«Rýhanı jańǵyrý» baǵdarlamasy aıasynda qolǵa alynǵan Qazaqstannyń kıeli jerler kartasyna esepke alynǵan jergilikti mańyzy bar nysannyń biri–Órnek qalashyǵy taıpalyq qonystan Uly Jibek joly boıyndaǵy saýda-ekonomıkasy qarqyndy damyǵan qalaǵa aınala alǵan, dep jazady Qamshy.kz aqparat agenttigi. 

T.Rysqulov aýdany, Órnek aýylynyń aýmaǵyndaǵy Sulýtór shatqalynda ornalasqan. Ortaǵasyrlarda negizi qalanǵan qalashyq túrki dáýirindegi qala mádenıetiniń iri ortalyqtarynyń birine jatady. Alǵashynda taıpalyq qonys bolyp keıin birte-birte aýqym keńeıgen qalashyq Qarahan handyǵy tusynda qalalyq-ákimshilik ortalyq bolǵan. Uly Jibek jolymen halyqaralyq saýda-sattyq jasaý esebinen qalashyq X-XII ǵasyrlarda óziniń sharyqtaý shegine jetti.

Órnek qalashyǵy jaıyndaǵy málimetter arab jylnamashysy Ibn Hordadbek pen Qudama qurastyrǵan jol kartasyna da belgilengen. Arab tarıhshylary Órnek qalasyn Kasrıbas, Qulshýb jáne Julshýb syndy qalashyqtarmen birge Taraz, Tómengi Barsqan jáne Qulan sekildi iri qalalardyń mańynda ornalasqanyn kórsetedi. Degenmen atalmysh kartada Órnek ataýy naqty kórsetilmegendikten ǵalymdar bul qalashyqtyń sol kezde qarluqtardyń feodaldarynyń ıelegindegi Qulshub qalashyǵy retinde kartaǵa enýi múmkin ekendigin alǵa tartady. Ári bul boljam tolyqtaı shyndyqqa janasady. Óıtkeni osy mańnan tabylǵan zattaı derekter qalanyń taıpalyq turaqty qonystyń ornyna paıda bolǵandyǵyn rastaıdy.

Óz zamanynda Órnek iri saýda ortalyǵy bolyp qana qoımaı iri qala mádenıet shoǵyrlanǵan óńir retinde de tanylǵan. Munda júrgizilgen arheologıalyq zertteý jumystary altyn jýýǵa arnalǵan arnaıy oryndaryn tapty. Óz kezeginde bul faktiler Órnek qalashyǵynyń asa dáýletti qala jurty bolǵanyn aıǵaqtaı túsedi. Sondaı-aq bul qala sol dáýirdegi otyrshylyq mádenıettiń ozyq úlgisi dep tanýǵa bolady. Óıtkeni munda kóshpeli emes mádenı damýdyń elementterin kóptep kezdestirýge bolady.

Qalashyq tarıhshylarmen 1985 jyldan zerttelip keledi. Alǵashynda munda Jambyl oblystyq ólketaný murajaıynyń zertteýshiler toby ǵylymı zertteý jumystaryn júrgizse, bir jyldan soń akademık Karl Baıpaqova bastaǵan Sh.Ýálıhanov atyndaǵy Tarıh, arheologıa jáne etnografıa ınstıtýty zertteý jasady.