Búgin barsha musylmandardyń eń ulyq merekesi - Qurban aıt meıramy. Bul mereke eń áýeli aıt namazyn oqýmen bastalady. Elordalyq meshitterde aıt namazy tańǵy saǵat 7:45 oqyldy. Qasıetti Qurban aıt merekesi  Ramazan aıynan keıin 70 kún ótken soń toılanady. Bıyl Qurban aıt merekesi 24-26 qyrkúıek kúnderi atap ótýde. Bul týraly Qamshy portaly QazAqpartqa silteme jasaı otyryp habarlaıdy.

Bul kúni álemdegi barsha musylman qaýymy qurbandyqqa mal shalyp, onyń etin úshke bóledi. Bir bóligin turmysy tómen otbasylarǵa taratady, ekinshi bóligi óziniń otbasynda qalady jáne úshinshi bóligi qonaqtarǵa arnalǵan merekelik dastarhanǵa qoıylady.

Sanıtarlyq-epıdemıologıalyq erejeler men talaptarǵa sáıkes Astana qalasynda maldy qurbandyqqa shalatyn arnaıy oryndar belgilendi.

Eske sala keteıik, negizgi qurbandyq shalatyn oryn Qosshy eldi-mekenine jaqyn «Altyn taǵa» mal bazarynda ornalasqan. Budan basqa, «Pıshekombınat Astanalyq» JSHS, M. Dýlatov k-si, 191; «Nurbereke 555» JSHS, Alash tasjoly, 30; «Metro» SO, «Shaýshen» sharýa qojalyǵy, Astana-Pavlodar tasjoly, 9 km;  «Temesh» sharýa qojalyǵy; «Astana - Sofıevka» tasjoly, 7 km; «A. Esjanova» DK; «Jaılaý», Alash tasjoly;  «Maqsat 2007» JSHS; Temirjolshylar turǵyn alaby, Aqjar k-si, 20 boıynsha da qurbandyq shalý alańdary bar.

Astana qalasyndaǵy «Nur Astana», «Áziret Sultan» jáne «Sádýaqas qajy Ǵylmanı» atyndaǵy meshitterdiń aldyndaǵy alańdarda kıiz úıler tigildi. «Áziret Sultan» meshitiniń qyzmetkerleri 200 otbasyǵa qurbandyq eti men aıttyq paketter taratty. Budan bólek, S.Seıfýllın atyndaǵy agrotehnıkalyq ýnıversıtetiniń stýdentterine 150 paket, "Almaty" aýdanynyń ákimdigi tizimindegi áleýmettik az qamtylǵan otbasylarǵa 125 paket, «Áziret Sultan» meshitine ótinish bildirip kelgen jandarǵa jáne Astana qalasyndaǵy túrli qoǵamdyq uıymdarǵa 325 paket úlestiretin bolady. Bul týraly «Áziret Sultan» meshitiniń baspasóz qyzmeti habarlaıdy.

Qurban aıt merekesi aıasynda qalalyq meshitterdiń aldyndaǵy alańdarda ulttyq sport túrlerinen jarys (qazaqsha kúres, asyq atý, arqan tartys) jáne mádenı sharalar (kúı, terme aıtý jáne t.b.) ótip jatyr, dep habarlaıdy elorda ákimdiginiń baspasóz qyzmeti.