Almaty qalasynyń bas sanıtar dárigeri Jandarbek Bekshın megapolıste koronavırýs juqtyrýdyń negizgi oryndaryn aıtyp, turǵyndardy vaksına saldyrýǵa shaqyrdy. Bul týraly ol óńirlik komýnıkasıalar qyzmetiniń baspasóz konferensıasynda málimdedi.

Ol sońǵy epıdemıologıalyq tekserý nátıjeleri boıynsha azamattardyń 90%-y koronavırýspen aýyratyn naýqastarmen baılanysta bolǵanyn aıtty.
 
– Burynǵydaı qoǵamdyq oryndarda juqtyrý qaýpi áli de joǵary – 49% qurap tur, otbasylarda – 22%, al qoǵamdyq kólikte – 18%. 20 men 40 jas aralyǵyndaǵy azamattardyń 33%-y, 40 pen 60 jas aralyǵyndaǵy azamattardyń 28%-y, 60 jastan asqandardyń 25%-y jıi aýyrady. Osy jas sanatyndaǵy azamattar barlyq naýqastardyń 86%-yn quraıdy, – dedi ol.
 
J. Bekshın qala turǵyndarynan jabyq bólmeler men adamdar kóp jınalatyn oryndarǵa barǵanda betperde taǵýdy, sondaı-aq saparǵa jıi shyǵýdan, adam kóp jınalatyn buqaralyq is-sharalarǵa barýdan aýlaq bolýdy eskertti. Aýrýdyń aldyn alýdyń mańyzdy sharasy gıgıena, ásirese qoldy taza ustaý ekenin atap ótti.