Premer-mınıstrdiń orynbasary — Ulttyq ekonomıka mınıstri Nurlan Baıbazarov aldaǵy ýaqytta memlekettiń agroónerkásiptik fermerlerge sýbsıdıa berýden bas tartatynyn aıtty.

Ol jalpy memleket agroónerkásiptik keshendi sýbsıdıalaý saıasatyn ózgertýdi josparlap otyrǵanyn alǵa tartty. Burynǵy sharttar endi bes paıyzdyq qaryzǵa aýystyrylmaq.

"Biz sýbsıdıalardan bas tartamyz. Ekonomıkany retteý týraly jarlyq qabyldandy. Sondaı-aq, naqty sharalar bar. 2029 jylǵa qaraı agroónerkásiptik keshendegi sýbsıdıalardan múldem bas tartyp, olardy osyndaı jeńildetilgen qaıtarymdy resýrstarmen almastyrý kerek. Óıtkeni jyl saıyn shynymen úlken soma jumsaldy. Osy sýbsıdıalardyń nátıjeliligine qatysty suraqtar boldy. Iaǵnı, aqsha qaıtarylsa munda múldem basqa tásil bolady jáne fermerlerdiń jaýapkershiligi artady", – dedi Nurlan Baıbazarov.

Sonymen qatar ol qazir barlyq sýbsıdıalardy berýdi avtomattandyrý týraly sheshim qabyldanǵanyn aıtty. Muny Agrokredıttik korporasıa sıfrlyq platformada júzege asyratyn bolady.

"Adamdar aıaqpen júrmeıdi, bireýmen kelispeıdi nemese zańsyz joldarmen sýbsıdıa almaıdy. Sıfrlandyrý kóptegen máselelerdi sheshedi", – dep qosty ol.