Aqtaý qalasynda ótip jatqan Kaspıı mańy memleketteriniń 1-shi pánaralyq endohırýrgıalyq Kongresi aıasynda Fransıa, Reseı, Ýkraına jáne Qazaqstannyń onkolog jáne gınekolog dárigerleri ǵylymı – praktıkalyq sesıa barysynda ózara pikir almasyp, sheberlik-klasyn ótkizip, birneshe otany sátti bastap ketti.

Atap aıtqanda, jatyr moıyny obyry hırýrgıasyndaǵy laparoskopıanyń múmkindikteri men shekteýleri, onkogınekologıadaǵy ınovasıalar taqyrybynda sóz qozǵady. Al operaıalardy translásıalaý kezinde 3D «Jatyr moıyny obyry. Vertgeım operasıasy» jáne «Retroservıkaldy endometrıoz – ishek kesý» sátti ótti.

Ýkraındyq joǵary sanattaǵy dáriger, hırýrg Sergeı Baıdo analyq bezi obyrynyń taralǵan túri kezindegi laparoskopıalyq tolyq birinshi sıtoredýksıanyń dúnıejúzindegi alǵashqy tájirıbesimen bólisti. Al Reseıdiń Sankt-Peterbor shaharynan kelgen medısına ǵylymdarynyń kandıdaty Aleksandr Basos  elektrohırýrgıanyń fızıkalyq negizderi týraly aıtyp berdi. «Obyr endometrıa ICG» jáne «Paraaortaly, jambas lımfodısseksıa» atty otalar júrgizildi. Sondaı-aq, reprodýktıvtik jastaǵy áıelderde jatyr moıyny patologıasyn emdeýdiń qazirgi zamanǵy ádisteri men bastaýysh endoskopısttiń daǵdylaryn damytýdaǵy Wetlab róli jaıly aıtyldy.

Sonymen qatar, búgin gısteroskopıa mektebi uıymdastyryldy. Onyń aıasynda Mańǵystaý oblystyq perınataldyq ortalyǵy bazasynda, óńirdegi gınekologıalyq naýqastarǵa medısınalyq kómek sapasyn jaqsartý jáne akýsher-gınekologtardyń biliktiligin arttyrý maqsatynda «Operatıvti gısteroskopıa» taqyrybynda bilim jetildirýdiń sıkly ótti.

Oqýǵa oblystaǵy memlekettik jáne jeke klınıkalaryndaǵy akýsher-gınekolog jáne hırýrg mamandar belsendi qatysty. Dáris berýshi lektor - N.I.Pırogov atyndaǵy Reseı memlekettik medısına ýnıversıtetiniń profesory, medısına ǵylymynyń doktory Laýra Kappýsheva boldy. Leksıa barysynda jatyr qýysy qabyrǵalaryn gısteroskopıa tásili arqyly tekserý, jatyrishilik patalogıalardy anyqtaý, tinder bıopsıasyn alý, obyr satysyn anyqtap, emdeý tásilin tańdaý jáne t.b suraqtar qamtylǵan.

Alda reseılik mamandardyń qatysýymen gınekologıalyq naýqastardy rezektoskopıa, analyq bezdiń qatersiz óspeleri, jeńil endoskopıalyq operasıalardyń prınsıpteri talqylanyp, kúrdeli mıomany qalaı tez emdeýge bolatyny, kúrdeli jaǵdaılardy taldap, beıneprezentasıa jasalmaq. Al ázirbaıjannan kelgen dárigerler laparoskopıalyq gıster – jáne mıomektomıa kezinde túıinder men jatyr kóleminiń úlkendiginiń mańyzdylyǵyn túsindirmek.

Aqtaýlyq dárigerler de qalys qalǵysy joq. Sýbmýkozdy mıomatozdy túıinderdiń qaýipsiz jáne tıimdi gısteroskopıalyq rezeksıasyn jasaý prınsıpteri jóninde óz tájirıbesimen bólisýdi kózdeıdi. Fransıadan kelgen profesor Revaz Bochorıshvılı aýyr endometrıozdy emdeýdiń zamanaýı tásilderin keıinen túsindirýdi kózdeıdi.

Sondaı-aq, jatyr moınaǵyna bala bitý kezindegi aǵzalardy saqtap qalý tehnologıalary, polıkıstozdy analyq bezderiniń aýrýy kezinde endoskopıalyq operasıalardyń árbir túrleriniń tıimdiligin salystyrmaly zerteý, postmenopaýzadaǵy spesıfıkalyq prosesterdiń dıagnostıkasy kezindegi gısteroskopıanyń róli týraly aıtylady dep kútilýde.