QazMunaıGaz kompanıasynyń basqarma tóraǵasy Maǵzum Myrzaǵalıev jańaózendik jumysshylardyń talaby orynsyz ekenin aıtty. 

“Munaıshylar 3 jyldyq kelisimshart talap etti. Biz ol talapty oryndaýǵa daıyn ekenimizdi aıttyq. Biraq bul – bıznes. Bızneste básekelestik bolýy kerek. Bul jerde bir kompanıa utyp, bireýi utyldy. Utqan kompanıa "BerÁli" jumysshylaryn jumysqa alýǵa daıyn ekenin aıtty. Keıin jumysshylar ol kompanıadan da bas tartty. Ekinshi kompanıa da óz jumysyn usyndy”, – dedi Maǵzum Myrzaǵalıev.

Sonymen qatar, kompanıa basshysy kelisimshartqa da toqtalyp ótti.

“Buǵan deıin tenderlik kelisim bir jyldyq boldy. Qazirgi tańda úsh jyldyq kelisimshartqa aýysýǵa sheshim qabyldadyq. Biraq bul tek "Qazmunaıgazdyń" ustanymy emes. Jekemenshik kompanıalar da táýekel etedi. Eger olar úsh jylǵa qol qoıyp, keıin ınflásıa bolyp qural–jabdyqtardyń baǵasy ósetin bolsa, qıyn bolady. Bul bir jaǵynan árbir kompanıanyń daıyndyǵyna da baılanysty”, – dedi ol.

Myrzaǵalıevtiń sózinshe, munaıshylardyń talaby jıi ózgeredi.

“Biz jumysqa daıyn ekenimizdi aıttyq. Biraq olar "Ózenmunaıgazdyń" ózine jumysqa turǵysy keletinin aıtty. Bul óte orynsyz, oryndalmaıtyn talap. Nege deseńizder, ol jerde kezekte turǵan 9 myń adam bar. "Ózenmunaıgazǵa" kirý úshin onyń belgili bir algorıtimi bar. Birinshi komýnaldyq mekemege jumysqa kirip, keıin kompanıaǵa ornalasa alady”, – dedi Maǵzum Myrzaǵalıev.