Qazaqstannyń «Aq jol» Demokratıalyq Partıasy Mańǵystaý oblystyq fılıaly janyndaǵy «Aq jol-jastar» jastar qanatynyń jastary, «Jastar jyly» men «Rýhanı jańǵyrý» aıasynda, Nur-Sultan qalasy men Ereımentaý aýdanynda birneshe shara ótkizdi dep jazady Qamshy.kz aqparat agenttigi. 

Aldymen jastar,  Alash ıdeıalary men muratyn kózdegen, aǵartýshylyq isin qolǵa alyp, bastaryn qaterge tikken jáne batyr babalarynyń salǵan sara jolynan aınymaǵan, sol úshin aýyzben aıtyp jetkize almaıtyn aýyr jazalardy bastan keshken jastardyń qaısarlyǵy men esimderin umyttyrmaı, jasóspirimderge nasıhattaý maqsatynda, Úmbeteı jyraý atyndaǵy Ereımentaý aýdandyq mádenıet úıinde «Qyrshyn» atty tarıhı dramalyq qoıylymyn sahnalady.

«Ul bop týdym, Er bop ólsem qurbany bop elimniń», - degen jas Alash qurbandarynyń rýhyna arnalǵan shyǵarma avtory dramatýrg, ustaz Óten Ahmet, spektákldiń rejıseri Ǵazıza Baqtıarqyzy.

Spektaklge, ǵalym, memleket jáne qoǵam qaıratkeri. QR Joǵarǵy mektebi Ǵylymı Akademıasynyń Akademıgi, Pedagogıka ǵylymdarynyń kandıdaty, Tarıh ǵylymdarynyń doktory, profesor, «Ardagerler uıymy» Respýblıkalyq qoǵamdyq birlestigi ortalyǵy tóraǵasynyń birinshi orynbasary Ómirzaq Ozǵanbaıuly, Dramatýrg, jazýshy shyǵarma avtory Óten Ahmet, «Aq jol» QDP tóraǵasy Perýashev Azat Turlybekuly, aqyn, Partıa tóraǵasynyń orynbasary, Ulttyq keńestiń múshesi Qazybek Isa, Aqtóbe oblysy qoǵamdyq keńes tóraǵasy Baımaǵambetov Baǵlan Áýelbaıuly, Álıhantanýshy-ǵalym, halyqaralyq jýrnalıs Sultanhan Aqqululy, Ereımentaý aýdanynyń orynbasary Áldibekov Narıman Qazbekuly, Aýdandyq Mádenıet bóliminiń basshysy Jylqybaev Saılaý Qabykenuly, Perýash Kárimuly atyndaǵy orta mektep ujymy jáne Ereımentaý aýdanynyń turǵyndary qatysty.  

Eldiń qamyn oılap, jastarǵa bilimniń shamshyraǵyn mazdatyp jaqqan Alash arystary Mirjaqyp Dýlatuly, Maǵjan Jumabaı, Sultanamahmut Toraıǵyrulynyń jalyn shashqan ýytty óleńderi, taǵylymdy sózderi sol kezdegi jastardy jaqsy-jamandy ajyrata bilýge qalaı úıretse, izgilikke qalaı tárbıelese, búgingi jastar úshin de sondaı tereń máni bar.  

Qýǵyndaý men jalǵan jala, jaǵympazdyq pen asyra silteýshilik kópshilik kózine jas aldyryp, kóńilin bosatpaı qoımady.

Bir adamnyń, bir otbasynyń basyndaǵy qasiret arqyly HH ǵasyrdaǵy qazaq eli tarıhyndaǵy jeke adamdardyń taǵdyrlary tálkek etilgen, taptap janshylǵan qaraly kezeńi jáne ulttyq rýhtyń nárin, ar-namystyń azyǵyn bıik qoıǵan elim dep eńiregen bozdaqtardyń jan aıqaıy jan-jaqty kórinisti kórsetti.

Bul tarıhı dramany jastar óziniń qyzyǵýshylyǵymen, áýesqoılyǵymen jáne tabıǵı daryndylyǵymen somdasa, kelgen kórermen bir demmen qarap, tarıhpen sýsyndady.

Spektákl sońynda Ereımentaý aýdany ákiminiń orynbasary Áldibekov Narıman Qazbekuly, «Aq jol-jastar» jastar qanatynyń ónerpazdaryn qoıylymnyń sátti ótýimen quttyqtap, «Alǵys hat» tabystady.

Sondaı-aq, Aqtóbe oblysy qoǵamdyq keńes tóraǵasy Baımaǵambetov Baǵlan Áýelbaıuly, shyǵarma avtory Óten Ahmetke «Qabaq ata» medalin tabystady.