Vladımır Pýtın federasıalyq psıhıatrıa ortalyǵy janynan LGBT ókilderin zertteıtin ınstıtýt qurýdy tapsyrdy. Bul jóninde beısenbi kúni jynys aýystyrýǵa tyıym salatyn zań jobasy qaralǵan Memlekettik dýma otyrysy kezinde densaýlyq saqtaý mınıstri Mıhaıl Mýrashko málimdedi. Qujat birinshi oqylymda maquldanǵan. 

Memlekettik dýmada qaralǵan jynys aýystyrýǵa tyıym salý týraly zań jobasy hırýrgıalyq operasıanyń kómegimen transgenderlikke ótý múmkindigine tolyq tyıym salady. Qujatqa sáıkes, "balalardyń jynysynda týa bitken fızıologıalyq aýytqýlardy emdeý úshin" ǵana operasıa jasaýǵa bolady, ol úshin arnaıy komısıanyń sheshimi kerek bolady.

Quqyq qorǵaýshylar men keıbir dárigerler zań jobasyn synaǵan. Olar bul zań psıhıkalyq aýytqýlar men sýısıdti kóbeıtýi múmkin, sonymen birge astyrtyn medısınalyq qyzmet naryǵyna jol ashýy múmkin dep qaýiptenedi.

Eske sala keteıik, 2022 jyly jeltoqsanda Vladımır Pýtın LGBT–ny nasıhattaýǵa tyıym salatyn zańǵa qol qoıǵan bolatyn. 

Derekkóz: Azattyq radıosy