspaıdy, kez kelgenge jaraspaıdy. Óziniń adamyn izdep tabady, kisisine qonady. Osy rette adaspaı taýyp jatatyn jan bolsa, sonyń biregeıi taǵy da Tasmaǵambetov.

Bizdiń túıgenimiz osy. Al kózimizdiń kórgeni – onyń jadaý kezde jasaǵan júz kitapqa janashyrlyǵy. Qazaq qalamgerlerine, qazaq kitabyna bergen ýádesin ulyqtaı bilgen, el múddesin bárinen bıik qoıatyn Imanǵalı Nurǵalıulynyń bul janashyrlyǵy jaıdan-jaı emes, tabıǵatynan sińisti bekzat bolmysynyń márttiginen bolsa kerek.

Jadymyzdaǵy jańǵyryq osylaı dep oı túıedi, aýyzǵa sóz salady.

Al qalamgerler bolsa onyń sózi men isine myǵym azamattyǵyna tánti, áli kúnge aýyzdarynan tastamaıdy.

***

 Al bizdiń bir túıgenimiz:

Ol – ózin moıyndatqan, ózi moıymaıtyn MÁRT.

Jaqaý Daýrenbekov, “Ana tili”  baspasynyń dırektory

"Túrkistan"