Ózbekstan Respýblıkasynyń astanasy Tashkent qalasynda «Ózbekstan Respýblıkasyndaǵy Qazaqstan Respýblıkasynyń jyly» egıdasynyń aıasynda qazaqstandyq medısına kúnderi ótip jatyr. Úkimetaralyq kelisimderdiń sheńberinde uıymdastyrylǵan bul is-sharanyń basty maqsaty – eki respýblıkanyń densaýlyq saqtaý, medısınalyq bilim berý júıeleriniń dıalogyn damytý jáne nyǵaıtý, sondaı-aq aýrýlardy jańa tehnologıalar arqyly dıagnostıkalaý jáne emdeý boıynsha tájirıbe almasý, – dep habarlaıdy A.N.Syzǵanov atyndaǵy Ulttyq ǵylymı hırýrgıa ortalyǵynyń baspasóz qyzmeti.

Ulttyq ortalyqtardyń, joǵarǵy oqý oryndarynyń, densaýlyq saqtaý basqarmalarynyń ókilderinen turatyn qazaqstandyq delegasıany Densaýlyq saqtaý mınıstri Birtanov Eljan Amantaıuly bastap bardy.

A.N. Syzǵanov atyndaǵy Ulttyq ǵylymı hırýrgıa ortalyǵynyń delegasıasynyń quramynda ortalyqtyń jetekshi mamandary bar: ıntervensıalyq kardıologıa bóliminiń meńgerýshisi, PhD Baıymbetov Ádil Qudaıbergenuly, endoskopıa bóliminiń meńgerýshisi, densaýlyq saqtaý magıstri Abdrashev Erlan Baıtóreuly, ýrologıa jáne búırek transplantasıasy bóliminiń meńgerýshisi, joǵary sanatty dáriger Ibragımov Ravıl Pashaevıch, aǵa ǵylymı qyzmetker, profesor İlıasova Bıbigúl Saparbekqyzy, gınekologıalyq bólimniń meńgerýshisi, joǵary sanatty dáriger Úsenov Qadyrjan Maratuly, joǵary sanatty gınekolog dáriger Chýpın Aleksandr Nıkolaevıch, strategıalyq bloktyń jetekshisi, medısına ǵylymdarynyń kandıdaty Mirjaqypov Arman Tólegenuly. Ortalyq delegasıasyn Basqarma tóraǵasy, medısına ǵylymdarynyń doktory, profesor, QR DSM-niń bas hırýrgy Baımahanov Bolatbek Bımendeuly bastap bardy.

Osy is-sharanyń aıasynda ortalyq mamandary óz jetistikteri men tabystaryn Ózbekstannyń praktıkalyq densaýlyq saqtaý ókilderiniń nazaryna usyndy.

Joǵary deńgeıdegi sesıada Basqarma tóraǵasy Baımahanov Bolatbek Bımendeuly «A.N. Syzǵanov atyndaǵy Ulttyq ǵylymı hırýrgıa ortalyǵynyń medısınalyq tehnologıalar salasyndaǵy jetistikteri» taqyrybynda baıandama jasady.

V.Vahıdov atyndaǵy Respýblıkalyq mamandandyrylǵan ǵylymı-praktıkalyq hırýrgıa ortalyǵy, Respýblıkalyq mamandandyrylǵan ǵylymı-praktıkalyq kardıologıa ortalyǵy, ÓR DSM-niń juqpaly aýrýlar jáne vırýsologıa Ǵylymı-zertteý ınstıtýty, ÓR DSM-niń Respýblıkalyq perınataldyq ortalyǵy sıaqty Ózbekstan Respýblıkasynyń iri ulttyq ortalyqtarymen seriktestik týraly memorandýmdar bekitildi.

Forýmnyń ekinshi kúni A.N. Syzǵanov atyndaǵy UǴHO-nyń mamandary birneshe sheberlik sabaqtaryn ótkizdi:

Profesor Baımahanov B.B. «tiri týystyq donordan búırekti transplantasıalaý kezindegi laparoskopıalyq manýaldyq-assıstendirilgen nefrektomıa» biregeı otasyn jasady.

Intervensıalyq kardıologıa bóliminiń meńgerýshisi, PhD Baıymbetov Á.Q. «Kateterlik radıojıiliktik ablásıa» tahıkardıasynyń kúrdeli formalaryna birneshe ota jasap, «Júrek rıtmi buzylystaryn ıntervensıalyq emdeýdegi zamanaýı tehnologıalar» taqyrybynda dáris oqydy.

Endoskopıa bóliminiń meńgerýshisi Abdrashev E.B. úsh naýqastyń asqazanyndaǵy epıtelıaldyq ósindilerdi endoskopıalyq jolmen alyp tastaý otasyn sátti túrde júzege asyrdy.

Gınekologtar toby 10 mınıınvazıvti ota (gısterorezekto- jáne laparoskopıalyq operasıalar) júrgizdi. Jatyrdyń laparoskopıalyq ekstırpasıasy boıynsha bir operasıa, sondaı-aq torly protezdiń ornatylýy arqyly gıbrıdtik úsh deńgeıli rekonstrýksıa jasaldy.

Sonymen qatar HEOS zamanaýı hırýrgıalyq tehnologıasy tanystyryldy.

Profesor İlıasova B.S. vırýsologıa ınstıtýtynda «Gepatologıanyń ózekti máseleleri» taqyrybynda dáris oqydy. Birlesken klınıkalyq talqylaýlar barysynda baýyr patologıasy bar naýqastardyń jaı-kúıin tekserip, olarǵa medısınalyq keńes berdi.

Ótkizilgen sheberlik sabaqtaryna ózbekstandyq áriptester erekshe qyzyǵýshylyq tanytyp, ári qaraıǵy jemisti yntymaqtastyqqa jol ashyldy.