Abaı oblysynyń Úrjar aýdanynan jol-kólik oqıǵasynan zardap shekken eki balany jetkizý úshin Ulttyq shuǵyl medısınany úılestirý ortalyǵynyń (USHMÚO) sanıtarıalyq avıasıa borty Astana qalasyna ushyp shyqty.
Pasıentterdi Astana qalasyndaǵy №2 Kóp beıindi qalalyq balalar aýrýhanasyna emdeýge jatqyzý týraly sheshim qabyldandy.
- Bortta balalarǵa medısınalyq kómek kórsetý úshin USHMÚO reanımatology E. Shaqan, Astana qalasynyń №2 Kóp beıindi qalalyq balalar aýrýhanasynyń travmatology N. Jakıpov jáne Ulttyq neırohırýrgıa ortalyǵynyń (UNHO) neırohırýrgy S. Seıtbekov dárigerler brıgadasy quramy qalyptastyryldy, delingen habarlamada.
Oqıǵa ornynda birden aýdandyq aýrýhanada oblystyq jáne respýblıkalyq deńgeıdegi mamandardan qurylǵan mýltıtártiptik brıgada tolyq dıagnostıkalyq zertteý júrgizip, zardap shekkenderdiń jaǵdaıyna baǵalady jáne jedel emdeý josparyn jasady.
Bala jaǵdaıynyń turaqsyzdyǵy eskerile otyryp, pasıentterdiń biri – toǵyz jasar qyz bala Abaı oblysynyń bas shtattan tys anestezıolog-reanımatology D. Karımovtyń baqylaýymen jaǵdaıy turaqtalǵanǵa deıin stasıonarda qaldyryldy.
19 tamyzda tańerteń Úrjar aýdanynyń Besterek aýylynda jantúrshigerlik jol apaty boldy. Polısıa dereginshe, Toyota markaly avtokólikti tizgindegen 55 jastaǵy júrgizýshi rólge ıe bola almaı, joldyń nebári on metrdeı jerinde turǵan balalardy qaǵyp ketken. Sonyń saldarynan eki bala oqıǵa ornynda kóz jumdy, taǵy bireýi aýrýhanaǵa barar jolda qaıtys boldy. Úsh bala jansaqtaý bóliminde jatyr.
