Májilistiń Ekologıa máseleleri jáne tabıǵat paıdalaný komıteti Temirtaý qalasynda keńeıtilgen kóshpeli otyrys ótkizdi. Jıyn «Arselor Mıttal Temirtaý» AQ-daǵy ekologıalyq, energetıkalyq jáne ónerkásiptik qaýipsizdik máselelerine arnaldy.

Aldymen Májilis depýtattary ArselorMıttal Temirtaý» AQ-ǵa baryp, kásiporynnyń jekelegen obektileriniń jaı-kúıimen tanysty.

İs-sharaǵa Májilis depýtattary, Ekologıa jáne tabıǵı resýrstar, Energetıka, Indýstrıa jáne ınfraqurylymdyq damý, Tótenshe jaǵdaılar mınıstrlikteriniń basshylary men jergilikti jáne atqarýshy organdardyń, metalýrgıa kombınatynyń, óńirdegi qoǵamdyq uıymdardyń ókilderi qatysty.

Otyrysty ashqan komıtet tóraǵasy Edil Jańbyrshın bul taqyryptyń kezdeısoq tańdalmaǵanyn aıtyp, Memleket basshysynyń «Jańa jaǵdaıdaǵy Qazaqstan: is-qımyl kezeńi» atty joldaýynda qorshaǵan ortany qorǵaý jáne ekologıalyq damý elimizdegi ózekti máselelerdiń aldyńǵy qatarynda turǵanyn atap ótti.

Osyǵan baılanysty Ekologıa kodeksi ázirlenip, qabyldandy. Kodekstiń basty baǵyttarynyń biri – qorshaǵan ortanyń zardap shekken komponentterin qalpyna keltirý mindettemesin qamtıtyn «túzetý qaǵıdaty» jáne «lastaýshy tóleıdi» degen halyqaralyq ekologıa qaǵıdattaryn iske asyrý.

Komıtet tóraǵasy kóptegen iri kásiporyn ıeleriniń óz óndiristerin jańǵyrtýǵa qarajat salýǵa jáne ınvestısıa quıýǵa múddeli emes ekenine nazar aýdardy.

– Tájirıbe kórsetip otyrǵandaı, kásiporyndar qorshaǵan ortany lastaý faktilerine jol bermeý sharalaryn qaǵaz júzinde qabyldaıdy, tabıǵatty qorǵaý is-sharalaryn ázirleıdi. Biraq olardy iske asyrýdyń tıimsiz ekenin qorshaǵan ortaǵa zıandy shyǵaryndylar kóleminiń azaımaýy kórsetip otyr. Ekologıalyq monıtorıń nátıjeleri boıynsha ótken jyly Temirtaý qalasy Qazaqstannyń eń lastanǵan qalalary tiziminde kósh bastady. Atmosferalyq aýaǵa zıandy zattar shyǵaryndylarynyń kólemi 231 myń tonnany quraǵan, onyń 87 paıyzy «ArselorMıttal Temirtaý» AQ-ǵa tıesili, – dedi Edil Jańbyrshın.

Jıyn barysynda Ekologıa jáne tabıǵı resýrstar vıse-mınıstri Dosbol Bekmaǵambetov kásiporynda ekologıalyq zańnamany buzý faktileri bar ekenin aıtty.

– ArselorMıttal Temirtaý» AQ baqylaý obektisine tekserý júrgizý úshin kelgen memlekettik ekologıalyq ınspektorlardy óz aýmaǵyna kirgizbeý faktileri bar ekenin, tekserý kezinde laýazymdy tulǵalarǵa júıeli túrde kedergi keltiretinin atap ótý qajet, – dedi.

Ekologıa mınıstrliginiń málimetinshe, ótken jyly Qaraǵandy oblysynyń 2020-2024 jyldarǵa arnalǵan ekologıalyq problemalaryn keshendi sheshý boıynsha Jol kartasyn oryndaý aıasynda «ArselrMıttal Temirtaý» kásipornynda jospardan tys tekserý júrgizilgenin atap ótti.

– Tekserý barysynda ekologıalyq zańnamanyń óreskel buzýshylyqtary anyqtaldy. Atap aıtqanda, bul – shekti ruqsat etilgen shyǵaryndylardan asyp ketý, tazartý qondyrǵylarynyń tıimsiz jumysy, ruqsattardyń bolmaýy jáne taǵy basqalar. Joǵaryda kórsetilgen buzýshylyqtar saldarynan Temirtaý qalasynyń atmosferalyq aýasy lastaný ındeksi joǵary bolyp qalady. Bul qorshaǵan ortanyń jaı-kúıine jáne halyqtyń densaýlyǵyna teris áser etedi, – dedi Dosbol Bekmaǵambetov.

Al Tótenshe jaǵdaılar vıse-mınıstri Mereke Pishembaev 2023 jyldyń 5 aıynda T.Kúzembaev, «Vostochnaıa», «Órken-82», «Órken» kenishi men  «Keńtóbe» shahtalarynda 5 ret tekserý júrgizilgenin aıtty.  Tekserý barysynda 911 buzýshylyq anyqtalyp, memlekettik ınspektorlar anyqtalǵan buzýshylyqtardy joıý týraly nusqama berdi.

Sonymen qatar otyrysta Energetıka, Indýstrıa jáne ınfraqurylymdyq damý mınıstrlikteriniń ókilderi, Qaraǵandy oblysy ákiminiń orynbasary men «ArselorMıttal Temirtaý» AQ-nyń tehnıkalyq dırektory sóz sóıledi.

Májilis depýtaty Arman Qalyqov qordalanǵan máselelerdi kóterip, depýtattar suraq qoıyp, kásiporynnyń ekologıalyq, energetıkalyq jáne ónerkásiptik qaýipsizdigi salasyndaǵy negizgi problemalar boıynsha pikir almasty.

İs-sharany qorytyndylaǵan Edil Jańbyrshın memlekettik organdar tarapynan qabyldanyp jatqan sharalarǵa, sonyń ishinde júrgizilip turatyn tekserýlerge qaramastan, «ArselorMıttal Temirtaý» AQ-nyń jumysynda ártúrli saladaǵy buzýshylyqtar júıeli túrde anyqtalyp otyratynyn atap ótti.

– Bizdiń maqsatymyz – kásiporynnyń zamanaýı tehnologıalardy paıdalanyp, eń bastysy jumyskerlerdiń qaýipsiz jaǵdaıda eńbek etýine múmkindik jasaý. Bul eńbek ónimdiligin arttyrýǵa, óndiris kólemin kóbeıtýge, búdjetke túsimdi ulǵaıtýǵa jáne óńirdegi ekologıalyq jaǵdaıdy jaqsartýǵa múmkindik beredi, – dedi E.Jańbyrshın.

Komıtet tóraǵasy «ArselorMıttal Temirtaý» AQ-y basshylyǵyna ekologıalyq, energetıkalyq jáne ónerkásiptik qaýipsizdikti jaqsartýda oń nátıjelerge qol jetkizetý aksıonerdiń basty mindetteri ekenin eskertti.

Májilistiń Baspasóz qyzmeti