Astana qalasynyń ákimi I.Tasmaǵambetovtyń,

QR Mádenıet jáne aqparat mınıstri M.Qul-Muhammettiń,

QR Prezıdent ákimshiliginiń jetekshisi K.Másimovtyń,

Almaty oblysynyń ákimi A.Musahanovtyń,

«Nur Otan» partıasy tóraǵasynyń orynbasary B.Baıbektiń nazaryna

Qytaıdan kelgen qandastarymyz Elordamyz Astananyń týǵan kúnine arnap 73 metr qarala syrmaq tigipti. Mundaı jaǵymdy jańalyqty qulaǵy túrik qazaq baspasóziniń bári jarysa jazyp, aıtyp jatyr. Degenmen kóz maıyn taýysqan aq samaıly analardyń eńbegin kim baǵalaıdy? Mundaı syrmaq ne úshin kerek? Taldyqorǵannyń Tekelisinen Astananyń tórine kim jetkizedi?

Bizdiń bilýimizshe, bul  tek Qazaqstanda ǵana emes, búkil dúnıejúzinde eń uzyn syrmaq. Iaǵnı barsha álemge qalaı pash etsek te jarasatyn qazaq qolóneriniń   jaýhary. Osy kúnge deıin «Qarajorǵany», «Qara dombyrany», «Qazaq kestesin» gınestiń rekordtar kitabyna engizip, Qytaı eli ózi abyroıyn asqaqtatty... Bizdiki ne turys?

Osyndaı keremet syrmaqty dúnıege ákelýge bastamashy bolǵan, 2010 jyly Atajurtqa oralǵan Zada Jumanqyzynyń aıtýynsha, bul – sheteldegi bar qazaqtyń jáne Atajurtyna oralǵan barsha aǵaıyndardyń Elbasy Nursultan Ábishulyna degen ystyq yqylasynyń, rıasyz alǵysynyń jemisi.

73 metr syrmaqty tigýge atsalysqan Jazıra Qurmanǵazyqyzynyń da aıtary kóp.  «Atajurtqa kelýdegi basty maqsatymyzdyń biri – qazaq qolónerin álemge pash etip, ult qundylyqtaryn urpaqqa jalǵastyrý», - deıdi ol.

Shyndyǵynda, mundaı eńbektiń baǵasy sheksiz. Ketken kıizdi, sabaqtalǵan jipti, bárinen de súıel bolǵan saýsaqty aıtsańyzshy... Tipti olardyń áli kúnge menshikti baspanalary da joq kórinedi. Bar yqylastaryn elge oralyp, eńbekterin kórsetýge jumsapty.

Iá, joǵaryda aıttyq. Mundaı jumysty Qytaıda memleket bolyp qolǵa alady. Mınıstrlik qadaǵalaıdy. Ákim tikeleı bas-kóz bolady. Al, mynaý daıyn jumys. Tek sony baǵalaı alý, aq samaıly analarymyzdyń eńbegin esh ketirmeı Astana tórine jetkizip, Elbasynyń nazaryna usyný  maqala basynda aty atalǵan laýazymdy tulǵalarǵa syn.

Rsynda, bar qazaqtyń Elordasynyń týǵan kúnine qarala syrmaqtan artyq qandaı syılyq kerek?

 Abai.kz