Senat otyrysynda depýtat Narıman Tóreǵalıuly Bilim jáne ǵylym mınıstri Asqat Aımaǵambetovten bilim berý sapasyn jaqsartý maqsatynda sarapshylar men pedagogıkalyq qoǵamdastyqtyń qatysýymen PISA (oqýshylardyń bilimi men biliktiligin baǵalaýdyń halyqaralyq baǵdarlama) nátıjeleri men usynymdary qanshalyqty talqylanǵanyn, jáne onyń nátıjesi qandaı, qashan iske asatynyn surady.

– 2018 jyly PISA halyqaralyq zertteýi ótip, 2019 jyly nátıjeleri belgili boldy. Biz ony eksperttermen, pedagogıkalyq qaýymdastyqpen keńinen talqyladyq. Talqylap qana qoımaı ár oblys, aýdan, qala boıynsha taldaý jasalyp, jergilikti atqarýshy organdarǵa berdik. Sol boıynsha naqty is sharalardy iske asyra bastadyq. 

2019 jyly zertteý nátıjeleri belgili bolǵannan keıin 2020 jyldan bastap iske asyrylǵan memlekettik baǵdarlamada keshendi sharalar qarastyryldy. Kúni keshe ǵana senattyń profıldi komıtetinde "Bilimdi el" arnaıy ulttyq jobasyn talqyladyq.  Ulttyq jobanyń sheńberinde bilim berý sapasyn arttyrý boıynsha keshendi is sharalar qarastyrylyp otyr. Bilim berý sapasyna túrli faktorlar áser etedi. Sondyqtan eń basty másele bilimdi, bilikti pedagogtermen qamtamasyz etý, áleýetin arttyrý, – dedi ol.

Mınıstr prezıdent tapsyrmasyna sáıkes pedagog statýsy týraly zań 2020 jyldan bastap iske asyp jatqanyn atap ótti.

– Pedogogterdi daıyndaý júıesin jańadan iske asyryp, ýnıversıtetterdiń bilim berý baǵdarlamalaryn jańartyp jatyrmyz. Osy jumystyń nátıjesinde tek qana 1 jylda ıaǵnı 2020 jyly altyn belgi ıegerleri arasynda pedagogıkalyq mamandyqty tańdaǵan talapkerler úlesi eki esege artty. Ortasha pedagogıkalyq mamandyqtarǵa túsip jatqan  ortasha 60-90 kóbeıdi. 

Oqý saýattylyǵy máselesin arttyrý boıynsha biz "Kitapqa qushtar" degen úlken jobany bastap kettik. Kitaphanalardyń jumysyn jańa formatta jasaý máselesi iske asyrylyp jatyr, – dep jaýap berdi Aımaǵambetov.