Memleket basshysy «Áziret Sultan» meshitine bardy jáne Qazaqstan halqy men búkil álem musylmandaryn Qurban aıt merekesimen quttyqtap, jamaǵatpen áńgimelesti. Bul týraly Qamshy portaly aqorda.kz-ke silteme jasaı otyryp habarlaıdy.

Bul kúni adamdar ókpe-renishterin keshirip, bir-birine jaqyn bola túsedi. Sondyqtan mereke biriktirýshi ról atqarady. Bizdiń halqymyz Táýelsizdik alǵannan keıin ıslam dinimen qaıta qaýyshty. Sonyń arqasynda damý baǵytyndaǵy jolymyzdy jalǵastyra otyryp, birligimiz ben tatýlyǵymyzdy nyǵaıttyq, – dedi Qazaqstan Prezıdenti.

Nursultan Nazarbaev sondaı-aq qazirgi zamandaǵy qaqtyǵystardyń negizgi sebepterine de toqtaldy.

Bular – eń birinshi jer aýmaǵyna baılanysty daýlar. Biz osyndaı daý týmaýy úshin kórshi eldermen ýaǵdalastyq arqyly shekaramyzdy bekittik. Ekinshi – etnosaralyq qaqtyǵystar. Óz ultyn ózgeden joǵary sanaý – asa úlken kúná. Biz Qazaqstanda kópultty halyqtyń birligin qamtamasyz ettik. Etnıkalyq tegine qaramastan, árkimdi de qurmetteı otyryp, eldegi turaqtylyqty nyǵaıttyq. Úshinshi – búginde búkil álemde bolyp jatqan dinaralyq qaqtyǵystar. Elimizdiń musylmandary óz dinin ustana otyryp, ózgelerdi qurmetteıdi. Sonyń negizinde biz halyqtyń birligi men dostyǵyn qamtamasyz ettik. Sondyqtan halqymyzdy óz dininde meıirimdilik pen qaıyrymdylyq jolyn tańdaýǵa jáne óskeleń urpaqty osy baǵytta tárbıeleýge shaqyramyn, – dedi Memleket basshysy.

Sońynda Qazaqstan Prezıdenti barshany taǵy da merekemen quttyqtap, ár shańyraqqa baq-bereke tiledi.