Jarty ǵasyrdan astam ýaqyt buryn Shámshi Qaldaıaqov pen Jumeken Nájimedenov jazǵan "Meniń Qazaqstanym" áni 2006 jyly elimizdiń ánurany bolyp bekitilgen bolatyn. Ánniń shyǵý tarıhy da, odan keıingi taǵdyry da qyzyq. Bul án resmı túrde bekitilmeı turyp ta, barsha halyqtyń uranyna aınalǵan edi. Resmı túrde ánuran bolyp tanylarda Nursultan Nazarbaevtiń esimi qosylyp, ánniń sózderine ózgeris engizildi. 

"Stalındi tabalap, súıegin mavzoleıden alyp, qara jer qoınaýyna kómgen Hrýshev qazaq jerine qyrǵıdaı tıdi. Qazaqstannyń soltústiktegi 5 oblysynan tyń ólkesin qurdy. "Túbinde ol ólkeni Rossıaǵa qosady" degen sóz shyqty. Bul ne degen sumdyq! Qazaq jerin talan-tarajǵa salýǵa, bólshekteýge bola ma? Ata-babalarymyzdyń aq naızanyń ushymen urpaqtaryna qaldyryp ketken ulan-baıtaq dalasyn kimder taptamaq? Kókireginde namysy bar, qazaq degen qany bar árbir azamat: "Bul – meniń Qazaqstanym!" dep tý ustap urandap kóteriliske shyǵýǵa tıis. Qan qyzdy, kózden parlap jas aqty. Al, meniń qolymnan ne keledi? Áýeli ózińnen bastashy, Shámshi! Júregińdegi otyń, janyńdaǵy jalynyń qaıda? Jaman qatynnyń janynda jantaıyp jata bermeksiń be? Tur, ornyńnan! Bir óziń bir armıadaı kóteril… Marsh… Marsh jaz!"

"Meniń Qazaqstanym" – osyndaı tolǵanystan týǵan taǵdyrly án. Barsha qazaqtyń rýhyn oıatyp, namysyn qaıraǵan ándi 1986 jyly "qazaqty qazaq qana basqarsyn" degen uranmen alańǵa shyqqan jeltoqsanshylar da, 2022 jyly qańtarda narazylyqqa shyqqan táýelsiz qazaqstandyqtar da shyrqady. Bul án bıik tuǵyrlarda da, qandy alańdarda da aıtyldy. Bul – yza men kektiń jyry emes, egemendi el bolýdy ańsaǵan qazaqtyń máńgilik urany.

Ánniń alǵashqy shýmaǵynan keıin qaıyrmasyndaǵy "Týǵan jerim meniń Qazaqstanym" degen tarmaq shyqqanda Jumeken Nájimedenov pen Shámshi Qaldaıaqov "Oı, dóńgelengen dúnıe-aı! Aınalaıyn senen. Án týdy ǵoı! Án týdy. Marsh keldi ǵoı álemge. Dúńkildegen, tarsyldaǵan, sartyldaǵan! Bul mıllıon qol, mıllıon aıaqtyń júrisi ǵoı. Bul elin súıgen, jerin súıgen azamattardyń aıaq basýlary ǵoı. Bul – namystyń, ardyń áni ǵoı" – dep tebirengen eken.

Alaıda ánuran ózgeriske ushyrap, alǵashqy nusqasyndaǵy "meniń jerim" degen sózder "meniń elime" aýysty. Jeri joq jetim halyq emespiz. Aqtaban shubyryndy, Alqakól sulamadan bastap, keshegi jeltoqsan kóterilisine deıingi aralyqta táýelsizdik úshin kúresken barsha qazaqtyń qanymen shekaramyz shegendeldi, táýelsiz el boldyq. Alaıda qazaq jeriniń tutastyǵyna kóz alarta qaraýshylar kóbeıgen búgingi beıbit zamanda týǵan jerdiń kimdiki ekenin este ustaý kerek–aq.