Shyndyǵynda qazaq dalasynda Jetitóbe ataýy óte jıi kezdesedi. Ári olarǵa bul ataýdyń tańylýynyń astarynda árqıly tarıhı oqıǵa jatatyny jasyryn emes. Erte temir dáýirine jatatyn Jetitóbe arheologıalyq eskertkishi Jambyl aýdany, Aqbulym aýylynan soltústik-shyǵysqa qaraı 5 shaqyrym jerde ornalasqan. Nysan jergilikti mańyzy bar memlekettik tarıh jáne mádenıet eskertkishteriniń tizimine jáne «Qazaqstannyń kıeli jerleriniń geografıasy» jobasy boıynsha Qazaqstannyń óńirlik qasıetti nysandar tizimine alynǵan, dep jazady Qamshy.kz aqparat agenttigi. 

Bul qorym qatar jatqan eki tizbekte ornalasqan obalar tobynan turady. Shyǵys jaqtaǵy tizbekte kólemderi iri kelgen jeti oba jatyr. Ǵalymdar eskertkish ataýy osy obalardyń sany baılanysty atalýy múmkin dep topshylaıdy.

Jetitóbe qorymy ǵylymǵa HİH ǵasyrdyń orta sheninen bastap belgili. Munda ár jyldary túrli ǵylymı zertteý jumystary júrgizildi. Arheologtar qorymnynan altyn jáne basqa da metaldan jasalǵan áshekeı qaldyqtary men bólshekteri tapty. Ol jádigerler saqtardyń «ań stılimen» úndesedi. Ári bul buıymdardyń jasalý tehnologıasy men ondaǵy metal beriktigi saq dáýirindegi metal óńdeýdiń joǵary dárejede damyǵandyǵyn kórsetedi. Al ondaǵy ár túrli belgiler men órnekter sol zamandaǵy adamdardy tanym-túsiniginen habar beredi. Tipti keı áshekeılerdiń syrtyna salynǵan ań aýlaý, kúnge tabyný sıaqty kórinister sol dáýirdegi halyqtyń kúndelikti turmys-tirshiligin tanytady. Ǵalymdar da saq zamanynda ken isi men rýda shıkizatyn óńdeý oǵan deıingi dáýirlermen salystyrǵanda edáýir ilgerilegenin málimdeıdi.

Jalpy saq qoǵamynda dinı nanymdary men ǵuryptarynyń negizgi sıpaty ata-baba arýaǵyna sıynýdan kórindi. Sondyqtan dúnıeden qaıtqan kisini arnaıy rýlyq qorymdarǵa dúnıe-múlkimen qosa jerlenip otyrǵan. Rýlyq qorymdar negizinde qystaýlar men turaqtardyń mańynda bolǵan.

Sol sekildi Jetitóbe qorymy da saq dáýirinen jetken osyndaı tarıhı mańyzy joǵary eskertkish kesheni bolyp tabylady. Erte kóshpeliler túsiniginde qorymdar qasıetti oryndardyń biri sanalǵan. Al búgingi ǵylym úshin bul qorymdar óz zamanyndaǵy qoǵamdyq qatynasty, dinı nanym senimdi eń aqyry óńdeý isiniń qaı deńgeıde júrgizilgenin baǵamdaýdyń ornyna aınalyp otyr.