Úsh jyldan beri jabyq turǵan Qoja Ahmet Iasaýı kesenesi kúmbezin jańartý jumystary aıaqtaldy. Kúmbezdiń tarıhı kelbeti saqtalyp, jeldetkish qabattary retke keltirildi. Qazir kúmbez etegindegi segiz qyrmen qosylǵan jerinde gıdrooqshaýlaý jumysy aıaqtalýǵa jaqyn.

Kúmbezdi qaıta qalpyna keltirý jumystary oblys ákimi Ó.Shókeevtiń jiti qadaǵalaýynda. Qurylys mádenıet jáne sport mınıstrligimen birlese júrgizilýde.

«Áziret Sultan» memlekettik tarıhı-mádenı qoryq-mýzeıi aýmaǵyndaǵy tarıhı oryndarda qaıta qalpyna keltirý jumystary, ortaǵasyrlyq Kúltóbe qalashyǵy, Han ordasy men meshiti ornalasqan magıstraldy kóshe boıynda arheologıalyq qazba jumystary qarqyndy júrip jatyr.

Al Kúltóbe qalashyǵyndaǵy qazba jumystarynyń nátıjesi boıynsha 2019 jyly 5000-nan asa bizdiń eramyzǵa deıingi 1 ǵasyrda jasalǵan ejelgi altyn buıymdar tabylǵan.

Budan bólek, Qoja Ahmet Iasaýı kesenesiniń aldynda týrıser demalatyn, qalyń baý-baqshaly selfı-aımaq jasaqtalady. Tarıhı nysannyń «Taqıa qaqpasy» mańynda qazba jumystary júrgizilip, tabylǵan jádigerler týrıser kóz qýanyshyna aınalmaq.

Sondaı-aq, B.Sattarhanov dańǵyly aýmaǵynda etnoaýyl salynýda.

Qoja Ahmet Iasaýı kesenesinde atqarylǵan jumystardyń barlyǵy IýNESKO-men kelise otyryp júrgizilýde. Kesenedegi qaıta qalpyna keltirý jumystarymen Qazaqstan Respýblıkasy Mádenıet jáne sport mınıstrligi Mádenıet jáne óner isteri departamentiniń dırektory Kúmis Seıitova da kelip tanysty.

Túrkistan oblysy óńirlik komýnıkasıa qyzmeti