Kásipker, qoǵam belsendileri Marǵulan Seısembaı men Muhtar Taıjan arasyndaǵy sot prosesine núkte qoıyldy.
Muhtar Taıjan buǵan deıin sotta jeńip shyqqanyn, Marǵulan Seısembaı jurt aldynda keshirim suraýǵa mindettelgenin aıtqan. Endi mine, Seısembaı sot sheshimin oryndap, Taıjannan keshirim surap otyr. Ol sondaı-aq ekeýara daýdyń jaı-japsaryn túsindire ketti. Onyń sózderinen sot prosesi Muhtar Taıjan aıtqannan múlde basqasha órbigenin uǵýǵa bolady.
Muhtar Taıjan málimdemelerinde sotta jeńip shyqqanyn birneshe ret qaıtalasa, Marǵulan Seısembaı sot barysynda is týraly jaq ashpady. Al daý Marǵulan Seısembaıdyń 2020 jylǵy 25 sáýirde Muhtar Taıjan týraly áleýmettik jelide jazǵan jazbasynan bastalǵan. Ol jerde Seısembaı Taıjanǵa 237 100 myń dollar aqsha bergenin, Taıjan men onyń otbasyn túrli máseleler boıynsha moraldyq jáne materıaldyq jaǵynan qoldap kelgenin, soǵan qaramastan Taıjan ózin qaralap, aqparattyq soǵys jarıalap, bıliktiń tapsyrmasyn oryndap otyrǵanyn jazady. "Týǵan anań men pıaz ekken baıǵus fermerlermen sottasqanyńdy eskersek, senen bárin kútýge bolady" degen sóz aıtady. Daý artynsha, taraptardyń sottasýyna ulasady.
Marǵulan Seısembaı bastapqyda baspasóz ókilderiniń sotqa qatysýyna qarsy bolǵanynyń sebebin "haıp jasaýdy qalamaǵanymen" túsindiredi. Alaıda Taıjannyń syńarjaq aqparat berýin kórgen soń, baspasózdi sot isine qatystyrýdy suraǵanyn jetkizgen.
Kásipkerdiń sózinshe, ol Taıjannyń ózine qatysty jasaǵan shaǵymynyń 10 tarmaǵynyń 9-y boıynsha jeńip shyqqan. Ol jeńip shyqqan 9 tarmaqty ashyp jazǵysy kelmeıtinin, kerek bolsa, advokatynan istiń mán-jaıyn suraýǵa bolatynyn aıtady.
"Men tek bir tarmaq boıynsha jeńildim, ol jerde "zasýdıl svoıý rodnýıý mat ı sestrý" degen sózderdiń jala ekendigi aıtylǵan. Sot posttyń orys tilindegi nusqasyna qatysty sheshimdi onyń paıdasyna sheshti. Qazaq tilindegi nusqasyna qatysty ol daýlasa almady (ol jerde "sottasqan” dep durys jazylǵan). Sotta ol óz anasymen eki ret sottasqany anyqtaldy. Birinshi ret anasynyń "Óziniń kútimine aı saıyn 50 AEK kóliminde alıment óndirip alý boıynsha" talabyna qatysty, ekinshisi jyljymaıtyn múlikke qatysty daý. Meniń "zasýdıl» rodnýıý mat ı sestrý" degen sózim Taıjannyń ar-namysyna tıip, nuqsan keltiripti. Onyń oıynsha, ol anasyn «sotqa bermegen» («zasýdıl»), qaıta anasy oǵan qarsy sotqa aryzdanǵan. Al ol óz anasymen sottasqany úshin esh shimirikpeıdi. Men árıne bul jaıtty kótergenim úshin qynjylamyn. Eger ol qatardaǵy qarapaıym adam bolsa, bul máseleni eshqashan kótermes edim. Alaıda ol halyq aldynda saıasatker, ári adamgershili mol adam retinde kórinýge úmit etip júr, sondyqtan muny aıtpaı ketý durys emes bolar edi. Al endi sot sheshimin oryndaı otyryp, men óz postymda "on zasýdıl" svoıý mat ı rodnýıý sestrý" dep qate jazǵanym úshin kópshilik aldynda Muhtar Taıjannan keshirim suraımyn. Anasy men týǵan baýyryn sotqa berdi ("zasýdıl svoıý rodnýıý mat ı sestrý") degen sózimdi teriske shyǵaramyn. "Muhtar Taıjan anasymen eki ret sottasyp, sotta ony eki ret jeńdi" ("Mýhtar Taıjan dvajdy sýdılsá so svoeı materú ı dvajdy vyıgral ee v sýde") dep jazǵanym durys bolady eken" deıdi Seısembaı.
Al Muhtar Taıjan áleýmettik jelide sot prosesi 10 tarmaqtan turǵany týraly eshteńe demeı, tek ózi jeńip shyqqan bir tarmaq týraly ǵana aıtqan.
Muhtar Taıjan búgin jelidegi paraqshasynda "Marǵulan Seısembaıdy keshirim suratqyzamyn degen ýádemde turdym" dep onyń keshirim suraýyn qabyl alatynyn málimdedi. Sol arqyly daýǵa núkte qoıylǵanyn bildirdi. Ol Seısembaı jazbasynyń tek keshirim suraǵan tusyn ǵana paıdanalyp, adamdardyń jeke ómirine aralasýdyń durys emestigin jetkizgen.
