Qazaqstandyq "RESELF" IT kompanıasynyń dırektory Janserik Tólegen jáne "QMED" Ulttyq ınovasıalyq medısına palatasynyń basshysy Ákim Tursyn Reseı ózi qoldanbaǵan platformany Qazaqstanda synamaq ekenin jetkizdi. Bul týraly olar jýrnalıs Nartaı Aralbaıdyń Youtube arnasyna bergen suhbatynda aıtty.

Janserik Tólegen men Ákim Tursyn jarty mıllıard dollar jumsalatyn jobanyń kóńil kónshiterlikteı emes ekenin aıtty.

Jýrnalıs Nartaı Aralbaı "Egov-ty Sber-ge aýystyrý qoǵamda qatty talqylanyp jatyr. Oǵan Qazaqstannyń búdjetinen jumsalatyn 500 mıllıon $ aqylǵa tompaq dúnıe. Sonsha qarjy jumsap Reseıdiń platformasyn engizetindeı basymyzǵa ne kún týdy? Munyń astarynda qandaı qaýip bar? Qazaqstan IT maman joq pa? Zańdy suraqtar. Bir ǵana masqarany aıtaıyq, Sber-di Reseıdiń ózi áli qoldanbaǵan. Demek, Qazaqstan olar úshin synaq alańy sekildi. Test retinde kóredi, bizdiń elde kemshilik ketse óz elderine engizbes buryn sony jóndep alady. Al biz olardyń shıki platformasyna búkil halqymyzdyń jeke málimetin júktemekpiz. Ol úshin búdjetimizden 500 mıllıon $ tólenbek" dep jazdy óziniń Youtube arnasynda. 

Jýrnalısiń "Rasymen Baǵdat Mýsın bizdiń jeke málimetterimizdi orystardyń qolyna berip jatyr ma?" degen saýalyna Janserik  málimetterdiń olarǵa berilmeıtinin aıtty, alaıda "Baǵdat Mýsınniń sózi boıynsha, biz tek ǵana tehnologıasyn alamyz. Árıne ol tehnologıany alyp kelip, ony bizdiń mamandar qysqa ýaqytta alyp kete ala ma, almaı ma? ol bólek áńgime. Eger reseılik mamandar kelip bizdiń aqparattarmen jumys istese, aıyrmashylyq joq sıaqty" dedi. 

Maman platformanyń dokýmentasıasyn qarap, zerttegenin aıtyp, "Sondaı 150 mln dollar jumsaımyz dep otyrǵan úlken platformanyń bar joǵy 210 bettik dokýmentasıasy bar. Ol óte az. Odan keıin ol birinshi versıasy. Oǵan qosa, ol ózderinde jasalmaǵan. Al, biz sony alaıyq dep otyrmyz" deıdi. 

Aıta keteıik, buǵan deıin Chehıa memleketinde de Qazaqstandaǵy sıaqty daý týdyrǵan IT joba týraly habarlaǵan bolatynbyz. Chehıanyń burynǵy transport mınıstriniń mıllıondaǵan eýroǵa baǵalaǵan IT jobasynyń óte qymbat ekenin aıtyp, qarsy shyqqqan 60 programmıstiń jobany tegin istegeni, mınıstrdiń otstavkaǵa ketkeni týraly habarlanǵan.