Bilim jáne ǵylym mınıstri Asqat Aımaǵambetov memlekettik bilim berý uıymdarynyń birinshi basshylaryn rotasıalaý qaǵıdalary Ádilet mınıstrliginde tirkelgenin málimdedi.
Aıtýynsha, bilim berý júıesinde mektep, kolej jáne balabaqsha dırektorlaryn rotasıalaý ınstıtýty paıda boldy.
– Bilim berý salasynda 10 myńnan astam memlekettik uıym bar. Kóptegen basshylar, merzimsiz eńbek kelisimsharttaryn jasasqan. Osyǵan baılanysty bir uıymda 10-15 jyl jáne odan da kóp jumys isteıtinder az emes. Árıne, olardyń arasynda óz jumysyn jaqsy biletin jáne mektep, kolej, mektepke deıingi nemese qosymsha bilim berý uıymdarynyń damýyna eleýli úles qosatyn basshylar bar. Degenmen, 10-15 jyl boıy bir orynda otyryp, ózderiniń bastamashyldyǵy men damýǵa degen yntasyn joǵaltatyn mektep dırektorlary da bar, – dedi ol.
Mınıstr adam uzaq jyldar boıy bir bilim berý uıymyn basqarsa, bul motıvasıanyń tómendeýine, jumys barysynda jańa tásilderdiń bolmaýyna ákelýi múmkin ekenin eskertti.
– Basshylyq etetin uıymnyń aýysýy ózgeristerdi engizýge jáne basshynyń jumystaǵy tıimdiligin arttyrýǵa múmkindik beredi, – dedi Aımaǵambetov.
Bilim mınıstri erejelerdiń negizgi basymdyqtaryna toqtalyp ótti:
- Birinshiden, bir bilim berý uıymynda 4 nemese 7 jyldan astam jumys istegen basshylar rotasıalanady.
Bul rette, osy bilim berý uıymynda laýazymǵa taǵaıyndalǵan kúnnen bastap 4 jyl jumys atqarǵan birinshi basshy rotasıadan ótinishi negizinde bosatylyp, tıisinshe qoldanystaǵy eńbek sharty sheńberinde óz jumysyn jalǵastyra alady.
Alaıda, eger basshy atalǵan uıymda 7 jyldan astam ýaqyt jumys istese, onda ol mindetti túrde rotasıalanady. Osylaısha, bir bilim berý uıymyna jetekshilik etý merzimi 7 jyldan aspaýy tıis.
- Ekinshiden, rotasıalaýdyń tómendegideı sharttary bar:
– rotasıalaýdy oblystardyń jáne respýblıkalyq mańyzy bar qalalardyń bilim basqarmalary júzege asyrady;
– rotasıa bir eldi-meken aýmaǵynda júrgiziledi;
– rotasıalaýdy bir deńgeıdegi uıym basshylary arasynda júrgizedi;
– rotasıalaý kezinde birinshi basshylardyń biliktilik sanaty, ıaǵnı atalǵan sanat úshin tólenetin qosymsha aqy da merzimi aıaqtalǵanǵa deıin saqtalady.
Pikir qaldyrý