2013 jyly jeltoqsannyń 20-sy kúni bas prokýratýra ókili Astanada ótkizgen arnaıy brıfıńte: «2012 jylǵy 16 sáýir kúni túzeý mekemesinde jazasyn ótep jatqan Rýstam Ibragımov (Altynbek Sársenbaıulyn óltirý týraly tapsyrysty oryndaǵany úshin aıypty dep tanylǵan adam - red.) qylmystyń budan buryn sot organdaryna belgili bolmaǵan jaılary jazylǵan aryzben Qazaqstannyń Joǵarǵy Sotyna júgindi. Bul aryzda ol birinshi ret adam óltirýdi jasaǵanyn moıyndady, ony qalaı jasaǵanyn egjeı-tegjeıli beınelep berdi, sondaı-aq Altynbek Sársenbaıulyn óltirýge tapsyrys berýshi shyn máninde Erjan Ótembaev emes, Rahat Álıev pen Álnur Musaev ekenin kórsetti» dep málimdedi.
Prokýratýra «Ibragımovtyń aıtqandarynyń shynaıylyǵyn Joǵarǵy Sot tapsyrmasy boıynsha Bas prokýratýra, Ulttyq qaýipsizdik komıteti jáne İshki ister mınıstrligi qyzmetkerlerinen arnaıy qurylǵan jedel tergeý toby tekserdi» deıdi. Prokýratýra budan ózge, Ibragımovtyń «Erjan Ótembaevtyń jeke bas arazdyǵyna oraı Altynbek Sársenbaıulyn uryp-soǵýdy suraǵanyn jáne bul jóninde Rahat Álıevke málim bolǵanyn, ol Álnur Musaevpen birlesip, jaǵdaıdy paıdalanyp qalýdy kózdep, Altynbek Sársenbaıulyn óltirýdi tapsyrǵanyn» aıtqanyn habarlady.Prokýratýranyń málimdeýi boıynsha, «Ibragımovtyń ýájderi... obektıvti dáleldemelermen tolyqtaı rastalǵan». 2006 jyly aqpannyń 11-i kúni Almatyda saıasatker Altynbek Sársenbaıuly men onyń oqqaǵarlary Vasılıı Jýravlev jáne Baýyrjan Baıbosynnyń máıiti tabyldy. Bul iske qatysty Rýstam Ibragımov esimdi demalysqa shyqqan polısıanyń burynǵy podpolkovnıgi men taǵy basqa toǵyz adam sottalǵan edi. Rýstam Ibragımov saıasatkerdi óltirýge tapsyrys berýshi retinde sol kezde parlament senatynyń apparat jetekshisi qyzmetin atqarǵan Erjan Ótembaevty ataǵan edi. 2006 jyly tamyzdyń 31-i kúni aıyptalýshylardy uzaq merzimge bas bostandyǵynan aıyrý, al Ibragımovty tikeleı uıymdastyrýshy jáne oryndaýshy retinde ómir boıy túrmege qamaý jóninde sot úkimi shyqqan. IBRAGIMOV ÁLIEV JAILY 2006 JYLY AITQAN Prokýratýra málimdemesi boıynsha, «Rýstam Ibragımov Rahat Álıevtiń Sársenbaıulyn óltirýdi tapsyrǵanyn 2006 jyly FBR agentterine aıtqan». «Biraq muny aıtqanymen, Ibragımov quqyq qorǵaý organdaryna resmı kýálik berýden bas tartyp, óz otbasynyń qaýipsizdigi úshin bul aqparatty jarıalamaýdy
ótingen».
«Qazir FBR Ibragımovtyń bul málimdemesin tıisti qujattarmen rastap otyr». Bul isti tekserýge Qazaqstan Bas prokýratýrasynyń ótinishimen AQSH-tyń federaldyq tergeý búrosy (FBR) qatysqan edi. Brıfıńke prokýratýra ókilimen birge shyqqan AQSH-tyń Qazaqstandaǵy senimdi ókili Djon Ordveı «FBR tergeýi nátıjesi Qazaqstan prokýratýrasy qorytyndylarymen sáıkes keletinin» aıtty. Ol odan bólek, «FBR bul qylmysqa qatysty tergeýin jeke, ári táýelsiz júrgizgenin» aıtty.
