Osydan bir aı buryn Aqtóbege bas ımam bolyp kelgen Nurlan Asanov “óńirdegi dinı ahýalǵa júregi qatty aýyratynyn” aıtady. Bas ımamnyń sózine qaraǵanda, Aqtóbede qazir teris aǵym jeteginde júrgen eki myńnan astam adam bar, - dep habarlaıdy «Qamshy» portaly Kerek-ınfo-ǵa silteme jasap.

Nurlan Asanovtyń Aqtóbege bas ımam bolyp kelgenine bir aıdaı ýaqyt boldy. Bul aınalany bajaılap alýǵa jetkilikti merzim. Osy aralyqta ol JOO, kolejder stýdentterimen birneshe márte kezdesken. Qaladaǵy jalpy bilim beretin mektepterdi de aralap kórgen. Imam qala mektepteriniń birinde qara kıim kıip, betin tumshalaǵan jasóspirim qyzdar men saqal ósirgisi keletin balalardy kórip tań qalǵanyn aıtty.

“Qyz balanyń kıgisi kelgeni hıdjab ta, oramal da emes. Qap-qara bolyp betin nıkabpen búrkenýdi qalaıdy. Sol kıimimen dáriske de kelmek. Al 7-8 synyp oqıtyn er bala saqal jiberýge talpynýda. Áli kishkentaı ǵoı. Saqaly jarytyp ta óspeıdi. Sonyń ózinde tartyp ósirgisi keledi. Balalardyń osyndaı halge jetkenin kórip júregim aýyrdy. Al mekteptiń basshysy qam-qareketsiz otyr. Álgi balalarmen jeke sóılespegen, mamandar shaqyrmaǵan. Bir baıqaǵanym, teris aǵymdar týraly túsinik mektep dırektorlarynyń sanasyna áli jetpeı jatqan sıaqty. Oqýshylardyń uıaly telefondaryndaǵy beınerolıkterdiń ekstremıstik ekenin de bilmeıdi eken. Olarǵa túsindirý jumysy júrgizilmegen. Men olarǵa mundaı vıdeolardy áleýmettik jelilerde taratý óz aldyna, laık basýdyń ózi qylmystyq jaýapkershilik ekendigin aıttym. Túsingen bolýlary kerek, dereý óshirip tastady”,- deıdi oblystyń bas ımamy Nurlan Asanov.

Aqtóbeniń ortalyq meshitinde arnaıy keste quryldy. Soǵan sáıkes, din ókilderi bilim nysandaryn aralap, áńgimelesý júrgizýdi úzdiksiz jalǵastyra bermek. Ókil ımam jaǵdaıdyń tym kúrdeli ekenin aıtyp, aqsaqaldardan kómek suraǵan. Olaı etpeske lajy da joq. Aıtýynsha, dál qazir Aqtóbede teris aǵymnyń jeteginde júrgen eki myńnan astam qyz-jigit bar.

“Jurttyń bári nege teris aǵym jeteginde ketip jatyr? Oǵan basty sebep – óz dinin bilmeýi. Ony túsindiretin eshkim bolmady. Iaǵnı, dinge kóńilderi ash boldy. Biz ony asqyndyryp aldyq. Jazylmaıtyn keselge aınaldy. Buryn adasyp júrgender jaı tisteıtin. Ókinishtisi, endi azý tisterin shyǵaryp, súıekke batyryp tistegisi keledi. Eger buny túzetpese, qazirgi qarjylyq daǵdarys dinı ahýal kúrdelense – oıynshyq bolmaq. Dinniń aınalasynda daýryqpa sóz kóp. Mysaly, pálenshe ákesiniń beıitine jaryq shamyn ornatypty deıtinder de bar. Munyń bári bos sóz. Aldymen tirilerdiń problemasyn sheship alaıyq. Qazaq aıtpaqshy, basymyzda úlken boqtyq turǵanda, shoqtyqty kóteretin másele emes, - deıdi bas ımam Nurlan Baıjigituly.

Jańa ımamǵa Aqtóbede ótetin sadaqalardyń kezindegi ysyrap ta unamaǵan. Aıtýynsha, jergilikti jurt sadaqany toıdan beter etip ótkizedi. Dastarhanǵa qustyń sútinen ózgeniń bárin qoıady. Nurlan Asanov oblys ákimi Berdibek Saparbaevqa “Nur-Ǵasyr” meshiti janynan hatymhana salýdy usynypty. Hatymhana salynar bolsa, onda arnaıy as máziri ázirlenedi. Qazirgideı ysyrap pen tekke shashylýǵa, maqtangershilikke jol berilmeıdi.

Jańa jyl qarsańynda Aqtóbege bas ımam bolyp taǵaıyndalǵan Nurlan Asanov buǵan deıin Shyǵys Qazaqstan oblysynda dál osyndaı qyzmet atqardy. Al onyń esimi elge sirke sýyn iship ólgisi kelgen áıeldiń nesıesin tólep bergennen soń tanylǵan bolatyn. Úsh balasy bar 34 jastaǵy kelinshektiń bank aldyndaǵy qaryzy 400 myńnan asyp ketken. Nesıesin óteı almaǵan kelinshek óz-ózine qol jumsamaq bolady. Tirlikten baz keship júrgen áıeldiń taǵdyryna beı-jaı qaraı almaǵan ımam úsh balanyń anasyn ajaldan qutqaryp qaldy.

Bas ımamnyń ózi de úıli-barandy. Bıyl úshinshi músheline qadam basqan Nurlan Asanov ázirshe jeti balanyń ákesi.