Búgin aq túıeniń qarny jarylǵan kún. Sebebi 17 jyldan beri arman bolǵan Abaı Ulttyq mektebi ashylmaq,- dep qýana habarlady mesenat, til janashyry Dýlat Tastekeı áleýmettik jelidegi paraqshasynda. 

Onyń aıtýynsha, aqshaǵa qunyqqan azamattardyń kesirinen mektep óz terıtorıasynan aıyrylǵan kórinedi. Endi jańa mektep burynǵy “Bóbek” qorynyń terıtorıasynda boı kótermek.

«Nesin jasyraıyq, 2007 jyly aqshaǵa qunyqqan, pıǵyly bar azamattardyń kesirinen terıtorıasynan aıyrylǵan altyn uıa mektebimizdiń keıingi jyldardaǵy jaǵdaıy kóńil kónshitetindeı emes edi. 17 jyl boıy elimizdiń ár aımaǵynan kelgen oqýshylar eski ǵımaratta oqyp, tozyǵy jetken jataqhanada turyp keldi. Jańa jerge kóshý týraly birneshe márte bastama kóterilse de, nátıjesi bolmady. Jańa Qazaqstanda ǵana jańa mektebimizge qol jetkizetin boldyq. Aq túıeniń qarny jarylǵan kún boldy búgin. Endi, daryndy da talantty, aqyldy izbasarlarymyz buıyrsa 2025 jyldyń kúzinen bastap, zamanaýı mektepte oqıdy. Mekteptiń ǵımaratyna ǵana emes, bilimi men tárbıesine de erekshe nazar aýdarylady.
Mektep mısıasy synı turǵydan oılaýǵa, qoǵamǵa izgi nıetpen qyzmet etýge qabiletti, adal jáne jaýapty Qazaqstannyń bolashaq kóshbasshylaryn tárbıeleý bolmaq.
Bolashaqta Abaı ulttyq mektebinen zeıini ashyq, kókiregi oıaý, ulttyq múdde jolynda eńbek etetin lıderler shyǵatynyna shúbá joq. Osy jolda bizde aıanyp qalmaımyz, ushqan uıamyzǵa qolymyzdan keler dúnıeniń barlyǵyn jasaımyz. Jańa mektebimiz burynǵy “Bóbek” qorynyń terıtorıasynda boı kóteredi»,-dedi mesenat Dýlat Tastekeı.

Abaı ulttyq mektebiniń irgetasyn qalaý rásimine 1988 jylǵy mektep túlegi, QR oqý-aǵartý mınıstri, birqatar zıaly qaýym ókilderi jáne QR Parlamenti Senatynyń tóraǵasy Máýlen Áshimbaev qatysqan. Máýlen Saǵathanuly mektep nyq boı kóterýi úshin naqty tapsyrmalar berdi.

«Elimizde bilim berý sapasyn arttyrýǵa únemi basymdyq beriledi. Jobanyń basty maqsaty Abaıdyń «Tolyq adam» tujyrymdamasyna taban tireı otyryp, ultqa qyzmet etetin patrıot azamattardyń jańa býynyn tárbıeleý. Bul oqý ordasy orta bilimniń ulttyq brendin qalyptastyrýǵa qosylǵan úlken úles. Árbir oqýshynyń bilim alyp, jan-jaqty damýy úshin qolaıly orta týdyrý úshin aýqymdy jumys istelmek»,-dedi QR Parlamenti Senatynyń tóraǵasy.