Qarjylyq monıtorıń agenttiginiń dereginshe, túrli kúmándi maqsattarǵa aqsha jınaýǵa tartylǵan 138 banktik karta áshkerelendi. Jalǵan kómek suraýshylarǵa 660 myńnan astam qazaqstandyq sadaqa aýdaryp, adal aqshalaryn bilmeı joldaǵan.

Bıylǵy naýryzdaǵy jaǵdaı boıynsha sadaqa, jylý, kraýdfandıng túrinde jınalǵan qarjynyń jalpy somasy 6 mıllıard teńgeni qurady, sonyń 33%-ynyń nemese 2 mıllıard teńgesiniń "alaıaqtyq belgileri bar" dep tanylǵan. Biraq bul tek resmı anyqtalǵany ǵana. Alaıaqtyqtyń shynaıy aýqymy birneshe ese zor bolýy múmkin.

Agenttik tóraǵasy Dmıtrıı Malahovtyń aıtýynsha, zalymdar sol mıllıardtardy ary qaraı qymbat avtokólikter, jyljymaıtyn múlikter satyp alýǵa, turmystyq shyǵyndaryna, býkmekerlik keńselerde bás tigýge, sheteldegi qymbat apartamentterdi jalǵa alýǵa jáne basqasyna jumsaıdy.

Janashyr azamattardyń jaqsy nıeti men adal aqshasy izgi isterge baǵyttalýy úshin Qarjylyq monıtorıń agenttiginiń, "Astana" qarjy ortalyǵynyń, quzyrly organdardyń jáne ekinshi deńgeıli bankterdiń ókilderi "kraýdfandıngtik qyzmetti retteý boıynsha zańnamalyq sharalardy ázirleý" týraly usynys engizdi.

"Ártúrli platformalarda kómek suraǵan ótinishter men habarlandyrýlar qaptady jáne barǵan saıyn kóbeıýde. Halyq onyń artynda alaıaqtar tur ma dep, aqsha aýdarýdan qorqatyn boldy. Ózderi jarıa esep bermese, elden jıǵan qarajatty qaıyrymdylyq qorlarynyń qaıda jumsaıtyny beımálim. Qazaqstanda bul salada biryńǵaı retteýshi organ joq. Uıymdar aıqyndyq tanytyp, qoǵam aldynda esep berýge qushtar emes. Olar úshin aqsha jınaıtyn volonterlerdiń qaýipsizdigi de alańdatady. Onyń ústine bul sala jetkilikti túrde zańnamalyq rettelmegen. Naǵyz qaıyrymdylyq qorlary men eriktilerdiń adal atyn, asyl isin alaıaqtardan qorǵaý úshin bul saladaǵy aramza tirlikterge tegeýrindi tosqaýyl qoıatyn sharalar qabyldanýy kerek", – deıdi májilismen Dınara Naýmova.