Abaı oblysynda bolǵan alapat orman órtinen kóz jumǵan 14 adamnyń biri, ormanshy Serikjan Toqtasynnyń ákesi bolǵan jaǵdaı týraly aıtyp berdi. 

Serikjan Toqtasynnyń ákesi Baqytjan Jumadilovtiń aıtýynsha, "Novoshýlba" orman sharýashylyǵynyń basshylary ulyn eshbir qorǵanysh kıiminsiz órt bolǵan aýmaqqa jibere salǵan.

"Keshki saǵat 7 de qyzmetkerlerdiń bárin jınap, 45 kılometr jerdegi órt bolyp jatqan aımaqqa jiberedi. Túngi saǵat 9 da qalyń órttiń ortasyna qoldaryna kúrek berip, kirgizip jibergen. Kúndiz bastalǵan órtti basshylyq baqylamaǵan. Ábden ýshyqqannan keıin aýyl–aımaqqa kirip ketedi dep qorqyp, "Novoshýlba" orman sharýashylyǵy qorǵaý kerek dep asyǵys–úsigis attandyryp jibergen. Meniń balam eski "Nıvamen", basqalary bireýdiń jekemenshik ÝAZ–ymen barǵan" – dedi ulynan aıyrylǵan áke

Marqumnyń ákesi balasynyń ústinde qorǵanysh kıimi de bolmaǵanyn aıtty.

"Qorǵanysh kıimderi gazdan qorǵaıtyn qurylǵylarymen birge orman sharýashylyǵynyń qoımalarynda jatady. Tek bir ǵana órt sóndirý kóligi barǵan. Ol orman qorǵaý jónindegi ınjener bolyp isteıtin. Ortalyq ofıste otyryp, kimniń qaıda barýyn rasıamen aıtyp, basqarýy kerek edi. Al bul balany dırektor men onyń orynbasary "sen sol jerge barýyń kerek" dep jibere salǵan. Al ózderi "bizdiń densaýlyǵymyz joq, ormannyń ishinde júre almaımyz" dep aıtqan" – dedi Baqytjan Jumadilov.

 Ol balasynyń máıitin eki kúnnen beri saraptamadan ala almaı júr.

"Olardyń aıtýynsha, balam eń birinshi ýlanǵan. Sodan keıin denesin órt sharpyǵan. Denesin taný múmkin emes. Jerleı almaı otyrmyz. Endi DNQ nátıjesine baılanysty belgili bolady dep otyr. Onyń qashan shyǵatyny taǵy belgisiz", – dep málimdedi Serikjan Toqtasynnyń ákesi.

Sonymen qatar, Baqytjan Jumadilov balasynyń jalaqysy nebári 80–100 myń teńge ǵana bolǵanyn aıtty.

"Jalaqysy alǵashynda 80 myń teńge bolǵan. Qazir 100 myńǵa jýyq alatyn. Oqýyn bitirip kelgennen keıin osy jerde bes jyl ınjener bolyp jumys istegen. Sodan keıin jalaqym az dep Pavlodarǵa jumys isteýge ketip qalǵan. Ol jerde zaýytta jumys istep, jap–jaqsy 200 myń teńge jalaqy alyp júrgen. Biz – zeınettegi adamdarmyz. Sheshesiniń júrek aýrýy bar edi. Arasynda qysylyp, demala almaı qalatyn. Ulymnan basqa úsh qyzym turmysta, basqa jaqta turady. Sol sebepti úıde bir–birimizge kómektesip ázer júrgennen keıin balamdy bir jarym aı buryn elge shaqyryp alǵanmyn", – deıdi marqumnyń ákesi.

Baqytjan Jumadilov balasynyń óz jumysyn jaqsy biletin, taptyrmas maman ekenin de tilge tıek etti.

"Orys tilin jaqsy bilgendikten, býhgalterlik esep-qısap jumystaryn atqaratyn. Semeıdegi basqarmaǵa synaq tapsyrǵanda eshqandaı qatesiz tapsyrǵan. Sóıtip jumysqa birden qabyldady. Ózi kúzde nemese qysqa taman úılenemin dep josparlap júrgen. Moınynda mıllıon nesıesi de bar. Sony jaýyp, aqsha jınap, otbasyn qurǵysy kelgen edi" – dedi Baqytjan Jumadilov.

Eske sala keteıik, "Semeı ormany" tabıǵı rezervatynda bolǵan iri órt saldarynan orman sharýashylyǵynyń 14 qyzmetkeri qaza taýyp, 12 maýsym elimizde jalpyulttyq aza tutý kúni bolyp jarıalandy.

Qaza tapqandardyń otbasylaryna "Qazaqstan halqyna" qorynan 7 mln teńgeden, sondaı-aq,  kámeletke tolmaǵan ár balaǵa 2 mıllıon teńgeden tólenedi. Budan bólek, qaza tapqandardyń otbasylaryna jáne zardap shekkenderge qajetti qoldaý sharalaryn kórsetý maqsatynda arnaıy qor quryldy. 

Derekkóz: stan.kz