ERJAN ÓTEMBAEV
Prokýratýra ókiliniń aıtýynsha, «2013 jyly 11 jeltoqsan kúni Qazaqstan bas prokýratýrasy Joǵarǵy sotqa Altynbek Sársenbaıuly, Vasılıı Jýravlev jáne Baýyrjan Baıbosyndy óltirý jónindegi is boıynsha shyǵarylǵan úkimdi ishinara qaıta qaraý qajettigi týraly qorytyndy joldaǵan». Prokýratýra málimdemesine qaraǵanda, Ibragımovtyń keıingi kýáligi negizinde Erjan Ótembaevqa qatysty «budan buryn qaýly etilgen úkimdi 2013 jyly 19 jeltoqsan kúni Qazaqstan Joǵarǵy Soty ishinara buzǵan». Erjan Ótembaevtyń áıeli Lúdmıla Ótembaeva Azattyq tilshisine prokýratýranyń málimdemesi jóninde:- Árıne qýanyshtymyz. Osy jyldar boıy biz isti qaıta qaraıtyn shyǵar degen úmitpen keldik. Prokýratýranyń málimdemesin estidim, alyp-qosarym joq. Tergeý júrgizilip, sottyń úkimi jartylaı joıylǵan. Alaıda úkimniń jartylaı joıylǵanyn nemese tolyǵymen alynyp tastaıtyndyǵyn sot sheshedi. Sotqa daıyndalamyz. Ázirge advokatymyz joq, eger qajet bolsa advokat izdeımiz, - dedi. Prokýratýra taratqan aqparatqa qaraǵanda, osy is boıynsha sottalǵan ózge adamdardyń úkimin qaıta qaraýǵa «jetkilikti negiz joq». Prokýratýra «Tıisti sot sheshimi qabyldanǵan jaǵdaıda Rahat Álıevke jáne Álnur Musaevqa qatysty qylmystyq is qozǵalady» dep habarlady. QAIYN ATA MEN KÚIEÝBALA Bas prokýratýranyń málimdemesine qatysty Altynbek Sársenbaıulynyń aǵasy Rysbek Sársenbaıuly Azattyq tilshisine «bul istiń qaıta qaralýyn kópten beri kútip júrgenin» aıtty. - Eger sot shynymende bolsa, onda onyń júgi aýyr. Rahat Álıev bul iske qatysty óziniń pikirin buǵan deıin aıtqan. Ony halyq biledi, sonda taıtalas kimderdiń arasynda júrip jatyr? Kúıeý bala men qaıyn atanyń arasynda. Kúıeý bala qaıyn atany kinálaıdy, qaıyn ata kúıeý balany kinálattyrady. Sonda ekeýiniń qaısysy shyn mánindegi tapsyrys berýshi? Eger sot prosesi bolatyn bolsa, sotty júrgizýshi adam osy suraqtyń jaýabyn tabýy kerek, osy suraqty ekeýine de qoıýy kerek. Eger kópshiliktiń kókeıindegi suraqqa jaýap beriletin sot bolsa – men ony qoldaımyn, - dedi Rysbek Sársenbaıuly. 2009 jyly Qazaqstan prezıdenti Nursultan Nazarbaevtyń burynǵy kúıeý balasy Rahat Álıev «Ózi jazyp jatqan áshkereleý kitabynyń tusaýkeserin Altynbek Sársenbaıuly óltirilgen kúnge oraılastyryp ótkizetinin" málimdedi. Rahat Álıev «kitapta Sársenbaıulyn óltirýge kimder tapsyrys berdi jáne kimder ol tapsyrysty oryndaǵanyn aty-jónderin kórsetip, ashyq jazamyn» degen málimdeme taratqan edi. Keıin onyń atynan jaryqqa shyqqan kitapta «Altynbek Sársenbaıulynyń kózin joıýǵa tapsyrys berýshiler eldiń joǵary basshylyǵynda otyr» degen emeýrin jasaldy. UQK-niń shette júrgen burynǵy tóraǵasy Álnur Musaev ta Azattyq radıosyna bergen suqbatynda Rahat Álıevtiń qolynda «bul qylmysqa joǵary laýazymdy adamnyń qatystylyǵy týraly naqty dálel bar» dep málimdegen edi. Prezıdent Nursultan Nazarbaevtyń burynǵy kúıeýbalasy Rahat Álıev Qazaqstanda birneshe qylmystyq aıyppen sottalyp, 40 jyl túrmege kesilgen. Oǵan taǵylǵan aıyptardyń biri – «2007 jyly «Nurbanktiń» eki top-menedjerin urlap áketip, azaptady» degen aıyp. Álıev 2007 jyldan beri Avstrıany panalap kelgen. Sońǵy jyldary onyń ekinshi márte úılenip, áıeliniń Shoraz degen famılıasyn ıelenip, Maltada turyp jatqany týraly habarlandy. Rahat Álıev Qazaqstanda ózine taǵylǵan barlyq aıyptyń saıası sıpaty bar dep sanaıdy jáne joqqa shyǵaryp keledi.
Mánshúk Asaýtaı
Derekkóz: http://www.azattyq.org