Qazaqstan Respýblıkasy Úkimetiniń qaýlysymen bilim jáne ǵylym , QR sıfrlyq damý, ınovasıalar jáne aeroǵarysh ónerkásibi vıse-mınıstrileri taǵaıyndaldy, Bul týraly QR Premer-mınıstriniń baspasóz qyzmeti habarlaıdy.

Bilim jáne ǵylym vıse-mınıstri qyzmetine Mıras Muhtaruly Dáýlenov keldi.

Mıras Dáýlenov 1983 jyly Shyǵys Qazaqstan oblysy Óskemen qalasynda dúnıege kelgen. S. Amanjolov atyndaǵy Shyǵys Qazaqstan memlekettik ýnıversıtetin támamdaǵan, quqyqtaný magıstri, quqyq salasyndaǵy doktor (PhD).

Eńbek jolyn 2003 jyly bastaǵan. Ártúrli jyldary zańger retinde jeke sektorda jumys istegen. 

2012 jyly «Qazaq Gýmanıtarlyq Zań ýnıversıteti» AQ Halyqaralyq quqyq jáne halyqaralyq qatynastar kafedrasynyń meńgerýshisi, 2015-2018 jyldary – M. S. Nárikbaev atyndaǵy KAZGÚÝ ýnıversıtetiniń S. Zımanov atyndaǵy irgeli jáne qoldanbaly zertteýler Akademıasynyń dırektory – Basqarma Tóraǵasynyń orynbasary, 2018 jyldan bastap 2019 jylǵy jeltoqsanǵa deıin – M. S. Nárikbaev atyndaǵy KAZGÚÝ ýnıversıtetiniń S. Zımanov atyndaǵy quqyqtyq jáne ekonomıkalyq zertteýler Akademıasynyń dırektory qyzmetterin atqarǵan.

QR sıfrlyq damý, ınovasıalar jáne aeroǵarysh ónerkásibi vıse-mınıstri laýazymyna Azamat Baıqýanyshuly Batyrqoja taǵaıyndaldy. 

Azamat Batyrqoja 1972 jyly Soltústik Qazaqstan oblysynda dúnıege kelgen. F. Dzerjınskıı atyndaǵy áskerı akademıany jáne «Turan-Astana» ýnıversıtetin támámdaǵan. 

Eńbek jolyn 1995 jyly bastaǵan. Túrli jyldary korporatıvtik sektorda, QR Kólik jáne komýnıkasıalar mınıstrliginde, QR Ulttyq bankinde, «Qazaqtelekom» AQ-da, L. Gýmılev atyndaǵy EUÝ-de, QR Indýstrıa jáne jańa tehnologıalar mınıstrliginde, QR Premer-Mınıstriniń Keńsesinde, QR Bilim jáne ǵylym mınıstrliginde, «Samuryq-Qazyna» turaqty damý qorynda jumys istegen. 

2015-2017 jyldary – QR IDM Tehnologıalyq jáne ınovasıalyq damý departamentiniń dırektory, 2018-2019 jyldary – «Qazaqstan Ǵarysh Sapary» UK» AQ prezıdenti bolǵan.

2019 jyldyń aqpan aıynan bastap jeltoqsanǵa deıin «Qazaqstan Ǵarysh Sapary» UK» AQ Basqarma tóraǵasy qyzmetin atqardy.