"Qazaqstan halqyna" qoǵamdyq áleýmettik qorynyń tóraǵasy Bolat Jámishev qyzmetinen ketti. Ornyna Lázzat Shyńǵysbaeva jańa basshy bolyp taǵaıyndaldy.

Aıta keteıik, "Qazaqstan halqyna qory" 2022 jyly qurylyp, ony sodan beri Bolat Jámishev basqaryp keledi.

Bolat Jámishev ókilettik merziminiń aıaqtalýyna baılanysty qordaǵy jumysyn toqtatý týraly sheshim qabyldady.

"Qazaqstan halqyna" qorynyń málimetinshe, Bolat Jámishev basshylyq kezinde "qordyń qurylýy men damýyna zor úles qosty". Qor 104 qaıyrymdylyq baǵdarlamasy men jobasyna bastamashy boldy, onyń 62-si iske asyryldy.

"Qorda jumys isteý men úshin úlken mártebe jáne jaýapkershilik boldy. Bizdiń bastamamyzda qordy qoldaǵandardyń barlyǵyna shyn júrekten alǵys aıtamyn. Birge aıtarlyqtaı nátıjelerge qol jetkizdik jáne qor aldaǵy ýaqytta da damı beretinine senemin.  Barlyq seriktesterge, donorlarǵa jáne qyzmetkerlerge ortaq ıgi isimizge qosqan úlesi úshin alǵys aıtamyn", – dedi Bolat Jámishev.

"Qazaqstan halqyna" qoǵamdyq qory Qamqorshylyq keńesiniń sheshimimen qoǵam qaıratkeri, Qazaqstandaǵy qaıyrymdylyq, áleýmettik jobalardy basqarý jáne Úkimettik emes uıymdardy ınstıtýsıonaldyq damytý salasyndaǵy sarapshy Lazzat Shyńǵysbaeva tóraǵa bolyp saılandy. 

Buǵan deıin Shyńǵysbaeva "Qazaqstan halqyna" qory basqarma tóraǵasynyń orynbasary qyzmetin atqarǵan. "Eren eńbegi úshin" jáne "Atameken" Ulttyq kásipkerler palatasynyń Qurmetti qyzmetkeri" medaldarymen marapattalǵan.