Bıylǵy jyldyń birinshi toqsanynda QAJ mekemelerinde beınebaqylaý kameralarynyń kómegimen 3 402 zańbuzýshylyq anyqtalǵan. 

İİM málimetinshe, búgingi tańda QAJ mekemelerinde 22 myńnan astam beınekamera ornatylǵan, bul "kórinbeıtin aımaqtardy" da joıady. Qylmystyq–atqarý júıesi mekemelerine úzdiksiz beınebaqylaý júrgizý  tótenshe jaǵdaılar men qylmystarǵa jol bermeý úshin qoıylǵan. Kameralar adamnyń jeke basyn nemese avtokólikti anyqtap qana qoımaı, operatordyń aýmaqqa tekserý júrgizýi arqyly jasalǵan quqyq buzýshylyqty anyqtaýǵa múmkindik beretin jasandy ıntellektke negizdelgen.

"Bıylǵy jyldyń birinshi toqsanynda kameralar ustaý rejımin buzýdyń 3 402 deregin anyqtady. Al ótken jyly 2 779 quqyq buzýshylyq bolǵan. Tyıym salynǵan zattardy engizýdiń 4 joly anyqtaldy. 79 qaqtyǵys pen 9 toptyq baǵynbaý toqtatyldy. 13 sýısıd pen 3 ret túrmeden qashýdyń aldyn aldy. Bir jyldyń ishinde QAJ mekemelerinde qyzmetkerlerdiń zańsyz áreketterine qatysty shaǵymdar sany 4 esege azaıdy", – delingen habarlamada.

Sonymen qatar, mekemelerde úzdiksiz beınebaqylaýdy engizý sottalǵandardyń quqyqtyq jaǵdaıyn jaqsartýǵa jáne zańsyzdyqtardyń aldyn alýǵa baǵyttalǵanyna qaramastan, sottalǵandar 293 kamerany isten shyǵarǵan, dep habarlaıdy Ulysmedia.kz. Ustaý rejımin buzýshylarǵa qatysty keltirilgen zalaldy óteýmen qosa 45 tártiptik jaza qoldanyldy, 49 sotqa deıingi tergeý bastaldy.